অস্য শ্রী শিবকবচ স্তোত্র, মহামংত্রস্য ঋষভযোগীশ্বর ঋষিঃ ।
অনুষ্টুপ্ ছংদঃ ।
শ্রীসাংবসদাশিবো দেবতা ।
ওং বীজম্ ।
নমঃ শক্তিঃ ।
শিবাযেতি কীলকম্ ।
মম সাংবসদাশিবপ্রীত্যর্থে জপে বিনিযোগঃ ॥
করন্যাসঃ
ওং সদাশিবায অংগুষ্ঠাভ্যাং নমঃ । নং গংগাধরায তর্জনীভ্যাং নমঃ । মং মৃত্যুংজযায মধ্যমাভ্যাং নমঃ ।
শিং শূলপাণযে অনামিকাভ্যাং নমঃ । বাং পিনাকপাণযে কনিষ্ঠিকাভ্যাং নমঃ । যং উমাপতযে করতলকরপৃষ্ঠাভ্যাং নমঃ ।
হৃদযাদি অংগন্যাসঃ
ওং সদাশিবায হৃদযায নমঃ । নং গংগাধরায শিরসে স্বাহা । মং মৃত্যুংজযায শিখাযৈ বষট্ ।
শিং শূলপাণযে কবচায হুম্ । বাং পিনাকপাণযে নেত্রত্রযায বৌষট্ । যং উমাপতযে অস্ত্রায ফট্ । ভূর্ভুবস্সুবরোমিতি দিগ্বংধঃ ॥
ধ্যানম্
বজ্রদংষ্ট্রং ত্রিনযনং কালকংঠ মরিংদমম্ ।
সহস্রকরমত্যুগ্রং বংদে শংভুং উমাপতিম্ ॥
রুদ্রাক্ষকংকণলসত্করদংডযুগ্মঃ পালাংতরালসিতভস্মধৃতত্রিপুংড্রঃ ।
পংচাক্ষরং পরিপঠন্ বরমংত্ররাজং ধ্যাযন্ সদা পশুপতিং শরণং ব্রজেথাঃ ॥
অতঃ পরং সর্বপুরাণগুহ্যং নিঃশেষপাপৌঘহরং পবিত্রম্ ।
জযপ্রদং সর্ববিপত্প্রমোচনং বক্ষ্যামি শৈবং কবচং হিতায তে ॥
পংচপূজা
লং পৃথিব্যাত্মনে গংধং সমর্পযামি ।
হং আকাশাত্মনে পুষ্পৈঃ পূজযামি ।
যং বায্বাত্মনে ধূপং আঘ্রাপযামি ।
রং অগ্ন্যাত্মনে দীপং দর্শযামি ।
বং অমৃতাত্মনে অমৃতং মহানৈবেদ্যং নিবেদযামি ।
সং সর্বাত্মনে সর্বোপচারপূজাং সমর্পযামি ॥
মংত্রঃ
ঋষভ উবাচ
নমস্কৃত্য মহাদেবং বিশ্বব্যাপিনমীশ্বরম্ ।
বক্ষ্যে শিবমযং বর্ম সর্বরক্ষাকরং নৃণাম্ ॥ 1 ॥
শুচৌ দেশে সমাসীনো যথাবত্কল্পিতাসনঃ ।
জিতেংদ্রিযো জিতপ্রাণশ্চিংতযেচ্ছিবমব্যযম্ ॥ 2 ॥
হৃত্পুংডরীকাংতরসন্নিবিষ্টং স্বতেজসা ব্যাপ্তনভোঽবকাশম্ ।
অতীংদ্রিযং সূক্ষ্মমনংতমাদ্যং ধ্যাযেত্ পরানংদমযং মহেশম্ ॥
ধ্যানাবধূতাখিলকর্মবংধ- শ্চিরং চিদানংদ নিমগ্নচেতাঃ ।
ষডক্ষরন্যাস সমাহিতাত্মা শৈবেন কুর্যাত্কবচেন রক্ষাম্ ॥
মাং পাতু দেবোঽখিলদেবতাত্মা সংসারকূপে পতিতং গভীরে ।
