অথ সংবত্সরে পূর্ণে
তস্মিন্ প্রাপ্তে তুরঙ্গমে ।
সরয্বাশ্চোত্তরে তীরে
রাজ্ঞো যজ্ঞোঽভ্যবর্তত ॥
ঋশ্যশৃঙ্গং পুরস্কৃত্য
কর্ম চক্রুর্দ্বিজর্ষভাঃ ।
অশ্বমেধে মহাযজ্ঞে
রাজ্ঞোঽস্য সুমহাত্মনঃ ॥
কর্ম কুর্বন্তি বিধিবত্
যাজকা বেদপারগাঃ ।
যথাবিধি যথান্যাযম্
পরিক্রামন্তি শাস্ত্রতঃ ॥
প্রবর্গ্যং শাস্ত্রতঃ কৃত্বা
তথৈবোপসদং দ্বিজাঃ ।
চক্রুশ্চ বিধিবত্সর্বং
অধিকং কর্ম শাস্ত্রতঃ ॥
অভিপূজ্য ততো হৃষ্টাঃ
সর্বে চক্রুর্যথাবিধি ।
প্রাতঃসবনপূর্বাণি
কর্মাণি মুনিপুঙ্গবাঃ ॥
ঐন্দ্রশ্চ বিধিবদ্দত্তো
রাজা চাঽভিষ্টুতোঽনঘ: ।
মাধ্যন্দিনং চ সবনম্
প্রাবর্তত যথাক্রমম্ ॥
তৃতীযসবনং চৈব
রাজ্ঞোঽস্য সুমহাত্মনঃ ।
চক্রুস্তে শাস্ত্রতো দৃষ্ট্বা
তথা ব্রাহ্মণপুঙ্গবাঃ ॥
ন চাহুতমভূত্তত্র
স্খলিতং বাপি কিঞ্চন ।
দৃশ্যতে ব্রহ্মবত্সর্বম্
ক্ষেমযুক্তং হি চক্রিরে ॥
ন তেষ্বহস্সু শ্রান্তো বা
ক্ষুধিতো বাপি দৃশ্যতে ।
নাবিদ্বান্ ব্রাহ্মণস্তত্র
নাশতানুচরস্তথা ॥
ব্রাহ্মণা ভুঞ্জতে নিত্যম্
নাথবন্তশ্চ ভুঞ্জতে ।
তাপসা ভুঞ্জতে চাপি
শ্রমণা ভুঞ্জতে তথা ॥
বৃদ্ধাশ্চ ব্যাধিতাশ্চৈব
স্ত্রিযো বালাস্তথৈব চ ।
অনিশং ভুঞ্জমানানাম্
ন তৃপ্তিরুপলভ্যতে ॥
দীযতাং দীযতামন্নম্
বাসাংসি বিবিধানি চ ।
ইতি সঞ্চোদিতাস্তত্র
তথা চক্রুরনেকশঃ ॥
অন্নকূটাশ্চ বহবো
দৃশ্যন্তে পর্বতোপমাঃ ।
দিবসে দিবসে তত্র
সিদ্ধস্য বিধিবত্তদা ॥
নানাদেশাদনুপ্রাপ্তাঃ
পুরুষাঃ স্ত্রীগণাস্তথা ।
অন্নপানৈঃ সুবিহিতাঃ
তস্মিন্ যজ্ঞে মহাত্মনঃ ॥
অন্নং হি বিধিবত্স্বাদু
প্রশংসন্তি দ্বিজর্ষভাঃ ।
অহো তৃপ্তাঃ স্ম ভদ্রং তে
ইতি শুশ্রাব রাঘবঃ ॥
স্বলঙ্কৃতাশ্চ পুরুষা
ব্রাহ্মণান্ পর্যবেষযন্ ।
উপাসতে চ তানন্যে
সুমৃষ্টমণিকুণ্ডলাঃ ॥
কর্মান্তরে তদা বিপ্রা
হেতুবাদান্ বহূনপি ।
প্রাহুশ্চ বাগ্মিনো ধীরাঃ
পরস্পরজিগীষযা ॥
দিবসে দিবসে তত্র
সংস্তরে কুশলা দ্বিজাঃ ।
সর্বকর্মাণি চক্রুস্তে
যথাশাস্ত্রং প্রচোদিতাঃ ॥
নাষডঙ্গবিদত্রাসীত্
নাব্রতো নাবহুশ্রুতঃ ।
সদস্যাস্তস্য বৈ রাজ্ঞো
নাবাদকুশলা দ্বিজাঃ ॥
