তচ্ছ্রুত্বা বচনং তস্য
স্নেহপর্যাকুলাক্ষরম্ ।
সমন্যুঃ কৌশিকো বাক্যম্
প্রত্যুবাচ মহীপতিম্ ॥1
পূর্বমর্থং প্রতিশ্রুত্য
প্রতিজ্ঞাং হাতুমিচ্ছসি ।
রাঘবাণামযুক্তোঽযম্
কুলস্যাস্য বিপর্যযঃ ॥2
যদীদং তে ক্ষমং রাজন্
গমিষ্যামি যথাগতম্ ।
মিথ্যাপ্রতিজ্ঞঃ কাকুত্স্থ
সুখী ভব সবান্ধবঃ ॥3
তস্য রোষপরীতস্য
বিশ্বামিত্রস্য ধীমতঃ ।
চচাল বসুধা কৃত্স্না
বিবেশ চ ভযং সুরান্ ॥4
ত্রস্তরূপং স বিজ্ঞায
জগত্সর্বং মহানৃষিঃ ।
নৃপতিং সুব্রতো ধীরো
বসিষ্ঠো বাক্যমব্রবীত্ ॥5
ইক্ষ্বাকূণাং কুলে জাতঃ
সাক্ষাদ্ধর্ম ইবাপরঃ ।
ধৃতিমান্ সুব্রতঃ শ্রীমান্
ন ধর্মং হাতুমর্হসি ॥6
ত্রিষু লোকেষু বিখ্যাতো
ধর্মাত্মা ইতি রাঘবঃ ।
স্বধর্মং প্রতিপদ্যস্ব
নাধর্মং বোঢুমর্হসি ॥7
সংশ্রুত্যৈবং করিষ্যামী -
ত্যকুর্বাণস্য রাঘব ।
ইষ্টাপূর্তবধো ভূযাত্
তস্মাদ্রামং বিসর্জয ॥8
কৃতাস্ত্রমকৃতাস্ত্রং বা
নৈনং শক্ষ্যন্তি রাক্ষসাঃ ।
গুপ্তং কুশিকপুত্রেণ
জ্বলনেনামৃতং যথা ॥9
এষ বিগ্রহবান্ ধর্ম
এষ বীর্যবতাং বরঃ ।
এষ বুদ্ধ্যাধিকো লোকে
তপসশ্চ পরাযণম্ ॥10
এষোঽস্ত্রান্ বিবিধান্ বেত্তি
ত্রৈলোক্যে সচরাচরে ।
নৈনমন্যঃ পুমান্ বেত্তি
ন চ বেত্স্যন্তি কেচন ॥11
ন দেবা ঋষযঃ কেচিত্
নাসুরা ন চ রাক্ষসাঃ ।
গন্ধর্বযক্ষপ্রবরাঃ
সকিন্নরমহোরগাঃ ॥12
সর্বাস্ত্রাণি ভৃশাশ্বস্য
পুত্রাঃ পরমধার্মিকাঃ ।
কৌশিকায পুরা দত্তা
যদা রাজ্যং প্রশাসতি ॥13
তেঽপি পুত্রা ভৃশাশ্বস্য
প্রজাপতিসুতাসুতাঃ ।
নৈকরূপা মহাবীর্যা
দীপ্তিমন্তো জযাবহাঃ ॥14
জযা চ সুপ্রভা চৈব
দক্ষকন্যে সুমধ্যমে ।
তে সুবাতেঽস্ত্রশস্ত্রাণি
শতং পরমভাস্বরম্ ॥15
পঞ্চাশতং সুতাংল্লেভে
জযা নাম পরান্ পুরা ।
বধাযাসুরসৈন্যানাং
অমেযান্ কামরূপিণঃ ॥16
সুপ্রভাজনযচ্চাপি
সুতান্ পঞ্চাশতং পুনঃ ।
সংহারান্নাম দুর্দ্ধর্ষান্
দুরাক্রমান্ বলীযসঃ ॥17
তানি চাস্ত্রাণি বেত্ত্যেষ
যথাবত্ কুশিকাত্মজঃ ।
অপূর্বাণাং চ জননে
শক্তো ভূযঃ স ধর্মবিত্ ॥18
এবংবীর্যো মহাতেজা
বিশ্বামিত্রো মহাযশাঃ ।
ন রামগমনে রাজন্
সংশযং গন্তুমর্হসি ॥19
তেষাং নিগ্রহণে শক্তঃ
স্বযং চ কুশিকাত্মজঃ ।
তব পুত্রহিতার্থায
ত্বামুপেত্যাভিযাচতে ॥20
ইতি মুনিবচনাত্ প্রসন্নচিত্তো
রঘুবৃষভশ্চ মুমোদ ভাস্বরাঙ্গঃ ।
গমনমভিরুরোচ রাঘবস্য
প্রথিতযশাঃ কুশিকাত্মজায বুদ্ধ্যা ॥21
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে একবিংশস্সর্গঃ॥