তন্নাম দিব্যং পরমংত্রমূলং ধুনোতু মে সর্বমঘং হৃদিস্থম্ ॥
সর্বত্র মাং রক্ষতু বিশ্বমূর্তি- র্জ্যোতির্মযানংদঘনশ্চিদাত্মা ।
অণোরণিযানুরুশক্তিরেকঃ স ঈশ্বরঃ পাতু ভযাদশেষাত্ ॥
যো ভূস্বরূপেণ বিভর্তি বিশ্বং পাযাত্স ভূমের্গিরিশোঽষ্টমূর্তিঃ ।
যোঽপাং স্বরূপেণ নৃণাং করোতি সংজীবনং সোঽবতু মাং জলেভ্যঃ ॥
কল্পাবসানে ভুবনানি দগ্ধ্বা সর্বাণি যো নৃত্যতি ভূরিলীলঃ ।
স কালরুদ্রোঽবতু মাং দবাগ্নেঃ বাত্যাদিভীতেরখিলাচ্চ তাপাত্ ॥
প্রদীপ্তবিদ্যুত্কনকাবভাসো বিদ্যাবরাভীতি কুঠারপাণিঃ ।
চতুর্মুখস্তত্পুরুষস্ত্রিনেত্রঃ প্রাচ্যাং স্থিতো রক্ষতু মামজস্রম্ ॥
কুঠারখেটাংকুশ শূলঢক্কা- কপালপাশাক্ষ গুণাংদধানঃ ।
চতুর্মুখো নীলরুচিস্ত্রিনেত্রঃ পাযাদঘোরো দিশি দক্ষিণস্যাম্ ॥
কুংদেংদুশংখস্ফটিকাবভাসো বেদাক্ষমালা বরদাভযাংকঃ ।
ত্র্যক্ষশ্চতুর্বক্ত্র উরুপ্রভাবঃ সদ্যোঽধিজাতোঽবতু মাং প্রতীচ্যাম্ ॥
বরাক্ষমালাভযটংকহস্তঃ সরোজকিংজল্কসমানবর্ণঃ ।
ত্রিলোচনশ্চারুচতুর্মুখো মাং পাযাদুদীচ্যাং দিশি বামদেবঃ ॥
বেদাভযেষ্টাংকুশটংকপাশ- কপালঢক্কাক্ষরশূলপাণিঃ ।
সিতদ্যুতিঃ পংচমুখোঽবতান্মাং ঈশান ঊর্ধ্বং পরমপ্রকাশঃ ॥
মূর্ধানমব্যান্মম চংদ্রমৌলিঃ ভালং মমাব্যাদথ ভালনেত্রঃ ।
নেত্রে মমাব্যাদ্ভগনেত্রহারী নাসাং সদা রক্ষতু বিশ্বনাথঃ ॥
পাযাচ্ছ্রুতী মে শ্রুতিগীতকীর্তিঃ কপোলমব্যাত্সততং কপালী ।
বক্ত্রং সদা রক্ষতু পংচবক্ত্রো জিহ্বাং সদা রক্ষতু বেদজিহ্বঃ ॥
কংঠং গিরীশোঽবতু নীলকংঠঃ পাণিদ্বযং পাতু পিনাকপাণিঃ ।
দোর্মূলমব্যান্মম ধর্মবাহুঃ বক্ষঃস্থলং দক্ষমখাংতকোঽব্যাত্ ॥
মমোদরং পাতু গিরীংদ্রধন্বা মধ্যং মমাব্যান্মদনাংতকারী ।
হেরংবতাতো মম পাতু নাভিং পাযাত্কটিং ধূর্জটিরীশ্বরো মে ॥
ঊরুদ্বযং পাতু কুবেরমিত্রো জানুদ্বযং মে জগদীশ্বরোঽব্যাত্ ।
জংঘাযুগং পুংগবকেতুরব্যাত্ পাদৌ মমাব্যাত্সুরবংদ্যপাদঃ ॥
মহেশ্বরঃ পাতু দিনাদিযামে মাং মধ্যযামেঽবতু বামদেবঃ ।
ত্রিলোচনঃ পাতু তৃতীযযামে বৃষধ্বজঃ পাতু দিনাংত্যযামে ॥
