বালমীকি রামায়ণ বালা কাণ্ড সরগা ১৭ (বাংলা)

 পুত্রত্বং তু গতে বিষ্ণৌ

রাজ্ঞস্তস্য মহাত্মনঃ ।
উবাচ দেবতাঃ সর্বাঃ
স্বযম্ভূর্ভগবানিদম্ ॥1

সত্যসন্ধস্য বীরস্য
সর্বেষাং নো হিতৈষিণঃ ।
বিষ্ণোঃ সহাযান্ বলিনঃ
সৃজধ্বং কামরূপিণঃ ।
মাযাবিদশ্চ শূরাংশ্চ
বাযুবেগসমান্ জবে ।
নযজ্ঞান্ বুদ্ধিসম্পন্নান্
বিষ্ণুতুল্যপরাক্রমান্ ।
অসংহার্যানুপাযজ্ঞান্
সিংহসংহননান্বিতান্ ।
সর্বাস্ত্রগুণসম্পন্নান্
অমৃতপ্রাশনানিব ।
অপ্সরস্সু চ মুখ্যাসু
গন্ধর্বীণাং তনূষু চ ।
সৃজধ্বং হরিরূপেণ
পুত্রাংস্তুল্যপরাক্রমান্ ॥2,3,4,5

পূর্বমেব মযা সৃষ্টো
জাম্ববানৃক্ষপুঙ্গবঃ ।
জৃম্ভমাণস্য সহসা
মম বক্ত্রাদজাযত ॥6

তে তথোক্তা ভগবতা
তত্ প্রতিশ্রুত্য শাসনম্ ।
জনযামাসুরেবং তে
পুত্রান্ বানররূপিণঃ ॥7

ঋষযশ্চ মহাত্মানঃ
সিদ্ধবিদ্যাধরোরগাঃ ।
চারণাশ্চ সুতান্বীরান্
সসৃজুর্বনচারিণঃ ॥8

বানরেন্দ্রং মহেন্দ্রাভম্
ইন্দ্রো বালিনমূর্জিতম্ ।
সুগ্রীবং জনযামাস
তপনস্তপতাং বরঃ ॥9

বৃহস্পতিস্ত্বজনযত্
তারং নাম মহাহরিম্ ।
সর্ববানরমুখ্যানাম্
বুদ্ধিমন্তমনুত্তমম্ ॥10

ধনদস্য সুতঃ শ্রীমান্
বানরো গন্ধমাদনঃ ।
বিশ্বকর্মা ত্বজনযন্
নলং নাম মহাহরিম্ ॥11

পাবকস্য সুতঃ শ্রীমান্
নীলোঽগ্নিসদৃশপ্রভঃ ।
তেজসা যশসা বীর্যাত্
অত্যরিচ্যত বানরান্ ॥12

রূপদ্রবিণসম্পন্নৌ
অশ্বিনৌ রূপসম্মতৌ ।
মৈন্দং চ দ্বিবিদং চৈব
জনযামাসতুঃ স্বযম্ ॥13

বরুণো জনযামাস
সুষেণং নাম বানরম্ ।
শরভং জনযামাস
পর্জন্যস্তু মহাবলম্ ॥14

মারুতস্যাত্মজঃ শ্রীমান্
হনুমান্নাম বানরঃ ।
বজ্রসংহননোপেতো
বৈনতেযসমো জবে ॥15

তে সৃষ্টা বহুসাহস্রা
দশগ্রীববধে রতাঃ ।
অপ্রমেযবলা বীরা
বিক্রান্তাঃ কামরূপিণঃ ॥16

মেরুমন্দরসঙ্কাশা
বপুষ্মন্তো মহাবলাঃ ।
ঋক্ষবানরগোপুচ্ছাঃ
ক্ষিপ্রমেবাভিজজ্ঞিরে ॥17

যস্য দেবস্য যদ্রূপম্
বেষো যশ্চ পরাক্রমঃ ।
অজাযত সমস্তেন
তস্য তস্য সুতঃ পৃথক্ ॥18

গোলাঙ্গূলীষু চোত্পন্নাঃ
কেচিত্সম্মতবিক্রমাঃ ।
ঋক্ষীষু চ তথা জাতা
বানরাঃ কিন্নরীষু চ ॥19

