বালমীকি রামায়ণ বালা কাণ্ড সরগা ২৫ (বাংলা)

 

অথ তস্যাপ্রমেযস্য
মুনের্বচনমুত্তমম্ ।
শ্রুত্বা পুরুষশার্দূলঃ
প্রত্যুবাচ শুভাং গিরম্ ॥1
অল্পবীর্যা যদা যক্ষাঃ
শ্রূযন্তে মুনিপুঙ্গব ।
কথং নাগসহস্রস্য
ধারযত্যবলা বলম্ ॥2
বিশ্বামিত্রোঽব্রবীদ্বাক্যম্
শৃণু যেন বলোত্তরা ।
বরদানকৃতং বীর্যম্
ধারযত্যবলা বলম্ ॥3
পূর্বমাসীন্মহাযক্ষঃ
সুকেতুর্নাম বীর্যবান্ ।
অনপত্যঃ শুভাচারঃ
স চ তেপে মহত্তপঃ ॥4
পিতামহস্তু সম্প্রীতঃ
তস্য যক্ষপতেস্তদা ।
কন্যারত্নং দদৌ রাম
তাটকাং নাম নামতঃ ।
দদৌ নাগসহস্রস্য
বলং চাস্যাঃ পিতামহঃ ।
ন ত্বেব পুত্রং যক্ষায
দদৌ ব্রহ্মা মহাযশাঃ ॥5,6
তাং তু জাতাং বিবর্ধন্তীম্
রূপযৌবনশালিনীম্ ।
ঝর্ঝপুত্রায সুন্দায
দদৌ ভার্যাং যশস্বিনীম্ ॥7
কস্যচিত্ত্বথ কালস্য
যক্ষী পুত্রমজাযত ।
মারীচং নাম দুর্ঘষম্
যঃ শাপাদ্রাক্ষসোঽভবত্ ॥8
সুন্দে তু নিহতে রাম
সাগস্ত্যং মুনিপুঙ্গবম্ ।
তাটকা সহ পুত্রেণ
প্রধর্ষযিতুমিচ্ছতি ॥9
ভক্ষার্থং জাতসংরম্ভা
গর্জন্তী সাঽভ্যধাবত ।
আপতন্তীং তু তাং দৃষ্ট্বা
অগস্ত্যো ভগবানৃষিঃ ।
রাক্ষসত্বং ভজস্বেতি
মারীচং ব্যাজহার সঃ ।
অগস্ত্যঃ পরমক্রুদ্ধঃ
তাটকামপি শপ্তবান্ ।
পুরুষাদী মহাযক্ষী
বিরূপা বিকৃতাননা ।
ইদং রূপং বিহাযাঽথ
দারুণং রূপমস্তু তে ॥10,11,12
সৈষা শাপকৃতামর্ষা
তাটকা ক্রোধমূর্চ্ছিতা ।
দেশমুত্সাদযত্যেনং
অগস্ত্যচরিতং শুভম্ ॥13
এনাং রাঘব দুর্বৃত্তাম্
যক্ষীং পরমদারুণাম্ ।
গোব্রাহ্মণহিতার্থায
জহি দুষ্টপরাক্রমাম্ ॥14
ন হ্যেনাং শাপসংস্পৃষ্টাম্
কশ্চিদুত্সহতে পুমান্ ।
নিহন্তুং ত্রিষু লোকেষু
ত্বামৃতে রঘুনন্দন ॥15
ন হি তে স্ত্রীবধকৃতে
ঘৃণা কার্যা নরোত্তম ।
চাতুর্বর্ণ্যহিতার্থায
কর্তব্যং রাজসূনুনা ॥16
নৃশংসমনৃশংসং বা
প্রজারক্ষণকারণাত্ ।
পাতকং বা সদোষং বা
কর্তব্যং রক্ষতা সতাম্ ॥17
রাজ্যভারনিযুক্তানাম্
এষ ধর্মঃ সনাতনঃ ।
অধর্ম্যাং জহি কাকুত্স্থ
ধর্মো হ্যস্যা ন বিদ্যতে ॥18
শ্রূযতে হি পুরা শক্রো
বিরোচনসুতাং নৃপ ।
পৃথিবীং হন্তুমিচ্ছন্তীম্
মন্থরামভ্যসূদযত্ ॥19
বিষ্ণুনা চ পুরা রাম
ভৃগুপত্নী দৃঢব্রতা ।
অনিন্দ্রং লোকমিচ্ছন্তী
কাব্যমাতা নিষূদিতা ॥20
এতৈশ্চান্যৈশ্চ বহুভী
রাজপুত্র মহাত্মভিঃ ।
অধর্মসহিতা নার্যো
হতাঃ পুরুষসত্তমৈঃ ॥21
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে পঞ্চবিংশস্সর্গঃ॥