পাযান্নিশাদৌ শশিশেখরো মাং গংগাধরো রক্ষতু মাং নিশীথে ।
গৌরীপতিঃ পাতু নিশাবসানে মৃত্যুংজযো রক্ষতু সর্বকালম্ ॥
অংতঃস্থিতং রক্ষতু শংকরো মাং স্থাণুঃ সদা পাতু বহিঃস্থিতং মাম্ ।
তদংতরে পাতু পতিঃ পশূনাং সদাশিবো রক্ষতু মাং সমংতাত্ ॥
তিষ্ঠংতমব্যাদ্ ভুবনৈকনাথঃ পাযাদ্ব্রজংতং প্রমথাধিনাথঃ ।
বেদাংতবেদ্যোঽবতু মাং নিষণ্ণং মামব্যযঃ পাতু শিবঃ শযানম্ ॥
মার্গেষু মাং রক্ষতু নীলকংঠঃ শৈলাদিদুর্গেষু পুরত্রযারিঃ ।
অরণ্যবাসাদি মহাপ্রবাসে পাযান্মৃগব্যাধ উদারশক্তিঃ ॥
কল্পাংতকালোগ্রপটুপ্রকোপ- স্ফুটাট্টহাসোচ্চলিতাংডকোশঃ ।
ঘোরারিসেনার্ণব দুর্নিবার- মহাভযাদ্রক্ষতু বীরভদ্রঃ ॥
পত্ত্যশ্বমাতংগরথাবরূথিনী- সহস্রলক্ষাযুত কোটিভীষণম্ ।
অক্ষৌহিণীনাং শতমাততাযিনাং ছিংদ্যান্মৃডো ঘোরকুঠার ধারযা ॥
নিহংতু দস্যূন্প্রলযানলার্চিঃ জ্বলত্ত্রিশূলং ত্রিপুরাংতকস্য । শার্দূলসিংহর্ক্ষবৃকাদিহিংস্রান্ সংত্রাসযত্বীশধনুঃ পিনাকঃ ॥
দুঃ স্বপ্ন দুঃ শকুন দুর্গতি দৌর্মনস্য- দুর্ভিক্ষ দুর্ব্যসন দুঃসহ দুর্যশাংসি । উত্পাততাপবিষভীতিমসদ্গ্রহার্তিং ব্যাধীংশ্চ নাশযতু মে জগতামধীশঃ ॥
ওং নমো ভগবতে সদাশিবায
সকলতত্বাত্মকায সর্বমংত্রস্বরূপায সর্বযংত্রাধিষ্ঠিতায সর্বতংত্রস্বরূপায সর্বতত্ববিদূরায ব্রহ্মরুদ্রাবতারিণে নীলকংঠায পার্বতীমনোহরপ্রিযায সোমসূর্যাগ্নিলোচনায ভস্মোদ্ধূলিতবিগ্রহায মহামণি মুকুটধারণায মাণিক্যভূষণায সৃষ্টিস্থিতিপ্রলযকাল- রৌদ্রাবতারায দক্ষাধ্বরধ্বংসকায মহাকালভেদনায মূলধারৈকনিলযায তত্বাতীতায গংগাধরায সর্বদেবাদিদেবায ষডাশ্রযায বেদাংতসারায ত্রিবর্গসাধনায অনংতকোটিব্রহ্মাংডনাযকায অনংত বাসুকি তক্ষক- কর্কোটক শংখ কুলিক- পদ্ম মহাপদ্মেতি- অষ্টমহানাগকুলভূষণায প্রণবস্বরূপায চিদাকাশায আকাশ দিক্ স্বরূপায গ্রহনক্ষত্রমালিনে সকলায কলংকরহিতায সকললোকৈককর্ত্রে সকললোকৈকভর্ত্রে সকললোকৈকসংহর্ত্রে সকললোকৈকগুরবে সকললোকৈকসাক্ষিণে সকলনিগমগুহ্যায সকলবেদাংতপারগায সকললোকৈকবরপ্রদায