ততঃ প্রভাতে বিমলে
কৃত্বাহ্নিকমরিন্দমৌ ।
বিশ্বামিত্রং পুরস্কৃত্য
নদ্যাস্তীরমুপাগতৌ ॥1
তে চ সর্বে মহাত্মানো
মুনযঃ সংশিতব্রতাঃ ।
উপস্থাপ্য শুভাং নাবম্
বিশ্বামিত্রমথাব্রুবন্ ॥2
আরোহতু ভবান্নাবম্
রাজপুত্রপুরস্কৃতঃ ।
অরিষ্টং গচ্ছ পন্থানম্
মাভূত্কালবিপর্যযঃ ॥3
বিশ্বামিত্রস্তথেত্যুক্ত্বা
তানৃষীনভিপূজ্য চ ।
ততার সহিতস্তাভ্যাম্
সরিতং সাগরঙ্গমাম্ ॥4
ততঃ শুশ্রাব বৈ শব্দং
অতিসংরম্ভবর্ধিতম্ ।
মধ্যমাগম্য তোযস্য
সহ রামঃ কনীযসা ॥5
অথ রামঃ সরিন্মধ্যে
পপ্রচ্ছ মুনিপুঙ্গবম্ ।
বারিণো ভিদ্যমানস্য
কিমযং তুমুলো ধ্বনিঃ ॥6
রাঘবস্য বচঃ শ্রুত্বা
কৌতূহলসমন্বিতঃ ।
কথযামাস ধর্মাত্মা
তস্য শব্দস্য নিশ্চযম্ ॥7
কৈলাসপর্বতে রাম
মনসা নির্মিতং সরঃ ।
ব্রহ্মণা নরশার্দূল
তেনেদং মানসং সরঃ ॥8
তস্মাত্সুস্রাব সরসঃ
সাঽযোধ্যামুপগূহতে ।
সরঃপ্রবৃত্তা সরযূঃ
পুণ্যা ব্রহ্মসরশ্চ্যুতা ॥9
তস্যাযমতুলঃ শব্দো
জাহ্নবীমভিবর্ততে ।
বারিসঙ্ক্ষোভজো রাম
প্রণামং নিযতঃ কুরু ॥10
তাভ্যাং তু তাবুভৌ কৃত্বা
প্রণামমতিধার্মিকৌ ।
তীরং দক্ষিণমাসাদ্য
জগ্মতুর্লঘুবিক্রমৌ ॥11
স বনং ঘোরসঙ্কাশম্
দৃষ্ট্বা নৃপবরাত্মজঃ ।
অবিপ্রহতমৈক্ষ্বাকঃ
পপ্রচ্ছ মুনিপুঙ্গবম্ ॥12
অহো বনমিদং দুর্গম্
ঝিল্লিকাগণনাদিতম্ ।
ভৈরবৈঃ শ্বাপদৈঃ পূর্ণম্
শকুন্তৈর্দারুণারুতৈঃ ॥13
নানাপ্রকারৈঃ শকুনৈঃ
বাশ্যদ্ভির্ভৈরবৈঃ স্বনৈঃ ।
সিংহব্যাঘ্রবরাহৈশ্চ
বারণৈশ্চোপশোভিতম্ ॥14
ধবাশ্বকর্ণককুভৈঃ
বিল্বতিন্দুকপাটলৈঃ ।
সঙ্কীর্ণং বদরীভিশ্চ
কিং ন্বেতদ্দারুণং বনম্ ॥15
তমুবাচ মহাতেজা
বিশ্বামিত্রো মহামুনিঃ ।
শ্রূযতাং বত্স কাকুত্স্থ
যস্যৈতদ্দারুণং বনম্ ॥16
এতৌ জনপদৌ স্ফীতৌ
পূর্বমাস্তাং নরোত্তম ।
মলদাশ্চ করূশাশ্চ
দেবনির্মাণনির্মিতৌ ॥17
পুরা বৃত্রবধে রাম
মলেন সমভিপ্লুতম্ ।
ক্ষুধা চৈব সহস্রাক্ষম্
ব্রহ্মহত্যা সমাবিশত্ ॥18
তমিন্দ্রং স্নাপযন্ দেবা
ঋষযশ্চ তপোধনাঃ ।
কলশৈঃ স্নাপযামাসুঃ
মলং চাস্য প্রমোচযন্ ॥19
ইহ ভূম্যাং মলং দত্ত্বা
দত্ত্বা কারূশমেব চ ।
শরীরজং মহেন্দ্রস্য
ততো হর্ষং প্রপেদিরে ॥20
নির্মলো নিষ্করূশশ্চ
শুচিরিন্দ্রো যদাঽভবত্ ।
দদৌ দেশস্য সুপ্রীতো
বরং প্রভুরনুত্তমম্ ॥21
ইমৌ জনপদৌ স্ফীতৌ
খ্যাতিং লোকে গমিষ্যতঃ ।
মলদাশ্চ করূশাশ্চ
মমাঙ্গমলধারিণৌ ॥22
সাধু সাধ্বিতি তং দেবাঃ
পাকশাসনমব্রুবন্ ।
দেশস্য পূজাং তাং দৃষ্ট্বা
কৃতাং শক্রেণ ধীমতা ॥23
এতৌ জনপদৌ স্ফীতৌ
দীর্ঘকালমরিন্দম ।
মলদাশ্চ করূশাশ্চ
মুদিতৌ ধনধান্যতঃ ॥24
কস্যচিত্ত্বথ কালস্য
যক্ষী বৈ কামরূপিণী ।
বলং নাগসহস্রস্য
ধারযন্তী তদা হ্যভূত্ ।
তাটকা নাম ভদ্রং তে
ভার্যা সুন্দস্য ধীমতঃ ।
মারীচো রাক্ষসঃ পুত্রো
যস্যাঃ শক্রপরাক্রমঃ ॥25,26
বৃত্তবাহুর্মহাবীর্যো
বিপুলাস্যতনুর্মহান্ ।
রাক্ষসো ভৈরবাকারো
নিত্যং ত্রাসযতে প্রজাঃ ॥27
ইমৌ জনপদৌ নিত্যম্
বিনাশযতি রাঘব ।
মলদাংশ্চ করূশাংশ্চ
তাটকা দুষ্টচারিণী ॥28
সেযং পন্থানমাবার্য
বসত্যত্যর্ধযোজনে ।
অত এব চ গন্তব্যম্
তাটকাযা বনং যতঃ ॥29
স্ববাহুবলমাশ্রিত্য
জহীমাং দুষ্টচারিণীম্ ।
মন্নিযোগাদিমং দেশম্
কুরু নিষ্কণ্টকং পুনঃ ॥30
ন হি কশ্চিদিমং দেশম্
শক্নোত্যাগন্তুমীদৃশম্ ।
যক্ষিণ্যা ঘোরযা রাম
উত্সাদিতমসহ্যযা ॥31
এতত্তে সর্বমাখ্যাতম্
যথৈতদ্দারুণং বনম্ ।
যক্ষ্যা চোত্সাদিতং সর্বম্
অদ্যাপি ন নিবর্ততে ॥32
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে চতুর্বিংশস্সর্গঃ॥
