শ্রুত্বা বস্তু সমগ্রং তত্
ধর্মাত্মা ধর্মসংহিতম্ ।
ব্যক্তমন্বেষতে ভূযো
যদ্বৃত্তং তস্য ধীমতঃ ॥১
উপস্পৃশ্যোদকং সম্যক্
মুনিস্স্থিত্বা কৃতাঞ্জলিঃ ।
প্রাচীনাগ্রেষু দর্ভেষু
ধর্মেণান্বেষতে গতিম্ ॥২
রামলক্ষ্মণসীতাভী
রাজ্ঞা দশরথেন চ ।
সভার্যেণ সরাষ্ট্রেণ
যত্ প্রাপ্তং তত্র তত্ত্বতঃ ।
হসিতং ভাষিতং চৈব
গতির্যা যচ্চ চেষ্টিতম্ ।
তত্সর্বং ধর্মবীর্যেণ
যথাবত্সম্প্রপশ্যতি ॥৩
স্ত্রীতৃতীযেন চ তথা
যত্প্রাপ্তং চরতা বনে ।
সত্যসন্ধেন রামেণ
তত্সর্বং চান্ববেক্ষিতম্ ॥৪
ততঃ পশ্যতি ধর্মাত্মা
তত্সর্বং যোগমাস্থিতঃ ।
পুরা যত্তত্র নির্বৃত্তম্
পাণাবামলকং যথা ॥৫
তত্সর্বং তত্ত্বতো দৃষ্ট্বা
ধর্মেণ স মহাদ্যুতিঃ ।
অভিরামস্য রামস্য
চরিতং কর্তুমুদ্যতঃ ।
কামার্থগুণসংযুক্তম্
ধর্মার্থগুণবিস্তরম্ ।
সমুদ্রমিব রত্নাঢ্যম্
সর্বশ্রুতিমনোহরম্ ॥৬
স যথা কথিতং পূর্বম্
নারদেন মহর্ষিণা ।
রঘুবংশস্য চরিতম্
চকার ভগবানৃষিঃ ॥৭
জন্ম রামস্য সুমহত্
বীর্যং সর্বানুকূলতাম্ ।
লোকস্য প্রিযতাং ক্ষান্তিম্
সৌম্যতাং সত্যশীলতাম্ ॥৮
নানাচিত্রকথাশ্চান্যা
বিশ্বামিত্রসমাগমে ।
জানক্যাশ্চ বিবাহং চ
ধনুষশ্চ বিভেদনম্ ॥৯
রামরামবিবাদং চ
গুণান্ দাশরথেস্তথা ।
তথাঽভিষেকং রামস্য
কৈকেয্যা দুষ্টভাবতাম্ ॥১০
বিঘাতং চাভিষেকস্য
রাঘবস্য বিবাসনম্ ।
রাজ্ঞঃ শোকবিলাপং চ
পরলোকস্য চাশ্রযম্ ॥১১
প্রকৃতীনাং বিষাদং চ
প্রকৃতীনাং বিসর্জনম্ ।
নিষাদাধিপসংবাদম্
সূতোপাবর্তনং তথা ॥১২
গঙ্গাযাশ্চাপি সন্তারম্
ভরদ্বাজস্য দর্শনম্ ।
ভরদ্বাজাভ্যনুজ্ঞানাত্
চিত্রকূটস্য দর্শনম্ ॥১৩
বাস্তুকর্ম নিবেশং চ
ভরতাগমনং তথা ।
প্রসাদনং চ রামস্য
পিতুশ্চ সলিলক্রিযাম্ ॥১৪
পাদুকাগ্র্যাভিষেকং চ
নন্দিগ্রামনিবাসনম্ ।
দণ্ডকারণ্যগমনম্
বিরাধস্য বধং তথা ॥১৫
দর্শনং শরভঙ্গস্য
সুতীক্ষ্ণেনাভিসঙ্গমম্ ।
অনসূযাসহাস্যাম -
প্যঙ্গরাগস্য চার্পণম্ ॥১৬
অগস্ত্যদর্শনং চৈব
জটাযোরভিসঙ্গমম্ ।
পঞ্চবট্যাশ্চ গমনম্
শূর্পণখ্যাশ্চ দর্শনম্ ॥১৭
শূর্পণখ্যাশ্চ সংবাদম্
বিরূপকরণং তথা ।