সকললোকৈকশংকরায সকলদুরিতার্তিভংজনায সকলজগদভযংকরায শশাংকশেখরায শাশ্বতনিজাবাসায নিরাকারায নিরাভাসায নিরামযায নির্মলায নির্মদায নিশ্চিংতায নিরহংকারায নিরংকুশায নিষ্কলংকায নির্গুণায নিষ্কামায নিরূপপ্লবায নিরুপদ্রবায নিরবদ্যায নিরংতরায নিষ্কারণায নিরাতংকায নিষ্প্রপংচায নিস্সংগায নির্দ্বংদ্বায নিরাধারায নীরাগায নিষ্ক্রোধায নির্লোপায নিষ্পাপায নির্ভযায নির্বিকল্পায নির্ভেদায নিষ্ক্রিযায নিস্তুলায নিঃসংশযায নিরংজনায নিরুপমবিভবায নিত্যশুদ্ধবুদ্ধমুক্তপরিপূর্ণ- সচ্চিদানংদাদ্বযায পরমশাংতস্বরূপায পরমশাংতপ্রকাশায তেজোরূপায তেজোমযায তেজোঽধিপতযে জয জয রুদ্র মহারুদ্র মহারৌদ্র ভদ্রাবতার মহাভৈরব কালভৈরব কল্পাংতভৈরব কপালমালাধর খট্বাংগ চর্মখড্গধর পাশাংকুশ- ডমরূশূল চাপবাণগদাশক্তিভিংদিপাল- তোমর মুসল মুদ্গর পাশ পরিঘ- ভুশুংডী শতঘ্নী চক্রাদ্যাযুধভীষণাকার- সহস্রমুখদংষ্ট্রাকরালবদন বিকটাট্টহাস বিস্ফারিত ব্রহ্মাংডমংডল নাগেংদ্রকুংডল নাগেংদ্রহার নাগেংদ্রবলয নাগেংদ্রচর্মধর নাগেংদ্রনিকেতন মৃত্যুংজয ত্র্যংবক ত্রিপুরাংতক বিশ্বরূপ বিরূপাক্ষ বিশ্বেশ্বর বৃষভবাহন বিষবিভূষণ বিশ্বতোমুখ সর্বতোমুখ মাং রক্ষ রক্ষ জ্বলজ্বল প্রজ্বল প্রজ্বল মহামৃত্যুভযং শময শময অপমৃত্যুভযং নাশয নাশয রোগভযং উত্সাদযোত্সাদয বিষসর্পভযং শময শময চোরান্ মারয মারয মম শত্রূন্ উচ্চাটযোচ্চাটয ত্রিশূলেন বিদারয বিদারয কুঠারেণ ভিংধি ভিংধি খড্গেন ছিংদ্দি ছিংদ্দি খট্বাংগেন বিপোধয বিপোধয মুসলেন নিষ্পেষয নিষ্পেষয বাণৈঃ সংতাডয সংতাডয যক্ষ রক্ষাংসি ভীষয ভীষয অশেষ ভূতান্ বিদ্রাবয বিদ্রাবয কূষ্মাংডভূতবেতালমারীগণ- ব্রহ্মরাক্ষসগণান্ সংত্রাসয সংত্রাসয মম অভযং কুরু কুরু মম পাপং শোধয শোধয বিত্রস্তং মাং আশ্বাসয আশ্বাসয নরকমহাভযান্ মাং উদ্ধর উদ্ধর অমৃতকটাক্ষবীক্ষণেন মাং- আলোকয আলোকয সংজীবয সংজীবয ক্ষুত্তৃষ্ণার্তং মাং আপ্যাযয আপ্যাযয দুঃখাতুরং মাং আনংদয আনংদয শিবকবচেন মাং আচ্ছাদয আচ্ছাদয
