তস্য তদ্বচনং শ্রুত্বা
কুশনাভস্য ধীমতঃ ।
শিরোভিশ্চরণৌ স্পৃষ্ট্বা
কন্যাশতমভাষত ॥1
বাযুঃ সর্বাত্মকো রাজন্
প্রধর্ষযিতুমিচ্ছতি ।
অশুভং মার্গমাস্থায
ন ধর্মং প্রত্যবেক্ষতে ॥2
পিতৃমত্যঃ স্ম ভদ্রং তে
স্বচ্ছন্দে ন বযং স্থিতাঃ ।
পিতরং নো বৃণীষ্ব ত্বম্
যদি নো দাস্যতে তব ॥3
তেন পাপানুবন্ধেন
বচনং ন প্রতীচ্ছতা ।
এবং ব্রুবন্ত্যঃ সর্বাঃ স্ম
বাযুনা নিহতা ভৃশম্ ॥4
তাসাং তদ্বচনং শ্রুত্বা
রাজা পরমধার্মিকঃ ।
প্রত্যুবাচ মহাতেজাঃ
কন্যাশতমনুত্তমম্ ॥5
ক্ষান্তং ক্ষমাবতাং পুত্র্যঃ
কর্তব্যং সুমহত্কৃতম্ ।
ঐকমত্যমুপাগম্য
কুলং চাবেক্ষিতং মম ॥6
অলঙ্কারো হি নারীণাম্
ক্ষমা তু পুরুষস্য বা ।
দুষ্করং তদ্ধি বঃ ক্ষান্তম্
ত্রিদশেষু বিশেষতঃ ।
যাদৃশী বঃ ক্ষমা পুত্র্যঃ
সর্বাসামবিশেষতঃ ॥7,8
ক্ষমা দানং ক্ষমা সত্যম্
ক্ষমা যজ্ঞশ্চ পুত্রিকাঃ ।
ক্ষমা যশঃ ক্ষমা ধর্মঃ
ক্ষমযা বিষ্ঠিতং জগত্ ॥9
বিসৃজ্য কন্যাঃ কাকুত্স্থ
রাজা ত্রিদশবিক্রমঃ ।
মন্ত্রজ্ঞো মন্ত্রযামাস
প্রদানং সহ মন্ত্রিভিঃ ।
দেশকালৌ প্রদানস্য
সদৃশে প্রতিপাদনম্ ॥10
এতস্মিন্নেব কালে তু
চূলী নাম মহামুনিঃ ।
ঊর্ধ্বরেতাঃ শুভাচারো
ব্রাহ্মং তপ উপাগমত্ ॥11
তপ্যন্তং তমৃষিং তত্র
গন্ধর্বী পর্যুপাসতে ।
সোমদা নাম ভদ্রং তে
ঊর্মিলাতনযা তদা ॥12
সা চ তং প্রণতা ভূত্বা
শুশ্রূষণপরাযণা ।
উবাস কালে ধর্মিষ্ঠা
তস্যাস্তুষ্টোঽভবদ্গুরুঃ ॥13
স চ তাং কালযোগেন
প্রোবাচ রঘুনন্দন ।
পরিতুষ্টোঽস্মি ভদ্রং তে
কিং করোমি তব প্রিযম্ ॥14
পরিতুষ্টং মুনিং জ্ঞাত্বা
গন্ধর্বী মধুরস্বরা ।
উবাচ পরমপ্রীতা
বাক্যজ্ঞা বাক্যকোবিদম্ ॥15
লক্ষ্ম্যা সমুদিতো ব্রাহ্ম্যা
ব্রহ্মভূতো মহাতপাঃ ।
ব্রাহ্মেণ তপসা যুক্তম্
পুত্রমিচ্ছামি ধার্মিক ॥16
অপতিশ্চাস্মি ভদ্রং তে
ভার্যা চাস্মি ন কস্যচিত্ ।
ব্রাহ্মেণোপগতাযাশ্চ
দাতুমর্হসি মে সুতম্ ॥17
তস্যাঃ প্রসন্নো ব্রহ্মর্ষিঃ
দদৌ পুত্রমনুত্তমম্ ।
ব্রহ্মদত্ত ইতি খ্যাতম্
মানসং চূলিনঃ সুতম্ ॥18
স রাজা সৌমদেযস্তু
পুরীমধ্যাবসত্তদা ।
কাম্পিল্যাং পরযা লক্ষ্ম্যা
দেবরাজো যথা দিবম্ ॥19
স বুদ্ধিং কৃতবান্ রাজা
কুশনাভঃ সুধার্মিকঃ ।
ব্রহ্মদত্তায কাকুত্স্থ
দাতুং কন্যাশতং তদা ॥20
তমাহূয মহাতেজা
ব্রহ্মদত্তং মহীপতিঃ ।
দদৌ কন্যাশতং রাজা
সুপ্রীতেনান্তরাত্মনা ॥21
যথাক্রমং ততঃ পাণীন্
জগ্রাহ রঘুনন্দন ।
ব্রহ্মদত্তো মহীপালঃ
তাসাং দেবপতির্যথা ॥22
স্পৃষ্টমাত্রে ততঃ পাণৌ
বিকুব্জা বিগতজ্বরাঃ ।
যুক্তাঃ পরমযা লক্ষ্ম্যা
বভুঃ কন্যাশতং তদা ॥23
স দৃষ্ট্বা বাযুনা মুক্তাঃ
কুশনাভো মহীপতিঃ ।
বভূব পরমপ্রীতো
হর্ষং লেভে পুনঃপুনঃ ॥24
কৃতোদ্বাহং তু রাজানম্
ব্রহ্মদত্তং মহীপতিঃ ।
সদারং প্রেষযামাস
সোপাধ্যাযগণং তদা ॥25
সোমদাপি সুসংহৃষ্টা
পুত্রস্য সদৃশীং ক্রিযাম্ ।
যথান্যাযং চ গন্ধর্বী
স্নুষাস্তাঃ প্রত্যনন্দত ।
স্পৃষ্ট্বাস্পৃষ্ট্বা চ তাঃ কন্যাঃ
কুশনাভং প্রশস্য চ ॥26
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ত্রযস্ত্রিংশস্সর্গঃ॥
