বালমীকি রামায়ণ বালা কাণ্ড সরগা ১৩ (বাংলা) ekadashi24

 পুনঃ প্রাপ্তে বসন্তে তু

পূর্ণঃ সংবত্সরোঽভবত্ ।
প্রসবার্থং গতো যষ্টুম্
হযমেধেন বীর্যবান্ ॥

অভিবাদ্য বসিষ্ঠং চ
ন্যাযতঃ প্রতিপূজ্য চ ।
অব্রবীত্প্রশ্রিতং বাক্যম্
প্রসবার্থং দ্বিজোত্তমম্ ॥

যজ্ঞো মে ক্রিযতাং বিপ্র
যথোক্তং মুনিপুঙ্গব ।
যথা ন বিঘ্নঃ ক্রিযতে
যজ্ঞাঙ্গেষু বিধীযতাম্ ॥

ভবান্ স্নিগ্ধঃ সুহৃন্মহ্যম্
গুরুশ্চ পরমো মহান্ ।
বোঢব্যো ভবতা চৈব
ভারো যজ্ঞস্য চোদ্যতঃ ॥

তথেতি চ স রাজানং
অব্রবীদ্দ্বিজসত্তমঃ ।
করিষ্যে সর্বমেবৈতত্
ভবতা যত্সমর্থিতম্ ॥

ততোঽব্রবীদ্দ্বিজান্ বৃদ্ধান্
যজ্ঞকর্মসু নিষ্ঠিতান্ ।
স্থাপত্যে নিষ্ঠিতাংশ্চৈব
বৃদ্ধান্ পরমধার্মিকান্ ।
কর্মান্তিকান্ শিল্পকরান্
বর্দ্ধকীন্ খনকানপি ।
গণকান্ শিল্পিনশ্চৈব
তথৈব নটনর্তকান্ ।
তথা শুচীন্ শাস্ত্রবিদঃ
পুরুষান্ সুবহুশ্রুতান্ ॥

যজ্ঞকর্ম সমীহন্তাম্
ভবন্তো রাজশাসনাত্ ॥

ইষ্টকা বহুসাহস্রীঃ
শীঘ্রমানীযতামিতি ।
ঔপকার্যাঃ ক্রিযন্তাং চ
রাজ্ঞাং বহুগুণান্বিতাঃ ॥

ব্রাহ্মণাবসথাশ্চৈব
কর্তব্যাঃ শতশঃ শুভাঃ ।
ভক্ষ্যান্নপানৈর্বহুভিঃ
সমুপেতাঃ সুনিষ্ঠিতাঃ ॥

তথা পৌরজনস্যাপি
কর্ত্তব্যা বহুবিস্তরাঃ ।
আবাসা বহুভক্ষ্যা বৈ
সর্বকামৈরুপস্থিতাঃ ॥

তথা জানপদস্যাপি
জনস্য বহু শোভনম্ ।
দাতব্যমন্নং বিধিবত্
সত্কৃত্য ন তু লীলতা ॥

সর্ববর্ণা যথা পূজাম্
প্রাপ্নুবন্তি সুসত্কৃতাঃ ।
ন চাবজ্ঞা প্রযোক্তব্যা
কামক্রোধবশাদপি ॥

যজ্ঞকর্মণি যে ব্যগ্রাঃ
পুরুষাঃ শিল্পিনস্তথা ।
তেষামপি বিশেষেণ
পূজা কার্যা যথাক্রমম্ ।
তে চ স্যুঃ সম্ভৃতাঃ সর্বে
বসুভির্ভোজনেন চ ॥

যথা সর্বং সুবিহিতম্
ন কিঞ্চিত্ পরিহীযতে ।
তথা ভবন্তঃ কুর্বন্তু
প্রীতিস্নিগ্ধেন চেতসা ॥

ততঃ সর্বে সমাগম্য
বসিষ্ঠমিদমব্রুবন্ ।
যথোক্তং তত্সুবিহিতম্
ন কিঞ্চিত্ পরিহীযতে ।
যথোক্তং তত্করিষ্যামো
ন কিঞ্চিত্ পরিহীযতে ॥

ততঃ সুমন্ত্রমানীয
বসিষ্ঠো বাক্যমব্রবীত্ ।
নিমন্ত্রযস্ব নৃপতীন্
পৃথিব্যাং যে চ ধার্মিকাঃ ।
ব্রাহ্মণান্ ক্ষত্রিযান্ বৈশ্যান্
শূদ্রাংশ্চৈব সহস্রশঃ ।
সমানযস্ব সত্কৃত্য
সর্বদেশেষু মানবান্ ॥

