নারদস্য তু তদ্বাক্যম্
শ্রুত্বা বাক্যবিশারদঃ ।
পূজযামাস ধর্মাত্মা
সহশিষ্যো মহামুনিম্ ॥
যথাবত্পূজিতস্তেন
দেবর্ষির্নারদস্তদা ।
আপৃষ্ট্বৈবাভ্যনুজ্ঞাতঃ
স জগাম বিহাযসম্ ॥
স মুহূর্তং গতে তস্মিন্
দেবলোকং মুনিস্তদা ।
জগাম তমসাতীরম্
জাহ্নব্যাস্ত্ববিদূরতঃ ॥
স তু তীরং সমাসাদ্য
তমসাযা মুনিস্তদা ।
শিষ্যমাহ স্থিতং পার্শ্বে
দৃষ্ট্বা তীর্থমকর্দমম্ ॥
অকর্দমমিদং তীর্থম্
ভরদ্বাজ নিশাময ।
রমণীযং প্রসন্নাম্বু
সন্মনুষ্যমনো যথা ॥
ন্যস্যতাং কলশস্তাত
দীযতাং বল্কলং মম ।
ইদমেবাবগাহিষ্যে
তমসাতীর্থমুত্তমম্ ॥
এবমুক্তো ভরদ্বাজো
বাল্মীকেন মহাত্মনা ।
প্রাযচ্ছত মুনেস্তস্য
বল্কলং নিযতো গুরোঃ ॥
স শিষ্যহস্তাদাদায
বল্কলং নিযতেন্দ্রিযঃ ।
বিচচার হ পশ্যংস্তত্
সর্বতো বিপুলং বনম্ ॥
তস্যাভ্যাশে তু মিথুনম্
চরন্তমনপাযিনম্ ।
দদর্শ ভগবাংস্তত্র
ক্রৌঞ্চযোশ্চারুনিঃস্বনম্ ॥
তস্মাত্তু মিথুনাদেকম্
পুমাংসং পাপনিশ্চযঃ ।
জঘান বৈরনিলযো
নিষাদস্তস্য পশ্যতঃ ॥
তং শোণিতপরীতাঙ্গম্
বেষ্টমানং মহীতলে ।
ভার্যা তু নিহতং দৃষ্ট্বা
রুরাব করুণাং গিরম্ ।
বিযুক্তা পতিনা তেন
দ্বিজেন সহচারিণা ।
তাম্রশীর্ষেণ মত্তেন
পত্রিণা সহিতেন বৈ ॥
তথা তু তং দ্বিজং দৃষ্ট্বাম্
নিষাদেন নিপাতিতম্ ।
ঋষের্ধর্মাত্মনস্তস্য
কারুণ্যং সমপদ্যত ॥
ততঃ করুণবেদিত্বাত্
অধর্মোঽযমিতি দ্বিজঃ ।
নিশাম্য রুদতীং ক্রৌঞ্চীম্
ইদং বচনমব্রবীত্ ॥
মা নিষাদ প্রতিষ্ঠাং ত্বং
অগমশ্শাশ্বতীস্সমাঃ ।
যত্ক্রৌঞ্চমিথুনাদেকম্
অবধীঃ কামমোহিতম্ ॥
তস্যৈবং ব্রুবতশ্চিন্তা
বভূব হৃদি বীক্ষতঃ ।
শোকার্তেনাস্য শকুনেঃ
কিমিদং ব্যাহৃতং মযা ॥
চিন্তযন্ স মহাপ্রাজ্ঞঃ
চকার মতিমান্ মতিম্ ।
শিষ্যং চৈবাব্রবীদ্বাক্যম্
ইদং স মুনিপুঙ্গবঃ ॥
পাদবদ্ধোঽক্ষরসমঃ
তন্ত্রীলযসমন্বিতঃ ।
শোকার্তস্য প্রবৃত্তো মে
শ্লোকো ভবতু নান্যথা ॥
শিষ্যস্তু তস্য ব্রুবতো
মুনের্বাক্যমনুত্তমম্ ।
প্রতিজগ্রাহ সন্তুষ্টঃ
তস্য তুষ্টোঽভবদ্গুরুঃ ॥
সোঽভিষেকং ততঃ কৃত্বা
তীর্থে তস্মিন্ যথাবিধি ।
তমেব চিন্তযন্নর্থম্
উপাবর্তত বৈ মুনিঃ ॥
ভরদ্বাজস্ততশ্শিষ্যো
বিনীতশ্শ্রুতবান্ মুনেঃ ।
কলশং পূর্ণমাদায
পৃষ্ঠতোঽনুজগাম হ ॥
স প্রবিশ্যাশ্রমপদম্
শিষ্যেণ সহ ধর্মবিত্ ।
উপবিষ্টঃ কথাশ্চান্যাঃ
চকার ধ্যানমাস্থিতঃ ॥
আজগাম ততো ব্রহ্মা
লোককর্ত্তা স্বযং প্রভুঃ ।
চতুর্মুখো মহাতেজা
