তথা বসিষ্ঠে ব্রুবতি
রাজা দশরথঃ সুতম্ ।
প্রহৃষ্টবদনো রামম্
আজুহাব সলক্ষ্মণম্ ॥1
কৃতস্বস্ত্যযনং মাত্রা
পিত্রা দশরথেন চ ।
পুরোধসা বসিষ্ঠেন
মঙ্গলৈরভিমন্ত্রিতম্ ।
স পুত্রং মূর্ধ্ন্যুপাঘ্রায
রাজা দশরথঃ প্রিযম্ ।
দদৌ কুশিকপুত্রায
সুপ্রীতেনান্তরাত্মনা ॥2,3
ততো বাযুঃ সুখস্পর্শো
নীরজস্কো ববৌ তদা ।
বিশ্বামিত্রগতং রামম্
দৃষ্ট্বা রাজীবলোচনম্ ॥4
পুষ্পবৃষ্টির্মহত্যাসীত্
দেবদুন্দুভিনিঃস্বনৈঃ ।
শঙ্খদুন্দুভিনির্ঘোষঃ
প্রযাতে তু মহাত্মনি ॥5
বিশ্বামিত্রো যযাবগ্রে
ততো রামো মহাযশাঃ ।
কাকপক্ষধরো ধন্বী
তং চ সৌমিত্রিরন্বগাত্ ॥6
কলাপিনৌ ধনুষ্পাণী
শোভযানৌ দিশো দশ ।
বিশ্বামিত্রং মহাত্মানম্
ত্রিশীর্ষাবিব পন্নগৌ ।
অনুজগ্মতুরক্ষুদ্রৌ
পিতামহমিবাশ্বিনৌ ॥7,8
তদা কুশিকপুত্রং তু
ধনুষ্পাণী স্বলঙ্কৃতৌ ।
বদ্ধগোধাঙ্গুলিত্রাণৌ
খড্গবন্তৌ মহাদ্যুতী ।
কুমারৌ চারুবপুষৌ
ভ্রাতরৌ রামলক্ষ্মণৌ ।
অনুযাতৌ শ্রিযা দীপ্তৌ
শোভযেতামনিন্দিতৌ ।
স্থাণুং দেবমিবাচিন্ত্যম্
কুমারাবিব পাবকী ॥9,10
অধ্যর্দ্ধযোজনং গত্বা
সরয্বা দক্ষিণে তটে ।
রামেতি মধুরাং বাণীম্
বিশ্বামিত্রোঽভ্যভাষত ॥11
গৃহাণ বত্স সলিলম্
মাভূত্ কালবিপর্যযঃ ।
মন্ত্রগ্রামং গৃহাণ ত্বম্
বলামতিবলাং তথা ॥12
ন শ্রমো ন জ্বরো বা তে
ন রূপস্য বিপর্যযঃ ।
ন চ সুপ্তং প্রমত্তং বা
ধর্ষযিষ্যন্তি নৈঋতাঃ ॥13
ন বাহ্বোঃ সদৃশো বীর্যে
পৃথিব্যামস্তি কশ্চন ।
ত্রিষু লোকেষু বৈ রাম
ন ভবেত্ সদৃশস্তব ॥14
ন সৌভাগ্যে ন দাক্ষিণ্যে
ন জ্ঞানে বুদ্ধিনিশ্চযে ।
নোত্তরে প্রতিবক্তব্যে
সমো লোকে তবানঘ ॥15
এতদ্বিদ্যাদ্বযে লব্ধে
ভবিতা নাস্তি তে সমঃ ।
বলা চাতিবলা চৈব
সর্বজ্ঞানস্য মাতরৌ ॥16
ক্ষুত্পিপাসে ন তে রাম
ভবিষ্যেতে নরোত্তম ।
বলামতিবলাং চৈব
পঠতঃ পথি রাঘব ॥17
বিদ্যাদ্বযমধীযানে
যশশ্চাপ্যতুলং ত্বযি ।
পিতামহসুতে হ্যেতে
বিদ্যে তেজঃসমন্বিতে ।
প্রদাতুং তব কাকুত্স্থ
সদৃশস্ত্বং হি ধার্মিক ॥18
কামং বহুগুণাঃ সর্বে
ত্বয্যেতে নাত্র সংশযঃ ।
তপসা সম্ভৃতে চৈতে
বহুরূপে ভবিষ্যতঃ ॥19
ততো রামো জলং স্পৃষ্ট্বা
প্রহৃষ্টবদনঃ শুচিঃ ।
প্রতিজগ্রাহ তে বিদ্যে
মহর্ষের্ভাবিতাত্মনঃ ॥20
বিদ্যাসমুদিতো রামঃ
শুশুভে ভূরিবিক্রমঃ ।
সহস্ররশ্মির্ভগবান্
শরদীব দিবাকরঃ ।
গুরুকার্যাণি সর্বাণি
নিযুজ্য কুশিকাত্মজে ।
ঊষুস্তাং রজনীং তত্র
সরয্বাং সুসুখঃ ত্রযঃ ॥21,22
দশরথনৃপসূনুসত্তমাভ্যাং
তৃণশযনেঽনুচিতে তদোষিতাভ্যাম্ ।
কুশিকসুতবচোঽনুলালিতাভ্যাং
সুখমিব সা বিবভৌ বিভাবরী চ ॥23
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে দ্বাবিংশস্সর্গঃ॥
