বালমীকি রামায়ণ বালা কাণ্ড সরগা ১৫ (বাংলা) ekadashi24

 মেধাবী তু ততো ধ্যাত্বা

স কিঞ্চিদিদমুত্তরম্ ।
লব্ধসঞ্জ্ঞস্ততস্তং তু
বেদজ্ঞো নৃপমবব্রীত্ ॥1

ইষ্টিং তেঽহং করিষ্যামি
পুত্রীযাং পুত্রকারণাত্ ।
অথর্বশিরসি প্রোক্তৈঃ
মন্ত্রৈঃ সিদ্ধাং বিধানতঃ ॥2

ততঃ প্রারব্ধবানিষ্টিম্
পুত্রীযাং পুত্রকারণাত্ ।
জুহাব চাগ্নৌ তেজস্বী
মন্ত্রদৃষ্টেন কর্মণা ॥3

ততো দেবাঃ সগন্ধর্বাঃ
সিদ্ধাশ্চ পরমর্ষযঃ ।
ভাগপ্রতিগ্রহার্থং বৈ
সমবেতা যথাবিধি ॥4

তাঃ সমেত্য যথান্যাযম্
তস্মিন্ সদসি দেবতাঃ ।
অব্রুবন্ লোককর্ত্তারম্
ব্রহ্মাণং বচনং মহত্ ॥5

ভগবন্ ত্বত্প্রসাদেন
রাবণো নাম রাক্ষসঃ ।
সর্বান্নো বাধতে বীর্যাত্
শাসিতুং তং ন শক্নুমঃ ॥6

ত্বযা তস্মৈ বরো দত্তঃ
প্রীতেন ভগবন্ পুরা ।
মানযন্তশ্চ তং নিত্যম্
সর্বং তস্য ক্ষমামহে ॥7

উদ্বেজযতি লোকাংস্ত্রীন্
উচ্ছ্রিতান্ দ্বেষ্টি দুর্মতিঃ ।
শক্রং ত্রিদশরাজানম্
প্রধর্ষযিতুমিচ্ছতি ॥8

ঋষীন্ যক্ষান্ সগন্ধর্বান্
অসুরান্ ব্রাহ্মণাংস্তথা ।
অতিক্রামতি দুর্ধষো
বরদানেন মোহিতঃ ॥9

নৈনং সূর্যঃ প্রতপতি
পার্শ্বে বাতি ন মারুতঃ ।
চলোর্মিমালী তং দৃষ্ট্বা
সমুদ্রোঽপি ন কম্পতে ॥10

তন্মহন্নো ভযং তস্মাত্
রাক্ষসাদ্ঘোরদর্শনাত্ ।
বধার্থং তস্য ভগবন্
উপাযং কর্ত্তুমর্হসি ॥11

এবমুক্তঃ সুরৈঃ সর্বৈঃ
চিন্তযিত্বা ততোঽব্রবীত্ ॥12

হন্তাঽযং বিদিতস্তস্য
বধোপাযো দুরাত্মনঃ ।
তেন গন্ধর্বযক্ষাণাম্
দেবদানবরক্ষসাম্ ।
অবধ্যোঽস্মীতি বাগুক্তা
তথেত্যুক্তং চ তন্মযা ॥13

নাকীর্তযদবজ্ঞানাত্
তদ্রক্ষো মানুষাংস্তদা ।
তস্মাত্স মানুষাদ্বধ্যো
মৃত্যুর্নান্যোঽস্য বিদ্যতে ॥14

এতচ্ছ্রুত্বা প্রিযং বাক্যম্
ব্রহ্মণা সমুদাহৃতম্ ।
সর্বে মহর্ষযো দেবাঃ
প্রহৃষ্টাস্তেঽভবংস্তদা ॥15

এতস্মিন্নন্তরে বিষ্ণুঃ
উপযাতো মহাদ্যুতিঃ ।
শঙ্খচক্রগদাপাণিঃ
পীতবাসা জগত্পতিঃ ॥16

ব্রহ্মণা চ সমাগম্য
তত্র তস্থৌ সমাহিতঃ ।
তমব্রুবন্ সুরাঃ সর্বে
সমভিষ্টূয সন্নতাঃ ॥17