হর হর মৃত্যুংজয ত্র্যংবক সদাশিব পরমশিব নমস্তে নমস্তে নমঃ ॥
পূর্ববত্ - হৃদযাদি ন্যাসঃ ।
পংচপূজা ॥
ভূর্ভুবস্সুবরোমিতি দিগ্বিমোকঃ ॥
ফলশ্রুতিঃ
ঋষভ উবাচ ইত্যেতত্পরমং শৈবং কবচং ব্যাহৃতং মযা ।
সর্ব বাধা প্রশমনং রহস্যং সর্ব দেহিনাম্ ॥
যঃ সদা ধারযেন্মর্ত্যঃ শৈবং কবচমুত্তমম্ ।
ন তস্য জাযতে কাপি ভযং শংভোরনুগ্রহাত্ ॥
ক্ষীণাযুঃ প্রাপ্তমৃত্যুর্বা মহারোগহতোঽপি বা ।
সদ্যঃ সুখমবাপ্নোতি দীর্ঘমাযুশ্চ বিংদতি ॥
সর্বদারিদ্রযশমনং সৌমাংগল্যবিবর্ধনম্ ।
যো ধত্তে কবচং শৈবং স দেবৈরপি পূজ্যতে ॥
মহাপাতকসংঘাতৈর্মুচ্যতে চোপপাতকৈঃ ।
দেহাংতে মুক্তিমাপ্নোতি শিববর্মানুভাবতঃ ॥
ত্বমপি শ্রদ্দযা বত্স শৈবং কবচমুত্তমম্ ।
ধারযস্ব মযা দত্তং সদ্যঃ শ্রেযো হ্যবাপ্স্যসি ॥
শ্রীসূত উবাচ
ইত্যুক্ত্বা ঋষভো যোগী তস্মৈ পার্থিব সূনবে ।
দদৌ শংখং মহারাবং খড্গং চ অরিনিষূদনম্ ॥
পুনশ্চ ভস্ম সংমংত্র্য তদংগং পরিতোঽস্পৃশত্ ।
গজানাং ষট্সহস্রস্য ত্রিগুণস্য বলং দদৌ ॥
ভস্মপ্রভাবাত্ সংপ্রাপ্তবলৈশ্বর্য ধৃতি স্মৃতিঃ ।
স রাজপুত্রঃ শুশুভে শরদর্ক ইব শ্রিযা ॥
তমাহ প্রাংজলিং ভূযঃ স যোগী নৃপনংদনম্ ।
এষ খড্গো মযা দত্তস্তপোমংত্রানুভাবতঃ ॥
শিতধারমিমং খড্গং যস্মৈ দর্শযসে স্ফুটম্ ।
স সদ্যো ম্রিযতে শত্রুঃ সাক্ষান্মৃত্যুরপি স্বযম্ ॥
অস্য শংখস্য নির্হ্রাদং যে শৃণ্বংতি তবাহিতাঃ ।
তে মূর্চ্ছিতাঃ পতিষ্যংতি ন্যস্তশস্ত্রা বিচেতনাঃ ॥
খড্গশংখাবিমৌ দিব্যৌ পরসৈন্যবিনাশকৌ ।
আত্মসৈন্যস্বপক্ষাণাং শৌর্যতেজোবিবর্ধনৌ ॥
এতযোশ্চ প্রভাবেন শৈবেন কবচেন চ ।
দ্বিষট্সহস্র নাগানাং বলেন মহতাপি চ ॥
ভস্মধারণ সামর্থ্যাচ্ছত্রুসৈন্যং বিজেষ্যসে ।
প্রাপ্য সিংহাসনং পিত্র্যং গোপ্তাঽসি পৃথিবীমিমাম্ ॥
ইতি ভদ্রাযুষং সম্যগনুশাস্য সমাতৃকম্ ।
তাভ্যাং সংপূজিতঃ সোঽথ যোগী স্বৈরগতির্যযৌ ॥
ইতি শ্রীস্কাংদমহাপুরাণে ব্রহ্মোত্তরখংডে শিবকবচ প্রভাব বর্ণনং নাম দ্বাদশোঽধ্যাযঃ সংপূর্ণঃ ॥ ॥
#freepik_image
.jpg)