প্রাপ্তে যূপোচ্ছ্রযে তস্মিন্
ষড্বৈল্বাঃ খাদিরাস্তথা ।
তাবন্তো বিল্বসহিতাঃ
পর্ণিনশ্চ তথাঽপরে ।
শ্লেষ্মাতকমযস্ত্বেকো
দেবদারুমযস্তথা ।
দ্বাবেব তত্র বিহিতৌ
বাহুব্যস্তপরিগ্রহৌ ॥
কারিতাঃ সর্ব এবৈতে
শাস্ত্রজ্ঞৈর্যজ্ঞকোবিদৈঃ ।
শোভার্থং তস্য যজ্ঞস্য
কাঞ্চনালঙ্কৃতাঽভবন্ ॥
একবিংশতি যূপাস্তে
একবিংশত্যরত্নযঃ ।
বাসোভিরেকবিংশদ্ভিঃ
একৈকং সমলঙ্কৃতাঃ ॥
বিন্যস্তা বিধিবত্সর্বে
শিল্পিভিঃ সুকৃতা দৃঢাঃ ।
অষ্টাশ্রযঃ সর্ব এব
শ্লক্ষ্ণরূপসমন্বিতাঃ ॥
আচ্ছাদিতাস্তে বাসোভিঃ
পুষ্পৈর্গন্ধৈশ্চ পূজিতাঃ ।
সপ্তর্ষযো দীপ্তিমন্তো
বিরাজন্তে যথা দিবি ॥
ইষ্টকাশ্চ যথান্যাযম্
কারিতাশ্চ প্রমাণতঃ ।
চিতোঽগ্নির্ব্রাহ্মণৈস্তত্র
কুশলৈঃ শুল্বকর্মণি ॥
স চিত্যো রাজসিংহস্য
সঞ্চিতঃ কুশলৈর্দ্বিজৈঃ ।
গরুডো রুক্মপক্ষো বৈ
ত্রিগুণোঽষ্টাদশাত্মকঃ ॥
নিযুক্তাস্তত্র পশবঃ
তত্তদুদ্দিশ্য দৈবতম্ ।
উরগাঃ পক্ষিণশ্চৈব
যথাশাস্ত্রং প্রচোদিতাঃ ॥
শামিত্রে তু হযস্তত্র
তথা জলচরাশ্চ যে ।
ঋত্বিগ্ভিঃ সর্বমেবৈতত্
নিযুক্তং শাস্ত্রতস্তদা ॥
পশূনাং ত্রিশতং তত্র
যূপেষু নিযতং তদা ।
অশ্বরত্নোত্তমং তত্র
রাজ্ঞো দশরথস্য চ ॥
কৌসল্যা তং হযং তত্র
পরিচর্য সমন্ততঃ ।
কৃপাণৈর্বিশশাসৈনম্
ত্রিভিঃ পরমযা মুদা ॥
পতত্রিণা তদা সার্দ্ধম্
সুস্থিতেন চ চেতসা ।
অবসদ্রজনীমেকাম্
কৌসল্যা ধর্মকাম্যযা ॥
হোতাধ্বর্যুস্তথোদ্গাতা
হস্তেন সমযোজযন্ ।
মহিষ্যা পরিবৃত্ত্যা চ
বাবাতামপরাং তথা ॥
পতত্রিণস্তস্য বপাম্
উদ্ধৃত্য নিযতেন্দ্রিযঃ ।
ঋত্বিক্ পরমসম্পন্নঃ
শ্রপযামাস শাস্ত্রতঃ ॥
ধূমগন্ধং বপাযাস্তু
জিঘ্রতি স্ম নরাধিপঃ ।
যথাকালং যথান্যাযম্
নির্ণুদন্ পাপমাত্মনঃ ॥
হযস্য যানি চাঙ্গানি
তানি সর্বাণি ব্রাহ্মণাঃ ।
অগ্নৌ প্রাস্যন্তি বিধিবত্
সমন্ত্রাঃ ষোডশর্ত্বিজঃ ॥
প্লক্ষশাখাসু যজ্ঞানাং
অন্যেষাং ক্রিযতে হবিঃ ।
অশ্বমেধস্য যজ্ঞস্য
বৈতসো ভাগ ইষ্যতে ॥
ত্র্যহোঽশ্বমেধঃ সঙ্খ্যাতঃ
কল্পসূত্রেণ ব্রাহ্মণৈঃ ।
চতুষ্টোমমহস্তস্য
প্রথমং পরিকল্পিতম্ ।
উক্থ্যং দ্বিতীযং সঙ্খ্যাতং
