ব্রহ্মযোনির্মহানাসীত্
কুশো নাম মহাতপাঃ ।
অক্লিষ্টব্রতধর্মজ্ঞঃ
সজ্জনপ্রতিপূজকঃ ॥1
স মহাত্মা কুলীনাযাম্
যুক্তাযাং সুগুণোল্বণান্ ।
বৈদর্ভ্যাং জনযামাস
সদৃশাংশ্চতুরঃ সুতান্ ।
কুশাম্বং কুশনাভং চ
অধূর্তরজসং বসুম্ ॥2,3
দীপ্তিযুক্তান্ মহোত্সাহান্
ক্ষত্রধর্মচিকীর্ষযা ।
তানুবাচ কুশঃ পুত্রান্
ধর্মিষ্ঠান্ সত্যবাদিনঃ ।
ক্রিযতাং পালনং পুত্রা
ধর্মং প্রাপ্স্যথ পুষ্কলম্ ॥4
ঋষেস্তু বচনং শ্রুত্বা
চত্বারো লোকসম্মতাঃ ।
নিবেশং চক্রিরে সর্বে
পুরাণাং নৃবরাস্তদা ॥5
কুশাম্বস্তু মহাতেজাঃ
কৌশাম্বীমকরোত্পুরীম্ ।
কুশনাভস্তু ধর্মাত্মা
পুরং চক্রে মহোদযম্ ।
আধূর্তরজসো রাম
ধর্মারণ্যং মহীপতিঃ ।
চক্রে পুরবরং রাজা
বসুশ্চক্রে গিরিব্রজম্ ॥6,7
এষা বসুমতী রাম
বসোস্তস্য মহাত্মনঃ ।
এতে শৈলবরাঃ পঞ্চ
প্রকাশন্তে সমন্ততঃ ॥8
সুমাগধী নদী রম্যা
মগধান্ বিশ্রুতাঽযযৌ ।
পঞ্চানাং শৈলমুখ্যানাম্
মধ্যে মালেব শোভতে ॥9
সৈষা হি মাগধী রাম
বসোস্তস্য মহাত্মনঃ ।
পূর্বাভিচরিতা রাম
সুক্ষেত্রা সস্যমালিনী ॥10
কুশনাভস্তু রাজর্ষিঃ
কন্যাশতমনুত্তমম্ ।
জনযামাস ধর্মাত্মা
ঘৃতাচ্যাং রঘুনন্দন ॥11
তাস্তু যৌবনশালিন্যো
রূপবত্যঃ স্বলঙ্কৃতাঃ ।
উদ্যানভূমিমাগম্য
প্রাবৃষীব শতহ্রদাঃ ।
গাযন্ত্যো নৃত্যমানাশ্চ
বাদযন্ত্যশ্চ সর্বশঃ ।
আমোদং পরমং জগ্মুঃ
বরাভরণভূষিতাঃ ॥12,13
অথ তাশ্চারুসর্বাঙ্গ্যো
রূপেণাপ্রতিমা ভুবি ।
উদ্যানভূমিমাগম্য
তারা ইব ঘনান্তরে ॥14
তাঃ সর্বগুণসম্পন্না
রূপযৌবনসংযুতাঃ ।
দৃষ্ট্বা সর্বাত্মকো বাযুঃ
ইদং বচনমব্রবীত্ ॥15
অহং বঃ কামযে সর্বা
ভার্যা মম ভবিষ্যথ ।
মানুষস্ত্যজ্যতাং ভাবো
দীর্ঘমাযুরবাপ্স্যথ ॥16
চলং হি যৌবনং নিত্যম্
মানুষেষু বিশেষতঃ ।
অক্ষযং যৌবনং প্রাপ্তা
অমর্যশ্চ ভবিষ্যথ ॥17
তস্য তদ্বচনং শ্রুত্বা
বাযোরক্লিষ্টকর্মণঃ ।
অপহাস্য ততো বাক্যম্
কন্যাশতমথাব্রবীত্ ॥18
অন্তশ্চরসি ভূতানাম্
সর্বেষাং ত্বং সুরোত্তম ।
প্রভাবজ্ঞাঃ স্ম তে সর্বাঃ
কিমস্মানবমন্যসে ॥19
কুশনাভসুতাঃ সর্বাঃ
সমর্থাস্ত্বাং সুরোত্তম ।
স্থানাচ্চ্যাবযিতুং দেবম্
রক্ষামস্তু তপো বযম্ ॥20
মাভূত্স কালো দুর্মেধঃ
পিতরং সত্যবাদিনম্ ।
নাবমন্যস্ব ধর্মেণ
স্বযং বরমুপাস্মহে ॥21
পিতা হি প্রভুরস্মাকম্
দৈবতং পরমং হি নঃ ।
যস্য নো দাস্যতি পিতা
স নো ভর্তা ভবিষ্যতি ॥22
তাসাং তদ্বচনং শ্রুত্বা
বাযুঃ পরমকোপনঃ ।
প্রবিশ্য সর্বগাত্রাণি
বভঞ্জ ভগবান্ প্রভুঃ ॥23
তাঃ কন্যাঃ বাযুনা ভগ্না
বিবিশুর্নৃপতের্গৃহম্ ।
প্রাপতন্ ভুবি সম্ভ্রান্তাঃ
সলজ্জাঃ সাশ্রুলোচনাঃ ॥24
স চ তা দযিতা দীনাঃ
কন্যাঃ পরমশোভনাঃ ।
দৃষ্ট্বা ভগ্নাস্তদা রাজা
সম্ভ্রান্ত ইদমব্রবীত্ ॥25
কিমিদং কথ্যতাং পুত্র্যঃ
কো ধর্মমবমন্যতে ।
কুব্জাঃ কেন কৃতাঃ সর্বা
বেষ্টন্ত্যো নাভিভাষথ ।
এবং রাজা বিনিশ্বস্য
সমাধিং সন্দধে ততঃ ॥26
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে দ্বাত্রিংশস্সর্গঃ।।
