মুনের্বচনমক্লীবম্
শ্রুত্বা নরবরাত্মজঃ ।
রাঘবঃ প্রাঞ্জলির্ভূত্বা
প্রত্যুবাচ দৃঢব্রতঃ ॥1
পিতুর্বচননির্দেশাত্
পিতুর্বচনগৌরবাত্ ।
বচনং কৌশিকস্যেতি
কর্তব্যমবিশঙ্কযা ॥2
অনুশিষ্টোঽস্ম্যযোধ্যাযাম্
গুরুমধ্যে মহাত্মনা ।
পিত্রা দশরথেনাহম্
নাবজ্ঞেযং চ তদ্বচঃ ॥3
সোঽহং পিতুর্বচঃ শ্রুত্বা
শাসনাদ্ব্রহ্মবাদিনঃ ।
করিষ্যামি ন সন্দেহঃ
তাটকাবধমুত্তমম্ ॥4
গোব্রাহ্মণহিতার্থায
দেশস্যাস্য সুখায চ ।
তব চৈবাপ্রমেযস্য
বচনং কর্ত্তুমুদ্যতঃ ॥5
এবমুক্ত্বা ধনুর্মধ্যে
বধ্বা মুষ্টিমরিন্দমঃ ।
জ্যাঘোষমকরোত্তীব্রম্
দিশঃ শব্দেন নাদযন্ ॥6
তেন শব্দেন বিত্রস্তাঃ
তাটকাবনবাসিনঃ ।
তাটকা চ সুসঙ্ক্রুদ্ধা
তেন শব্দেন মোহিতা ॥7
তং শব্দমভিনিধ্যায
রাক্ষসী ক্রোধমূর্চ্ছিতা ।
শ্রুত্বা চাভ্যদ্রবদ্বেগাত্
যতঃ শব্দো বিনিস্সৃতঃ ॥8
তাং দৃষ্ট্বা রাঘবঃ ক্রুদ্ধাম্
বিকৃতাং বিকৃতাননাম্ ।
প্রমাণেনাতিবৃদ্ধাং চ
লক্ষ্মণং সোঽভ্যভাষত ॥9
পশ্য লক্ষ্মণ যক্ষিণ্যা
ভৈরবং দারুণং বপুঃ ।
ভিদ্যেরন্ দর্শনাদস্যা
ভীরূণাং হৃদযানি চ ॥10
এনাং পশ্য দুরাধর্ষাম্
মাযাবলসমন্বিতাম্ ।
বিনিবৃত্তাং করোম্যদ্য
হৃতকর্ণাগ্রনাসিকাম্ ॥11
ন হ্যেনামুত্সহে হন্তুম্
স্ত্রীস্বভাবেন রক্ষিতাম্ ।
বীর্যং চাস্যা গতিং চাপি
হনিষ্যামীতি মে মতিঃ ॥12
এবং ব্রুবাণে রামে তু
তাটকা ক্রোধমূর্চ্ছিতা ।
উদ্যম্য বাহূ গর্জন্তী
রামমেবাভ্যধাবত ॥13
বিশ্বামিত্রস্তু ব্রহ্মর্ষিঃ
হুঙ্কারেণাভিভর্ত্স্য তাম্ ।
স্বস্তি রাঘবযোরস্তু
জযং চৈবাভ্যভাষত ॥14
উদ্ধূন্বানা রজো ঘোরম্
তাটকা রাঘবাবুভৌ ।
রজোমোহেন মহতা
মুহূর্তং সা ব্যমোহযত্ ॥15
ততো মাযাং সমাস্থায
শিলাবর্ষেণ রাঘবৌ ।
অবাকিরত্সুমহতা
ততশ্চুক্রোধ রাঘবঃ ॥16
শিলাবর্ষং মহত্তস্যাঃ
শরবর্ষেণ রাঘবঃ ।
প্রতিহত্যোপধাবন্ত্যাঃ
করৌ চিচ্ছেদ পত্রিভিঃ ॥17
ততশ্ছিন্নভুজাং শ্রান্তাং
অভ্যাশে পরিগর্জতীম্ ।
সৌমিত্রিরকরোত্ ক্রোধাত্
হৃতকর্ণাগ্রনাসিকাম্ ॥18
কামরূপধরা সদ্যঃ
কৃত্বা রূপাণ্যনেকশঃ ।
