বালমীকি রামায়ণ বালা কাণ্ড সরগা ৯ (বাংলা) ekadashi24

  এতচ্ছ্রুত্বা রহঃ সূতো

রাজানমিদমব্রবীত্ ।
ঋত্বিগ্ভিরুপদিষ্টোঽযম্
পুরাবৃত্তো মযা শ্রুতঃ ॥

সনত্কুমারো ভগবান্
পূর্বং কথিতবান্ কথাম্ ।
ঋষীণাং সন্নিধৌ রাজন্
তব পুত্রাগমং প্রতি ॥

কাশ্যপস্য চ পুত্রোঽস্তি
বিভণ্ডক ইতি শ্রুতঃ ।
ঋশ্যশৃঙ্গ ইতি খ্যাতঃ
তস্য পুত্রো ভবিষ্যতি ॥

স বনে নিত্যসংবৃদ্ধো
মুনির্বনচরঃ সদা ।
নান্যং জানাতি বিপ্রেন্দ্রো
নিত্যং পিত্রনুবর্তনাত্ ॥

দ্বৈবিধ্যং ব্রহ্মচর্যস্য
ভবিষ্যতি মহাত্মনঃ ।
লোকেষু প্রথিতং রাজন্
বিপ্রৈশ্চ কথিতং সদা ॥

তস্যৈবং বর্তমানস্য
কালঃ সমভিবর্তত ।
অগ্নিং শুশ্রূষমাণস্য
পিতরং চ যশস্বিনম্ ॥

এতস্মিন্নেব কালে তু
রোমপাদঃ প্রতাপবান্ ।
অঙ্গেষু প্রথিতো রাজা
ভবিষ্যতি মহাবলঃ ॥

তস্য ব্যতিক্রমাদ্রাজ্ঞো
ভবিষ্যতি সুদারুণা ।
অনাবৃষ্টিস্সুঘোরা বৈ
সর্বভূতভযাবহা ॥

অনাবৃষ্ট্যাং তু বৃত্তাযাম্
রাজা দুঃখসমন্বিতঃ ।
ব্রাহ্মণান্ শ্রুতবৃদ্ধাংশ্চ
সমানীয প্রবক্ষ্যতি ॥

ভবন্তঃ শ্রুতধর্মাণো
লোকচারিত্রবেদিনঃ ।
সমাদিশন্তু নিযমম্
প্রাযশ্চিত্তং যথা ভবেত্ ॥

বক্ষ্যন্তি তে মহীপালম্
ব্রাহ্মণা বেদপারগাঃ ।
বিভণ্ডকসুতং রাজন্
সর্বোপাযৈরিহানয ॥

আনায্য চ মহীপাল
ঋশ্যশৃঙ্গং সুসত্কৃতম্ ।
প্রযচ্ছ কন্যাং শান্তাং বৈ
বিধিনা সুসমাহিতঃ ॥

তেষাং তু বচনং শ্রুত্বা
রাজা চিন্তাং প্রপত্স্যতে ।
কেনোপাযেন বৈ শক্যম্
ইহানেতুং স বীর্যবান্ ॥

ততো রাজা বিনিশ্চিত্য
সহ মন্ত্রিভিরাত্মবান্ ।
পুরোহিতমমাত্যাংশ্চ
ততঃ প্রেষ্যতি সত্কৃতান্ ॥

তে তু রাজ্ঞো বচঃ শ্রুত্বা
ব্যথিতা বিনতাননাঃ ।
ন গচ্ছেম ঋষের্ভীতা
অনুনেষ্যন্তি তং নৃপম্ ॥

বক্ষ্যন্তি চিন্তযিত্বা তে
তস্যোপাযাংশ্চ তত্ক্ষমান্ ।
আনেষ্যামো বযং বিপ্রম্
ন চ দোষো ভবিষ্যতি ॥

এবমঙ্গাধিপেনৈব
গণিকাভির্ঋষেঃ সুতঃ ।
আনীতোঽবর্ষযদ্দেবঃ
শান্তা চাস্মৈ প্রদীযতে ॥

ঋশ্যশৃঙ্গস্তু জামাতা
পুত্রান্ তব বিধাস্যতি ।
সনত্কুমারকথিতম্
এতাবদ্ব্যাহৃতং মযা ॥

অথ হৃষ্টো দশরথঃ
সুমন্ত্রং প্রত্যভাষত ।
যথর্শ্যশৃঙ্গস্ত্বানীতো
বিস্তরেণ ত্বযোচ্যতাম্ ॥

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে নবমস্সর্গঃ॥

#একাদশী২৪