ত্বাং নিযোক্ষ্যামহে বিষ্ণো
লোকানাং হিতকাম্যযা ।
রাজ্ঞো দশরথস্য ত্বং
অযোধ্যাধিপতের্বিভোঃ ।
ধর্মজ্ঞস্য বদান্যস্য
মহর্ষিসমতেজসঃ ।
তস্য ভার্যাসু তিসৃষু
হ্রীশ্রীকীর্ত্যুপমাসু চ ।
বিষ্ণো পুত্রত্বমাগচ্ছ
কৃত্বাত্মানং চতুর্বিধম্ ॥18,19,20

তত্র ত্বং মানুষো ভূত্বা
প্রবৃদ্ধং লোককণ্টকম্ ।
অবধ্যং দৈবতৈর্বিষ্ণো
সমরে জহি রাবণম্ ॥21

স হি দেবান্ সগন্ধর্বান্
সিদ্ধাংশ্চ ঋষিসত্তমান্ ।
রাক্ষসো রাবণো মূর্খো
বীর্যোত্সেকেন বাধতে ॥22

ঋষযস্তু ততস্তেন
গন্ধর্বাপ্সরসস্তথা ।
ক্রীডন্তো নন্দনবনে
ক্রূরেণ কিল হিংসিতাঃ ॥23

বধার্থং বযমাযাতাঃ
তস্য বৈ মুনিভিঃ সহ ।
সিদ্ধগন্ধর্বযক্ষাশ্চ
ততস্ত্বাং শরণং গতাঃ ॥24

ত্বং গতিঃ পরমা দেব
সর্বেষাং নঃ পরন্তপ ।
বধায দেবশত্রূণাম্
নৃণাং লোকে মনঃ কুরু ॥25

এবমুক্তস্তু দেবেশো
বিষ্ণুস্ত্রিদশপুঙ্গবঃ ।
পিতামহপুরোগাংস্তান্
সর্বলোকনমস্কৃতঃ ।
অব্রবীত্ ত্রিদশান্ সর্বান্
সমেতান্ ধর্মসংহিতান্ ॥26

ভযং ত্যজত ভদ্রং বো
হিতার্থং যুধি রাবণম্ ।
সপুত্রপৌত্রং সামাত্যম্
সমিত্রজ্ঞাতিবান্ধবম্ ।
হত্বা ক্রূরং দুরাত্মানম্
দেবর্ষীণাং ভযাবহম্ ।
দশ বর্ষসহস্রাণি
দশবর্ষশতানি চ ।
বত্স্যামি মানুষে লোকে
পালযন্ পৃথিবীমিমাম্ ॥27,28

এবং দত্ত্বা বরং দেবো
দেবানাং বিষ্ণুরাত্মবান্ ।
মানুষে চিন্তযামাস
জন্মভূমিমথাত্মনঃ ॥29

ততঃ পদ্মপলাশাক্ষঃ
কৃত্বাত্মানং চতুর্বিধম্ ।
পিতরং রোচযামাস
তদা দশরথং নৃপম্ ॥30

ততো দেবর্ষিগন্ধর্বাঃ
সরুদ্রাঃ সাপ্সরোগণাঃ ।
স্তুতিভির্দিব্যরূপাভিঃ
তুষ্টুবুর্মধুসূদনম্ ॥31

তমুদ্ধতং রাবণমুগ্রতেজসং
প্রবৃদ্ধদর্পং ত্রিদশেশ্বরদ্বিষম্ ।
বিরাবণং সাধুতপস্বিকণ্টকং
তপস্বিনামুদ্ধর তং ভযাবহম্ ॥32

তমেব হত্বা সবলং সবান্ধবং
বিরাবণং রাবণমুগ্রপৌরুষম্ ।
স্বর্লোকমাগচ্ছ গতজ্বরশ্চিরং
সুরেন্দ্রগুপ্তং গতদোষকল্মষম্ ॥33

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে পঞ্চদশস্সর্গঃ॥