অন্তর্দ্ধানং গতা যক্ষী
মোহযন্তীব মাযযা ।
অশ্মবর্ষং বিমুঞ্চন্তী
ভৈরবং বিচচার হ ॥19
ততস্তাবশ্মবর্ষেণ
কীর্যমাণৌ সমন্ততঃ ।
দৃষ্ট্বা গাধিসুতঃ শ্রীমান্
ইদং বচনমব্রবীত্ ॥20
অলং তে ঘৃণযা বীর
পাপৈষা দুষ্টচারিণী ।
যজ্ঞবিঘ্নকরী যক্ষী
পুরা বর্দ্ধতি মাযযা ॥21
বধ্যতাং তাবদেবৈষা
পুরা সন্ধ্যা প্রবর্ততে ।
রক্ষাংসি সন্ধ্যাকালেষু
দুর্দ্ধর্ষাণি ভবন্তি বৈ ॥22
ইত্যুক্তস্তু তদা যক্ষীং
অশ্মবৃষ্ট্যাভিবর্ষতীম্ ।
দর্শযন্ শব্দবেধিত্বম্
তাং রুরোধ স সাযকৈঃ ॥23
সা রুদ্ধা শরজালেন
মাযাবলসমন্বিতা ।
অভিদুদ্রাব কাকুত্স্থম্
লক্ষ্মণং চ বিনেদুষী ॥24
তামাপতন্তীং বেগেন
বিক্রান্তামশনীমিব ।
শরেণোরসি বিব্যাধ
সা পপাত মমার চ ॥25
তাং হতাং ভীমসঙ্কাশাম্
দৃষ্ট্বা সুরপতিস্তদা ।
সাধু সাধ্বিতি কাকুত্স্থম্
সুরাশ্চ সমপূজযন্ ॥26
উবাচ পরমপ্রীতঃ
সহস্রাক্ষঃ পুরন্দরঃ ।
সুরাশ্চ সর্বে সংহৃষ্টা
বিশ্বামিত্রমথাব্রুবন্ ॥27
মুনে কৌশিক ভদ্রং তে
সেন্দ্রাস্সর্বে মরুদ্গণাঃ ।
তোষিতাঃ কর্মণানেন
স্নেহং দর্শয রাঘবে ॥28
প্রজাপতের্ভৃশাশ্বস্য
পুত্রান্ সত্যপরাক্রমান্ ।
তপোবলভৃতো ব্রহ্মন্
রাঘবায নিবেদয ॥29
পাত্রভূতশ্চ তে ব্রহ্মন্
তবানুগমনে ধৃতঃ ।
কর্তব্যং চ মহত্কার্যম্
সুরাণাং রাজসূনুনা ॥30
এবমুক্ত্বা সুরাঃ সর্বে
জগ্মুর্হৃষ্টা যথাগতম্ ।
বিশ্বামিত্রং পুরস্কৃত্য
ততঃ সন্ধ্যা প্রবর্ততে ॥31
ততো মুনিবরঃ প্রীতঃ
তাটকাবধতোষিতঃ ।
মূর্ধ্নি রামমুপাঘ্রায
ইদং বচনমব্রবীত্ ॥32
ইহাদ্য রজনীং রাম
বসাম শুভদর্শন ।
শ্বঃপ্রভাতে গমিষ্যামঃ
তদাশ্রমপদং মম ॥33
বিশ্বামিত্রবচঃ শ্রুত্বা
হৃষ্টো দশরথাত্মজঃ ।
উবাস রজনীং তত্র
তাটকাযা বনে সুখম্ ॥34
মুক্তশাপং বনং তচ্চ
তস্মিন্নেব তদাঽহনি ।
রমণীযং বিবভ্রাজ
যথা চৈত্ররথং বনম্ ॥35
নিহত্য তাং যক্ষসুতাং স রামঃ
প্রশস্যমানঃ সুরসিদ্ধসঙ্ঘৈঃ ।
উবাস তস্মিন্ মুনিনা সহৈব
প্রভাতবেলাং প্রতিবোধ্যমানঃ ॥36
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ষড্বিংশস্সর্গঃ॥
