বালমীকি রামায়ণ বালা কাণ্ড সরগা ১৬ (বাংলা) ekadashi24

  ততো নারাযণো দেব:
নিযুক্তঃ সুরসত্তমৈঃ ।
জানন্নপি সুরানেবম্
শ্লক্ষ্ণং বচনমব্রবীত্ ॥1
উপাযঃ কো বধে তস্য
রাক্ষসাধিপতেস্সুরাঃ ।
যমহং তং সমাস্থায
নিহন্যামৃষিকণ্টকম্ ॥2
এবমুক্তাঃ সুরাঃ সর্বে
প্রত্যূচুর্বিষ্ণুমব্যযম্ ॥3
মানুষীং তনুমাস্থায
রাবণং জহি সংযুগে ।
স হি তেপে তপস্তীব্রম্
দীর্ঘকালমরিন্দম ।
যেন তুষ্টোঽভবদ্ব্রহ্মা
লোককৃল্লোকপূর্বজঃ ॥4
সন্তুষ্টঃ প্রদদৌ তস্মৈ
রাক্ষসায বরং প্রভুঃ ।
নানাবিধেভ্যো ভূতেভ্যো
ভযং নান্যত্র মানুষাত্ ।
অবজ্ঞাতাঃ পুরা তেন
বরদানে হি মানবাঃ ॥5,6
এবং পিতামহাত্তস্মাত্
বরং প্রাপ্য স দর্পিতঃ ।
উত্সাদযতি লোকাংস্ত্রীন্
স্ত্রিযশ্চাপ্যবকর্ষতি ।
তস্মাত্তস্য বধো দৃষ্টো
মানুষেভ্যঃ পরন্তপ ॥7
ইত্যেতদ্বচনং শ্রুত্বা
সুরাণাং বিষ্ণুরাত্মবান্ ।
পিতরং রোচযামাস
তদা দশরথং নৃপম্ ॥8
স চাপ্যপুত্রো নৃপতিঃ
তস্মিন্ কালে মহাদ্যুতিঃ ।
অযজত্পুত্রিযামিষ্টিম্
পুত্রেপ্সুররিসূদনঃ ॥9
স কৃত্বা নিশ্চযং বিষ্ণুঃ
আমন্ত্র্য চ পিতামহম্ ।
অন্তর্ধানং গতো দেবৈঃ
পূজ্যমানো মহর্ষিভিঃ ॥10
ততো বৈ যজমানস্য
পাবকাদতুলপ্রভম্ ।
প্রাদুর্ভূতং মহদ্ভূতম্
মহাবীর্যং মহাবলম্ ।
কৃষ্ণরক্তাম্বরধরম্
রক্তাক্ষং দুন্দুভিস্বনম্ ।
স্নিগ্ধহর্যক্ষতনুজ -
শ্মশ্রুপ্রবরমূর্দ্ধজম্ ।
শুভলক্ষণসম্পন্নম্
দিব্যাভরণভূষিতম্ ।
শৈলশৃঙ্গসমুত্সেধম্
দৃপ্তশার্দূলবিক্রমম্ ।
দিবাকরসমাকারম্
দীপ্তানলশিখোপমম্ ।
তপ্তজাম্বূনদমযীম্
রাজতান্তপরিচ্ছদাম্ ।
দিব্যপাযসসম্পূর্ণাম্
পাত্রীং পত্নীমিব প্রিযাম্ ।
প্রগৃহ্য বিপুলাং দোর্ভ্যাম্
স্বযং মাযামযীমিব ॥11,12,13,14,15
সমবেক্ষ্যাব্রবীদ্বাক্যম্
ইদং দশরথং নৃপম্ ।
প্রাজাপত্যং নরং বিদ্ধি
মামিহাভ্যাগতং নৃপ ॥16
ততঃ পরং তদা রাজা
প্রত্যুবাচ কৃতাঞ্জলিঃ ।
ভগবন্ স্বাগতং তেঽস্তু
কিমহং করবাণি তে ॥17
অথো পুনরিদং বাক্যম্
প্রাজাপত্যো নরোঽব্রবীত্ ।
রাজন্নর্চযতা দেবান্
অদ্য প্রাপ্তমিদং ত্বযা ॥18
ইদং তু নরশার্দূল
পাযসং দেবনির্মিতম্ ।
প্রজাকরং গৃহাণ ত্বম্
ধন্যমারোগ্যবর্দ্ধনম্ ॥19
ভার্যাণামনুরূপাণাং
অশ্নীতেতি প্রযচ্ছ বৈ ।
তাসু ত্বং লপ্স্যসে পুত্রান্
যদর্থং যজসে নৃপ ॥20
তথেতি নৃপতিঃ প্রীতঃ
শিরসা প্রতিগৃহ্যতাম্ ।
পাত্রীং দেবান্নসম্পূর্ণাম্
দেবদত্তাং হিরণ্মযীম্ ॥21
অভিবাদ্য চ তদ্ভূতং
অদ্ভুতং প্রিযদর্শনম্ ।
মুদা পরমযা যুক্তঃ
চকারাভিপ্রদক্ষিণম্ ॥22
ততো দশরথঃ প্রাপ্য
পাযসং দেবনির্মিতম্ ।
বভূব পরমপ্রীতঃ
প্রাপ্য বিত্তমিবাধনঃ ॥23
ততস্তদদ্ভুতপ্রখ্যম্
ভূতং পরমভাস্বরম্ ।
সংবর্তযিত্বা তত্কর্ম
তত্রৈবান্তরধীযত ॥24
হর্ষরশ্মিভিরুদ্যোতম্
তস্যান্তঃপুরমাবভৌ ।
শারদস্যাভিরামস্য
চন্দ্রস্যেব নভোংঽশুভিঃ ॥25
সোঽন্তঃপুরং প্রবিশ্যৈব
কৌসল্যামিদমব্রবীত্ ।
পাযসং প্রতিগৃহ্ণীষ্ব
পুত্রীযং ত্বিদমাত্মনঃ ॥26
কৌসল্যাযৈ নরপতিঃ
পাযসার্ধং দদৌ তদা ।
অর্ধাদর্ধং দদৌ চাপি
সুমিত্রাযৈ নরাধিপঃ ।
কৈকেয্যৈ চাবশিষ্টার্দ্ধম্
দদৌ পুত্রার্থকারণাত্ ।
প্রদদৌ চাবশিষ্টার্ধম্
পাযসস্যামৃতোপমম্ ।
অনুচিন্ত্য সুমিত্রাযৈ
পুনরেব মহীপতিঃ ।
এবং তাসাং দদৌ রাজা
ভার্যাণাং পাযসং পৃথক্ ॥27,28,29
তাস্ত্বেতত্পাযসং প্রাপ্য
নরেন্দ্রস্যোত্তমাঃ স্ত্রিযঃ ।
সম্মানং মেনিরে সর্বাঃ
প্রহর্ষোদিতচেতসঃ ॥30
ততস্তু তাঃ প্রাশ্য তদুত্তমস্ত্রিযো
মহীপতেরুত্তমপাযসং পৃথক্ ।
হুতাশনাদিত্যসমানতেজসঃ
চিরেণ গর্ভান্ প্রতিপেদিরে তদা ॥31
ততস্তু রাজা প্রতিবীক্ষ্য তাঃ স্ত্রিযঃ
প্ররূঢগর্ভাঃ প্রতিলব্ধমানসঃ ।
বভূব হৃষ্টস্ত্রিদিবে যথা হরিঃ
সুরেন্দ্রসিদ্ধর্ষিগণাভিপূজিতঃ ॥32
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ষোডশস্সর্গঃ॥