বালমীকি রামায়ণ বালা কাণ্ড সরগা ৫ (বাংলা)

 সর্বাপূর্বমিযং যেষাম্
আসীত্কৃত্স্না বসুন্ধরা ।
প্রজাপতিমুপাদায
নৃপাণাং জযশালিনাম্ ॥১
যেষাং স সগরো নাম
সাগরো যেন খানিতঃ ।
ষষ্টিঃ পুত্রসহস্রাণি
যং যান্তং পর্যবারযন্ ॥২
ইক্ষ্বাকূণামিদং তেষাম্
রাজ্ঞাং বংশে মহাত্মনাম্ ।
মহদুত্পন্নমাখ্যানম্
রামাযণমিতি শ্রুতম্ ॥৩
তদিদং বর্তযিষ্যামি
সর্বং নিখিলমাদিতঃ ।
ধর্মকামার্থসহিতম্
শ্রোতব্যমনসূযযা ॥৪
কোসলো নাম মুদিতঃ
স্ফীতো জনপদো মহান্ ।
নিবিষ্টঃ সরযূতীরে
প্রভূতধনধান্যবান্ ॥৫
অযোধ্যা নাম নগরী
তত্রাসীল্লোকবিশ্রুতা ।
মনুনা মানবেন্দ্রেণ
যা পুরী নির্মিতা স্বযম্ ॥৬
আযতা দশ চ দ্বে চ
যোজনানি মহাপুরী ।
শ্রীমতী ত্রীণি বিস্তীর্ণা
সুবিভক্তমহাপথা ॥৭
রাজমার্গেণ মহতা
সুবিভক্তেন শোভিতা ।
মুক্তপুষ্পাবকীর্ণেন
জলসিক্তেন নিত্যশঃ ॥৮
তাং তু রাজা দশরথো
মহারাষ্ট্রবিবর্দ্ধনঃ ।
পুরীমাবাসযামাস
দিবং দেবপতির্যথা ॥৯
কবাটতোরণবতীম্
সুবিভক্তান্তরাপণাম্ ।
সর্বযন্ত্রাযুধবতীম্
উপেতাং সর্বশিল্পিভিঃ ॥১০
সূতমাগধসম্বাধাম্
শ্রীমতীমতুলপ্রভাম্ ।
উচ্চাট্টালধ্বজবতীম্
শতঘ্নীশতসঙ্কুলাম্ ॥১১
বধূনাটকসঙ্ঘৈশ্চ
সংযুক্তাং সর্বতঃ পুরীম্ ।
উদ্যানাম্রবণোপেতাম্
মহতীং সালমেখলাম্ ॥১২
দুর্গগম্ভীরপরিঘাম্
দুর্গামন্যৈর্দুরাসদাম্ ।
বাজিবারণসম্পূর্ণাম্
গোভিরুষ্ট্রৈঃ খরৈস্তথা ॥১৩
সামন্তরাজসঙ্ঘৈশ্চ
বলিকর্মভিরাবৃতাম্ ।
নানাদেশনিবাসৈশ্চ
বণিগ্ভিরুপশোভিতাম্ ॥১৪
প্রাসাদৈ রত্নবিকৃতৈঃ
পর্বতৈরিবশোভিতাম্ ।
কূটাগারৈশ্চ সম্পূর্ণাম্
ইন্দ্রস্যেবামরাবতীম্ ॥১৫
চিত্রামষ্টাপদাকারাম্
বরনারীগণৈর্যুতাম্ ।
সর্বরত্নসমাকীর্ণাম্
বিমানগৃহশোভিতাম্ ॥১৬
গৃহগাঢামবিচ্ছিদ্রাম্
সমভূমৌ নিবেশিতাম্ ।
শালিতণ্ডুলসম্পূর্ণাম্
ইক্ষুকাণ্ডরসোদকাম্ ॥১৭
দুন্দুভীভির্মৃদঙ্গৈশ্চ
বীণাভিঃ পণবৈস্তথা ।
নাদিতাং ভৃশমত্যর্থম্
পৃথিব্যাং তামনুত্তমাম্ ॥১৮
বিমানমিব সিদ্ধানাম্
তপসাধিগতং দিবি ।
সুনিবেশিতবেশ্মান্তাম্
নরোত্তমসমাবৃতাম্ ॥১৯
যে চ বাণৈর্ন বিধ্যন্তি
বিবিক্তমপরাপরম্ ।
শব্দবেধ্যং চ বিততম্
লঘুহস্তা বিশারদাঃ ।২০
সিংহব্যাঘ্রবরাহাণাম্
মত্তানাং নর্দতাং বনে ।
হন্তারো নিশিতৈঃ শস্ত্রৈঃ
বলাদ্বাহুবলৈরপি ।২১
তাদৃশানাং সহস্রৈস্তাং
অভিপূর্ণাং মহারথৈঃ ।
পুরীমাবাসযামাস
রাজা দশরথস্তদা ॥২২
তামগ্নিমদ্ভির্গুণবদ্ভিরাবৃতাং
দ্বিজোত্তমৈর্বেদষডঙ্গপারগৈঃ ।
সহস্রদৈঃ সত্যরতৈর্মহাত্মভিঃ
মহর্ষিকল্পৈর্ঋষিভিশ্চ কেবলৈঃ ॥২৩
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে পঞ্চমস্সর্গঃ॥