মিথিলাধিপতিং শূরম্
জনকং সত্যবিক্রমম্ ।
নিষ্ঠিতং সর্বশাস্ত্রেষু
তথা বেদেষু নিষ্ঠিতম্ ।
তমানয মহাভাগম্
স্বযমেব সুসত্কৃতম্ ।
পূর্বসম্বন্ধিনং জ্ঞাত্বা
ততঃ পূর্বং ব্রবীমি তে ॥

তথা কাশীপতিং স্নিগ্ধম্
সততং প্রিযবাদিনম্ ।
বযস্যং রাজসিংহস্য
স্বযমেবানযস্ব হ ॥

তথা কেকযরাজানম্
বৃদ্ধং পরমধার্মিকম্ ।
শ্বশুরং রাজসিংহস্য
সপুত্রং ত্বমিহানয ॥

অঙ্গেশ্বরং মহাভাগম্
রোমপাদং সুসত্কৃতম্ ।
বযস্যং রাজসিংহস্য
সমানয যশস্বিনম্ ॥

প্রাচীনান্ সিন্ধুসৌবীরান্
সৌরাষ্ট্রেযাংশ্চ পার্থিবান্ ।
দাক্ষিণাত্যান্নরেন্দ্রাংশ্চ
সমস্তানানযস্ব হ ॥

সন্তি স্নিগ্ধাশ্চ যে চান্যে
রাজানঃ পৃথিবীতলে ।
তানানয যথাক্ষিপ্রম্
সানুগান্ সহ বান্ধবান্ ॥

বসিষ্ঠবাক্যং তচ্ছ্রুত্বা
সুমন্ত্রস্ত্বরিতস্তদা ।
ব্যাদিশত্পুরুষাংস্তত্র
রাজ্ঞামানযনে শুভান্ ॥

স্বযমেব হি ধর্মাত্মা
প্রযযৌ মুনিশাসনাত্ ।
সুমন্ত্রস্ত্বরিতো ভূত্বা
সমানেতুং মহীক্ষিতঃ ॥

তে চ কর্মান্তিকাঃ সর্বে
বসিষ্ঠায চ ধীমতে ।
সর্বং নিবেদযন্তি স্ম
যজ্ঞে যদুপকল্পিতম্ ॥

ততঃ প্রীতো দ্বিজশ্রেষ্ঠঃ
তান্ সর্বান্ পুনরব্রবীত্ ।
অবজ্ঞযা ন দাতব্যম্
কস্যচিল্লীলযাপি বা ।
অবজ্ঞযা কৃতং হন্যাত্
দাতারং নাত্র সংশযঃ ॥

ততঃ কৈশ্চিদহোরাত্রৈঃ
উপযাতা মহীক্ষিতঃ ।
বহূনি রত্নান্যাদায
রাজ্ঞো দশরথস্য হি ॥

ততো বসিষ্ঠঃ সুপ্রীতো
রাজানমিদমব্রবীত্ ॥

উপযাতা নরব্যাঘ্র
রাজানস্তব শাসনাত্ ।
মযাঽপি সত্কৃতাঃ সর্বে
যথার্হং রাজসত্তমাঃ ।
যজ্ঞিযং চ কৃতং রাজন্
পুরুষৈঃ সুসমাহিতৈঃ ।
নির্যাতু চ ভবান্ যষ্টুম্
যজ্ঞাযতনমন্তিকাত্ ॥

সর্বকামৈরুপহৃতৈঃ
উপেতং বৈ সমন্ততঃ ।
দ্রষ্টুমর্হসি রাজেন্দ্র
মনসেব বিনির্মিতম্ ॥

তথা বসিষ্ঠবচনাত্
ঋশ্যশৃঙ্গস্য চোভযোঃ ।
শুভে দিবসনক্ষত্রে
নির্যাতো জগতীপতিঃ ॥

ততো বসিষ্ঠপ্রমুখাঃ
সর্ব এব দ্বিজোত্তমাঃ ।
ঋশ্যশৃঙ্গং পুরস্কৃত্য
যজ্ঞকর্মারভংস্তদা ।
যজ্ঞবাটগতাঃ সর্বে
যথাশাস্ত্রং যথাবিধি ॥

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ত্রযোদশস্সর্গঃ॥

#ekadashi24