তস্যাং পুর্যামযোধ্যাযাম্
বেদবিত্সর্বসঙ্গ্রহঃ ।
দীর্ঘদর্শী মহাতেজাঃ
পৌরজানপদপ্রিযঃ ।
ইক্ষ্বাকূণামতিরথো
যজ্বা ধর্মরতো বশী ।
মহর্ষিকল্পো রাজর্ষিঃ
ত্রিষু লোকেষু বিশ্রুতঃ ।
বলবান্নিহতামিত্রো
মিত্রবান্ বিজিতেন্দ্রিযঃ ।
ধনৈশ্চ সঙ্গ্রহৈশ্চান্যৈঃ
শক্রবৈশ্রবণোপমঃ ।
যথা মনুর্মহাতেজা
লোকস্য পরিরক্ষিতা ।
তথা দশরথো রাজা
বসন্ জগদপালযত্ ॥
তেন সত্যাভিসন্ধেন
ত্রিবর্গমনুতিষ্ঠতা ।
পালিতা সা পুরী শ্রেষ্ঠা
ইন্দ্রেণেবামরাবতী ॥
তস্মিন্ পুরবরে হৃষ্টা
ধর্মাত্মানো বহুশ্রুতাঃ ।
নরাস্তুষ্টা ধনৈঃ স্বৈঃ স্বৈঃ
অলুব্ধাঃ সত্যবাদিনঃ ॥
নাল্পসন্নিচযঃ কশ্চিত্
আসীত্তস্মিন্ পুরোত্তমে ।
কুটুম্বী যো হ্যসিদ্ধার্থোঽ -
গবাশ্বধনধান্যবান্ ॥
কামী বা ন কদর্যো বা
নৃশংসঃ পুরুষঃ ক্বচিত্ ।
দ্রষ্টুং শক্যমযোধ্যাযাম্
নাবিদ্বান্ন চ নাস্তিকঃ ॥
সর্বে নরাশ্চ নার্যশ্চ
ধর্মশীলাঃ সুসংযতাঃ ।
উদিতাঃ শীলবৃত্তাভ্যাম্
মহর্ষয ইবামলাঃ ॥
নাকুণ্ডলী নামকুটী
নাস্রগ্বী নাল্পভোগবান্ ।
নামৃষ্টো নানুলিপ্তাঙ্গো
নাসুগন্ধশ্চ বিদ্যতে ॥
নামৃষ্টভোজী নাদাতা
নাপ্যনঙ্গদনিষ্কধৃক্ ।
নাহস্তাভরণো বাপি
দৃশ্যতে নাপ্যনাত্মবান্ ॥
নানাহিতাগ্নির্নাযজ্বা
ন ক্ষুদ্রো বা ন তস্করঃ ।
কশ্চিদাসীদযোধ্যাযাম্
ন চ নির্বৃত্তসঙ্করঃ ॥
স্বকর্মনিরতা নিত্যম্
ব্রাহ্মণা বিজিতেন্দ্রিযাঃ ।
দানাধ্যযনশীলাশ্চ
সংযতাশ্চ প্রতিগ্রহে ॥
ন নাস্তিকো নানৃতকো
ন কশ্চিদবহুশ্রুতঃ ।
নাসূযকো ন বাশক্তো
নাবিদ্বান্ বিদ্যতে তদা ॥
নাষডঙ্গবিদত্রাসীত্
নাব্রতো নাসহস্রদঃ ।
ন দীনঃ ক্ষিপ্তচিত্তো বা
ব্যথিতো বাপি কশ্চন ॥
কশ্চিন্নরো বা নারী বা
নাশ্রীমান্নাপ্যরূপবান্ ।
দ্রষ্টুং শক্যমযোধ্যাযাম্
নাপি রাজন্যভক্তিমান্ ॥
বর্ণেষ্বগ্র্যচতুর্থেষু
দেবতাতিথিপূজকাঃ ।
কৃতজ্ঞাশ্চ বদান্যাশ্চ
শূরা বিক্রমসংযুতাঃ ।
দীর্ঘাযুষো নরাঃ সর্বে
ধর্মং সত্যং চ সংশ্রিতাঃ ।
সহিতাঃ পুত্রপৌত্রৈশ্চ
নিত্যং স্ত্রীভিঃ পুরোত্তমে ॥
ক্ষত্রং ব্রহ্মমুখং চাসীত্
বৈশ্যাঃ ক্ষত্রমনুব্রতাঃ ।
শূদ্রাঃ স্বধর্মনিরতাঃ
ত্রীন্বর্ণানুপচারিণঃ ॥
সা তেনেক্ষ্বাকুনাথেন
পুরী সুপরিরক্ষিতা ।
যথা পুরস্তান্মনুনা
মানবেন্দ্রেণ ধীমতা ॥
যোধানামগ্নিকল্পানাম্
পেশলানামমর্ষিণাম্ ।
সম্পূর্ণা কৃতবিদ্যানাম্
গুহা কেসরিণামিব ॥
কাম্ভোজবিষযে জাতৈঃ
বাহ্লীকৈশ্চ হযোত্তমৈঃ ।
বনাযুজৈর্নদীজৈশ্চ
পূর্ণা হরিহযোত্তমৈঃ ॥
বিন্ধ্যপর্বতজৈর্মত্তৈঃ
পূর্ণা হৈমবতৈরপি ।
মদান্বিতৈরতিবলৈঃ
মাতঙ্গৈঃ পর্বতোপমৈঃ ।
ঐরাবতকুলীনৈশ্চ
মহাপদ্মকুলৈস্তথা ।
অঞ্জনাদপি নিষ্পন্নৈঃ
বামনাদপি চ দ্বিপৈঃ ॥
ভদ্রৈর্মন্দ্রৈর্মৃগৈশ্চৈব
ভদ্রমন্দ্রমৃগৈস্তথা ।
ভদ্রমন্দ্রৈর্ভদ্রমৃগৈঃ
মৃগমন্দ্রৈশ্চ সা পুরী ।
নিত্যমত্তৈঃ সদা পূর্ণা
নাগৈরচলসন্নিভৈঃ ॥
সা যোজনে চ দ্বে ভূযঃ
সত্যনামা প্রকাশতে ।
যস্যাং দশরথো রাজা
বসন্ জগদপালযত্ ॥
তাং পুরীং স মহাতেজা
রাজা দশরথো মহান্ ।
শশাস শমিতামিত্রো
নক্ষত্রাণীব চন্দ্রমাঃ ॥
তাং সত্যনামাং দৃঢতোরণার্গলাং
গৃহৈর্বিচিত্রৈরুপশোভিতাং শিবাম্ ।
পুরীমযোধ্যাং নৃসহস্রসঙ্কুলাং
শশাস বৈ শক্রসমো মহীপতিঃ ॥
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ষষ্ঠস্সর্গঃ॥
#ekadashi24