দেবা মহর্ষিগন্ধর্বাঃ
তার্ক্ষ্যা যক্ষা যশস্বিনঃ ।
নাগাঃ কিম্পুরুষাশ্চৈব
সিদ্ধবিদ্যাধরোরগাঃ ।
বহবো জনযামাসুঃ
হৃষ্টাস্তত্র সহস্রশঃ ।
বানরান্ সুমহাকাযান্
সর্বান্ বৈ বনচারিণঃ ।
অপ্সরস্সু চ মুখ্যাসু
তথা বিদ্যাধরীষু চ ।
নাগকন্যাসু চ তথা
গন্ধর্বীণাং তনূষু চ ॥20,21,22

কামরূপবলোপেতা
যথাকামং বিচারিণঃ ।
সিংহশার্দূলসদৃশা
দর্পেণ চ বলেন চ ॥23

শিলাপ্রহরণাঃ সর্বে
সর্বে পাদপযোধিনঃ ।
নখদংষ্ট্রাযুধাঃ সর্বে
সর্বে সর্বাস্ত্রকোবিদাঃ ॥24,

বিচালযেযুঃ শৈলেন্দ্রান্
ভেদযেযুঃ স্থিরান্ দ্রুমান্ ।
ক্ষোভযেযুশ্চ বেগেন
সমুদ্রং সরিতাং পতিম্ ॥25

দারযেযুঃ ক্ষিতিং পদ্ভ্যাম্
আপ্লবেযুর্মহার্ণবম্ ।
নভঃস্থলং বিশেযুশ্চ
গৃহ্ণীযুরপি তোযদান্ ॥26

গৃহ্ণীযুরপি মাতঙ্গান্
মত্তান্ প্রব্রজতো বনে ।
নর্দমানাশ্চ নাদেন
পাতযেযুর্বিহঙ্গমান্ ॥27

ঈদৃশানাং প্রসূতানি
হরীণাং কামরূপিণাম্ ।
শতং শতসহস্রাণি
যূথপানাং মহাত্মনাম্ ॥28

তে প্রধানেষু যূথেষু
হরীণাং হরিযূথপাঃ ।
বভূবুর্যূথপশ্রেষ্ঠা
বীরাংশ্চাজনযন্ হরীন্ ॥29

অন্যে ঋক্ষবতঃ প্রস্থান্
উপতস্থুঃ সহস্রশঃ ।
অন্যে নানাবিধান্ শৈলান্
কাননানি চ ভেজিরে ॥30

সূর্যপুত্রং চ সুগ্রীবম্
শক্রপুত্রং চ বালিনম্ ।
ভ্রাতরাবুপতস্থুস্তে
সর্ব এব হরীশ্বরাঃ ।
নলং নীলং হনূমন্তং
অন্যাংশ্চ হরিযূথপান্ ॥31

তে তার্ক্ষ্যবলসম্পন্নাঃ
সর্বে যুদ্ধবিশারদাঃ ।
বিচরন্তোঽর্দযন্ দর্পাত্
সিংহব্যাঘ্রমহোরগান্ ॥32

তাংশ্চ সর্বান্ মহাবাহুঃ
বালী বিপুলবিক্রমঃ ।
জুগোপ ভুজবীর্যেণ
ঋক্ষগোপুচ্ছবানরান্ ॥33

তৈরিযং পৃথিবী শূরৈঃ
সপর্বতবনার্ণবা ।
কীর্ণা বিবিধসংস্থানৈঃ
নানাব্যঞ্জনলক্ষণৈঃ ॥34

তৈর্মেঘবৃন্দাচলকূটকল্পৈঃ
মহাবলৈর্বানরযূথপালৈঃ ।
বভূব ভূর্ভীমশরীররূপৈঃ
সমাবৃতা রামসহাযহেতোঃ ॥35

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে সপ্তদশস্সর্গঃ॥