বালমীকি রামায়ণ বালা কাণ্ড সরগা ১০ (বাংলা) ekadashi24

 সুমন্ত্রশ্চোদিতো রাজ্ঞা

প্রোবাচেদং বচস্তথা ।
যথর্শ্যশৃঙ্গস্ত্বানীতঃ
শৃণু মে মন্ত্রিভিঃ স হ ॥

রোমপাদমুবাচেদম্
সহামাত্য:পুরোহিত: ।
উপাযো নিরপাযোঽযং
অস্মাভিরভিচিন্তিতঃ ॥

ঋশ্যশৃঙ্গো বনচরঃ
তপঃস্বাধ্যাযনে রতঃ ।
অনভিজ্ঞঃ স নারীণাম্
বিষযাণাং সুখস্য চ ॥

ইন্দ্রিযার্থৈরভিমতৈঃ
নরচিত্তপ্রমাথিভিঃ ।
পুরমানাযযিষ্যামঃ
ক্ষিপ্রং চাধ্যবসীযতাম্ ॥

গণিকাস্তত্র গচ্ছন্তু
রূপবত্যঃ স্বলঙ্কৃতাঃ ।
প্রলোভ্য বিবিধোপাযৈঃ
আনেষ্যন্তীহ সত্কৃতাঃ ॥

শ্রুত্বা তথেতি রাজা চ
প্রত্যুবাচ পুরোহিতম্ ।
পুরোহিতো মন্ত্রিণশ্চ
তথা চক্রুশ্চ তে তদা ॥

বারমুখ্যাস্তু তচ্ছ্রুত্বা
বনং প্রবিবিশুর্মহত্ ।
আশ্রমস্যাবিদূরেঽস্মিন্
যত্নং কুর্বন্তি দর্শনে ।
ঋষিপুত্রস্য ধীরস্য
নিত্যমাশ্রমবাসিনঃ ॥

পিতুঃ স নিত্যসন্তুষ্টো
নাতিচক্রাম চাশ্রমাত্ ।
ন তেন জন্মপ্রভৃতি
দৃষ্টপূর্বং তপস্বিনা ।
স্ত্রী বা পুমান্ বা যচ্চান্যত্
সর্বং নগররাষ্ট্রজম্ ॥

ততঃ কদাচিত্তং দেশম্
আজগাম যদৃচ্ছযা ।
বিভণ্ডকসুতস্তত্র
তাশ্চাপশ্যদ্বরাঙ্গনাঃ ॥

তাশ্চিত্রবেষাঃ প্রমদা
গাযন্ত্যো মধুরস্বরা: ।
ঋষিপুত্রমুপাগম্য
সর্বা বচনমব্রুবন্ ॥

কস্ত্বং কিং বর্তসে ব্রহ্মন্
জ্ঞাতুমিচ্ছামহে বযম্ ।
একস্ত্বং বিজনে ঘোরে
বনে চরসি শংস নঃ ॥

অদৃষ্টরূপাস্তাস্তেন
কাম্যরূপা বনে স্ত্রিযঃ ।
হার্দাত্তস্য মতির্জাতা
হ্যাখ্যাতুং পিতরং স্বকম্ ॥

পিতা বিভণ্ডকোঽস্মাকম্
তস্যাহং সুত ঔরসঃ ।
ঋশ্যশৃঙ্গ ইতি খ্যাতম্
নাম কর্ম চ মে ভুবি ॥

ইহাশ্রমপদোঽস্মাকম্
সমীপে শুভদর্শনাঃ ।
করিষ্যে বোঽত্র পূজাং বৈ
সর্বেষাং বিধিপূর্বকম্ ॥

ঋষিপুত্রবচঃ শ্রুত্বা
সর্বাসাং মতিরাস বৈ ।
তদাশ্রমপদং দ্রষ্টুম্
জগ্মুঃ সর্বাশ্চ তেন তাঃ ॥

আগতানাং ততঃ পূজাং
ঋষিপুত্রশ্চকার হ ।
ইদমর্ঘ্যমিদং পাদ্যম্
ইদং মূলমিদং ফলম্ ॥

প্রতিগৃহ্য তু তাং পূজাম্
সর্বা এব সমুত্সুকাঃ ।
ঋষের্ভীতাস্তু শীঘ্রং তা
গমনায মতিং দধুঃ ॥

অস্মাকমপি মুখ্যানি
ফলানীমানি বৈ দ্বিজ ।
গৃহাণ প্রতি ভদ্রং তে
ভক্ষযস্ব চ মা চিরম্ ॥

ততস্তাস্তং সমালিঙ্গ্য
সর্বা হর্ষসমন্বিতাঃ ।
মোদকান্ প্রদদুস্তস্মৈ
ভক্ষাংশ্চ বিবিধান্ শুভান্ ॥

তানি চাস্বাদ্য তেজস্বী
ফলানীতি স্ম মন্যতে ।
অনাস্বাদিতপূর্বাণি
বনে নিত্যনিবাসিনাম্ ॥

আপৃচ্ছ্য তু তদা বিপ্রম্
ব্রতচর্যাং নিবেদ্য চ ।
গচ্ছন্তি স্মাপদেশাত্তাঃ
ভীতাস্তস্য পিতুঃ স্ত্রিযঃ ॥

গতাসু তাসু সর্বাসু
কাশ্যপস্যাত্মজো দ্বিজঃ ।
অস্বস্থহৃদযশ্চাসীত্
দুখং স্ম পরিবর্ততে ॥

ততোঽপরেদ্যুস্তং দেশম্
আজগাম স বীর্যবান্ ।
মনোজ্ঞা যত্র তা দৃষ্টা
বারমুখ্যাঃ স্বলঙ্কৃতাঃ ॥

দৃষ্ট্বৈব তাস্তদা বিপ্রম্
আযান্তং হৃষ্টমানসাঃ ।
উপসৃত্য ততঃ সর্বাঃ
তাস্তমূচুরিদং বচঃ ॥

এহ্যাশ্রমপদং সৌম্য
হ্যস্মাকমিতি চাব্রুবন্ ।
তত্রাপ্যেষ বিধিঃ শ্রীমান্
বিশেষেণ ভবিষ্যতি ॥

শ্রুত্বা তু বচনং তাসাম্
সর্বাসাং হৃদযঙ্গমম্ ।
গমনায মতিং চক্রে
তং চ নিন্যুস্তদা স্ত্রিযঃ ॥

তত্র চানীযমানে তু
বিপ্রে তস্মিন্ মহাত্মনি ।
ববর্ষ সহসা দেবো
জগত্প্রহ্লাদযংস্তদা ॥

হর্ষেণৈবাগতং বিপ্রম্
বিষযং স্বং নরাধিপঃ ।
প্রত্যুদ্গম্য মুনিং প্রহ্বঃ
শিরসা চ মহীং গতঃ ॥

অর্ঘ্যং চ প্রদদৌ তস্মৈ
ন্যাযতঃ সুসমাহিতঃ ।
বব্রে প্রসাদং বিপ্রেন্দ্রান্
মা বিপ্রং মন্যুরাবিশত্ ॥

অন্তঃপুরং প্রবিশ্যাস্মৈ
কন্যাং দত্ত্বা যথাবিধি ।
শান্তাং শান্তেন মনসা
রাজা হর্ষমবাপ সঃ ॥

এবং স ন্যবসত্তত্র
সর্বকামৈঃ সুপূজিতঃ ।
ঋশ্যশৃঙ্গো মহাতেজাঃ
শান্তযা সহ ভার্যযা ॥

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে দশমস্সর্গঃ॥

#ekadashi24