বধং খরত্রিশিরসোঃ
উত্থানং রাবণস্য চ ॥১৮
মারীচস্য বধং চৈব
বৈদেহ্যা হরণং তথা ।
রাঘবস্য বিলাপং চ
গৃধ্ররাজনিবর্হণম্ ॥১৯
কবন্ধদর্শনং চাপি
পম্পাযাশ্চাপি দর্শনম্ ।
শবর্যা দর্শনং চৈব
হনূমদ্দর্শনং তথা ॥২০
ঋশ্যমূকস্য গমনম্
সুগ্রীবেণ সমাগমম্ ।
প্রত্যযোত্পাদনং সখ্যম্
বালিসুগ্রীববিগ্রহম্ ॥২১
বালিপ্রমথনং চৈব
সুগ্রীবপ্রতিপাদনম্ ।
তারাবিলাপং সমযম্
বর্ষরাত্রনিবাসনম্ ॥২২
কোপং রাঘবসিংহস্য
বলানামুপসঙ্গ্রহম্ ।
দিশঃ প্রস্থাপনং চৈব
পৃথিব্যাশ্চ নিবেদনম্ ॥২৩
অঙ্গুলীযকদানং চ
ঋক্ষস্য বিলদর্শনম্ ।
প্রাযোপবেশনং চাপি
সম্পাতেশ্চাপি দর্শনম্ ॥২৪
পর্বতারোহণং চৈব
সাগরস্য চ লঙ্ঘনম্ ।
সমুদ্রবচনাচ্চৈব
মৈনাকস্য চ দর্শনম্ ॥২৫
সিংহিকাযাশ্চ নিধনম্
লঙ্কামলযদর্শনম্ ।
রাত্রৌ লঙ্কাপ্রবেশং চ
একস্য চ বিচিন্তনম্ ॥২৬
দর্শনং রাবণস্যাপি
পুষ্পকস্য চ দর্শনম্ ।
আপানভূমিগমনঃ
অবরোধস্য দর্শনম্ ॥২৭
অশোকবনিকাযানম্
সীতাযাশ্চপি দর্শনম্ ।
অভিজ্ঞানপ্রদানং চ
রাবণস্য চ দর্শনম্ ॥২৮
রাক্ষসীতর্জনং চৈব
ত্রিজটাস্বপ্নদর্শনম্ ।
মণিপ্রদানং সীতাযা
বৃক্ষভঙ্গং তথৈব চ ॥২৯
রাক্ষসীবিদ্রবং চৈব
কিঙ্করাণাং নিবর্হণম্ ।
গ্রহণং বাযুসূনোশ্চ লঙ্কাদাহাভিগর্জনম্ ॥৩০
গ্রহণং বাযুসূনোশ্চ লঙ্কাদাহাভিগর্জনম্ ॥৩০
প্রতিপ্লবনমেবাথ
মধূনাং হরণং তথা ।
রাঘবাশ্বাসনং চৈব মণিনির্যাতনং তথা ॥৩১
রাঘবাশ্বাসনং চৈব মণিনির্যাতনং তথা ॥৩১
সঙ্গমং চ সমুদ্রেণ
নলসেতোশ্চ বন্ধনম্ ।
প্রতারং চ সমুদ্রস্য
রাত্রৌ লঙ্কাবরোধনম্ ॥৩২
বিভীষণেন সংসর্গম্
বধোপাযনিবেদনম্ ।
কুম্ভকর্ণস্য নিধনম্
মেঘনাদনিবর্হণম্ ॥
রাবণস্য বিনাশং চ
সীতাবাপ্তিমরেঃ পুরে ।
বিভীষণাভিষেকং চ
পুষ্পকস্য চ দর্শনম্ ॥৩৩
অযোধ্যাযাশ্চ গমনম্
ভরতেন সমাগমম্ ।
রামাভিষেকাভ্যুদযম্
সর্বসৈন্যবিসর্জনম্ ।
স্বরাষ্ট্ররঞ্জনং চৈব
বৈদেহ্যাশ্চ বিসর্জনম্ ॥৩৪
অনাগতং চ যত্কিঞ্চিত্
রামস্য বসুধাতলে ।
তচ্চকারোত্তরে কাব্যে
বাল্মীকির্ভগবানৃষিঃ ॥৩৫
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে তৃতীযস্সর্গঃ॥৩৬