অতিরাত্রং তথোত্তরম্ ।
কারিতাস্তত্র বহবো
বিহিতাঃ শাস্ত্রদর্শনাত্ ।
জ্যোতিষ্টোমাযুষী চৈবং
অতিরাত্রৌ বিনির্মিতৌ ।
অভিজিদ্বিশ্বজিচ্চৈবম্
আপ্তোর্যামো মহাক্রতুঃ ॥
প্রাচীং হোত্রে দদৌ রাজা
দিশং স্বকুলবর্দ্ধনঃ ।
অধ্বর্যবে প্রতীচীং তু
ব্রহ্মণে দক্ষিণাং দিশম্ ।
উদ্গাত্রে বৈ তথোদীচীম্
দক্ষিণৈষা বিনির্মিতা ।
হযমেধে মহাযজ্ঞে
স্বযম্ভূবিহিতে পুরা ॥
ক্রতুং সমাপ্য তু তথা
ন্যাযতঃ পুরুষর্ষভঃ ।
ঋত্বিগ্ভ্যো হি দদৌ রাজা
ধরাং তাং ক্রতুবর্দ্ধনঃ ॥
ঋত্বিজশ্চাব্রুবন্ সর্বে
রাজানং গতকল্মষম্ ।
ভবানেব মহীং কৃত্স্নাম্
একো রক্ষিতুমর্হতি ।
ন ভূম্যা কার্যমস্মাকম্
ন হি শক্তাঃ স্ম পালনে ।
রতাঃ স্বাধ্যাযকরণে
বযং নিত্যং হি ভূমিপ ।
নিষ্ক্রযং কিঞ্চিদেবেহ
প্রযচ্ছতু ভবানিতি ।
মণিরত্নং সুবর্ণং বা
গাবো যদ্বা সমুদ্যতম্ ।
তত্প্রযচ্ছ নরশ্রেষ্ঠ
ধরণ্যা ন প্রযোজনম্ ॥
এবমুক্তো নরপতিঃ
ব্রাহ্মণৈর্বেদপারগৈঃ ।
গবাং শতসহস্রাণি
দশ তেভ্যো দদৌ নৃপঃ ।
শতকোটীস্সুবর্ণস্য
রজতস্য চতুর্গুণম্ ॥
ঋত্বিজস্তু ততঃ সর্বে
প্রদদুঃ সহিতা বসু ।
ঋশ্যশৃঙ্গায মুনযে
বসিষ্ঠায চ ধীমতে ॥
ততস্তে ন্যাযতঃ কৃত্বা
প্রবিভাগং দ্বিজোত্তমাঃ ।
সুপ্রীতমনসস্সর্বে
প্রত্যূচুর্মুদিতা ভৃশম্ ॥
ততঃ প্রসর্পকেভ্যস্তু
হিরণ্যং সুসমাহিতঃ ।
জাম্বূনদং কোটিসঙ্খ্যম্
ব্রাহ্মণেভ্যো দদৌ তদা ॥
দরিদ্রায দ্বিজাযাথ
হস্তাভরণমুত্তমম্ ।
কস্মৈচিদ্যাচমানায
দদৌ রাঘবনন্দনঃ ॥
ততঃ প্রীতেষু নৃপতিঃ
দ্বিজেষু দ্বিজবত্সলঃ ।
প্রণামমকরোত্তেষাম্
হর্ষপর্যাকুলেক্ষণঃ ॥
তস্যাশিষোঽথ বিধিবত্
ব্রাহ্মণৈঃ সমুদাহৃতাঃ ।
উদারস্য নৃবীরস্য
ধরণ্যাং প্রণতস্য চ ॥
ততঃ প্রীতমনা রাজা
প্রাপ্য যজ্ঞমনুত্তমম্ ।
পাপাপহং স্বর্নযনম্
দুষ্করং পার্থিবর্ষভৈঃ ॥
ততোঽব্রবীদৃশ্যশৃঙ্গম্
রাজা দশরথস্তদা ।
কুলস্য বর্দ্ধনং ত্বং তু
কর্তুমর্হসি সুব্রত ॥
তথেতি চ স রাজানম্
উবাচ দ্বিজসত্তমঃ ।
ভবিষ্যন্তি সুতা রাজন্
চত্বারস্তে কুলোদ্বহাঃ ॥
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে চতুর্দশস্সর্গঃ॥
#ekadashi24