দ্রষ্টুং তং মুনিপুঙ্গবম্ ॥
বাল্মীকিরথ তং দৃষ্ট্বা
সহসোত্থায বাগ্যতঃ ।
প্রাঞ্জলিঃ প্রযতো ভূত্বা
তস্থৌ পরমবিস্মিতঃ ॥
পূজযামাস তং দেবম্
পাদ্যার্ঘ্যাসনবন্দনৈঃ ।
প্রণম্য বিধিবচ্চৈনম্
পৃষ্ট্বা চৈব নিরামযম্ ॥
অথোপবিশ্য ভগবান্
আসনে পরমার্চিতে ।
বাল্মীকযে চ ঋষযে
সন্দিদেশাসনং ততঃ ॥
ব্রহ্মণা সমনুজ্ঞাতঃ
সোঽপ্যুপাবিশদাসনে ।
উপবিষ্টে তদা তস্মিন্
সাক্ষাল্লোকপিতামহে ।
তদ্গতেনৈব মনসা
বাল্মীকির্ধ্যানমাস্থিতঃ ॥
পাপাত্মনা কৃতং কষ্টম্
বৈরগ্রহণবুদ্ধিনা ।
যস্তাদৃশং চারুরবম্
ক্রৌঞ্চং হন্যাদকারণাত্ ॥
শোচন্নেব মুহুঃ ক্রৌঞ্চীম্
উপশ্লোকমিমং পুনঃ ।
জগাবন্তর্গতমনা
ভূত্বা শোকপরাযণঃ ॥
তমুবাচ ততো ব্রহ্মা
প্রহসন্ মুনিপুঙ্গবম্ ॥
শ্লোক এবাস্ত্বযং বদ্ধো
নাত্র কার্যা বিচারণা ।
মচ্ছন্দাদেব তে ব্রহ্মন্
প্রবৃত্তেযং সরস্বতী ।
রামস্য চরিতং কৃত্স্নম্
কুরু ত্বমৃষিসত্তম ॥
ধর্মাত্মনো গুণবতো
লোকে রামস্য ধীমতঃ ।
বৃত্তং কথয ধীরস্য
যথা তে নারদাচ্ছ্রুতম্ ॥
রহস্যং চ প্রকাশং চ
যদ্বৃত্তং তস্য ধীমতঃ ।
রামস্য সহসৌমিত্রেঃ
রাক্ষসানাং চ সর্বশঃ ।
বৈদেহ্যাশ্চৈব যদ্বৃত্তম্
প্রকাশং যদি বা রহঃ ।
তচ্চাপ্যবিদিতং সর্বম্
বিদিতং তে ভবিষ্যতি ॥
ন তে বাগনৃতা কাব্যে
কাচিদত্র ভবিষ্যতি ।
কুরু রামকথাং পুণ্যাম্
শ্লোকবদ্ধাং মনোরমাম্ ॥
যাবত্স্থাস্যন্তি গিরযঃ
সরিতশ্চ মহীতলে ।
তাবদ্রামাযণকথা
লোকেষু প্রচরিষ্যতি ॥
যাবদ্রামস্য চ কথা
ত্বত্কৃতা প্রচরিষ্যতি ।
তাবদূর্ধ্বমধশ্চ ত্বম্
মল্লোকেষু নিবত্স্যসি ॥
ইত্যুক্ত্বা ভগবান্ব্রহ্মা
তত্রৈবান্তরধীযত ।
ততস্সশিষ্যো ভগবান্
মুনির্বিস্মযমাযযৌ ॥
তস্য শিষ্যাস্ততঃ সর্বে
জগুশ্শ্লোকমিমং পুনঃ ।
মুহুর্মুহুঃ প্রীযমাণাঃ
প্রাহুশ্চ ভৃশবিস্মিতাঃ ॥
সমাক্ষরৈশ্চতুর্ভির্যঃ
পাদৈর্গীতো মহর্ষিণা ।
সোঽনুব্যাহরণাদ্ভূযঃ
শ্লোকশ্শ্লোকত্বমাগতঃ ॥
তস্য বুদ্ধিরিযং জাতা
মহর্ষের্ভাবিতাত্মনঃ ॥
কৃত্স্নং রামাযণং কাব্যম্
ঈদৃশৈঃ করবাণ্যহম্ ॥
উদারবৃত্তার্থপদৈর্মনোরমৈঃ
তদাস্য রামস্য চকারকীর্তিমান্ ।
সমাক্ষরৈশ্শ্লোকশতৈর্যশস্বিনো
যশস্করং কাব্যমুদারদর্শনঃ ॥
তদুপগতসমাসসন্ধিযোগং
সমমধুরোপনতার্থবাক্যবদ্ধম্ ।
রঘুবরচরিতং মুনিপ্রণীতং
দশশিরসশ্চ বধং নিশামযধ্বম্ ॥
ইত্যার্ষে শ্রীমদ্রামাযণে
বাল্মীকীযে আদিকাব্যে
বালকাণ্ডে দ্বিতীযস্সর্গঃ॥
#একাদশী২৪ # ekadashi24 #ramayan #bangla_ramayan
