বালমীকি রামায়ণ বালা কাণ্ড সরগা ৮ (বাংলা) ekadashi24

 তস্য ত্বেবম্প্রভাবস্য

ধর্মজ্ঞস্য মহাত্মনঃ ।
সুতার্থং তপ্যমানস্য
নাসীদ্বংশকরস্সুতঃ ॥

চিন্তযানস্য তস্যৈবম্
বুদ্ধিরাসীন্মহাত্মনঃ ।
সুতার্থী বাজিমেধেন
কিমর্থং ন যজাম্যহম্ ॥

স নিশ্চিতাং মতিং কৃত্বা
যষ্টব্যমিতি বুদ্ধিমান্ ।
মন্ত্রিভিস্সহ ধর্মাত্মা
সর্বৈরেব কৃতাত্মভিঃ ।
ততোঽব্রবীদিদং রাজা
সুমন্ত্রং মন্ত্রিসত্তমম্ ।
শীঘ্রমানয মে সর্বান্
গুরূংস্তান্ সপুরোহিতান্ ॥

ততস্সুমন্ত্রস্ত্বরিতম্
গত্বা ত্বরিতবিক্রমঃ ।
সমানযত্ স তান্ সর্বান্
সমস্তান্ বেদপারগান্ ।
সুযজ্ঞং বামদেবং চ
জাবালিমথ কাশ্যপম্ ।
পুরোহিতং বসিষ্ঠং চ
যে চান্যে দ্বিজসত্তমাঃ ॥

তান্ পূজযিত্বা ধর্মাত্মা
রাজা দশরথস্তদা ।
ইদং ধর্মার্থসহিতম্
বাক্যং শ্লক্ষ্ণমথাব্রবীত্ ॥

মম লালপ্যমানস্য
পুত্রার্থং নাস্তি বৈ সুখম্ ।
তদর্থং হযমেধেন
যক্ষ্যামীতি মতির্মম ॥

তদহং যষ্টুমিচ্ছামি
শাস্ত্রদৃষ্টেন কর্মণা ।
কথং প্রাপ্স্যাম্যহং কামম্
বুদ্ধিরত্রবিচার্যতাম্ ॥

ততস্সাধ্বিতি তদ্বাক্যম্
ব্রাহ্মণাঃ প্রত্যপূজযন্ ।
বসিষ্ঠপ্রমুখাস্সর্বে
পার্থিবস্য মুখাচ্চ্যুতম্ ॥

ঊচুশ্চ পরমপ্রীতাঃ
সর্বে দশরথং বচঃ ॥

সম্ভারাস্সম্ভ্রিযন্তাং তে
তুরঙ্গশ্চ বিমুচ্যতাম্ ।
সর্বথা প্রাপ্স্যসে পুত্রান্
অভিপ্রেতাংশ্চ পার্থিব ।
যস্য তে ধার্মিকী বুদ্ধিঃ
ইযং পুত্রার্থমাগতা ॥

ততঃ প্রীতোঽভবদ্রাজা
শ্রুত্বৈতদ্দ্বিজভাষিতম্ ।
অমাত্যাংশ্চাব্রবীদ্রাজা
হর্ষপর্যাকুলেক্ষণঃ ॥

সম্ভারাস্সম্ভ্রিযন্তাং মে
গুরূণাং বচনাদিহ ।
সমর্থাধিষ্ঠিতশ্চাশ্বঃ
সোপাধ্যাযো বিমুচ্যতাম্ ॥

সরয্বাশ্চোত্তরে তীরে
যজ্ঞভূমির্বিধীযতাম্ ।
শান্তযশ্চাভিবর্ধন্তাম্
যথাকল্পং যথাবিধি ॥

শক্যঃ প্রাপ্তুমযং যজ্ঞঃ
সর্বেণাপি মহীক্ষিতা ।
নাপরাধো ভবেত্কষ্টো
যদ্যস্মিন্ ক্রতুসত্তমে ॥

ছিদ্রং হি মৃগযন্তেঽত্র
বিদ্বাংসো ব্রহ্মরাক্ষসাঃ ।
নিহতস্য চ যজ্ঞস্য
সদ্যঃ কর্তা বিনশ্যতি ॥

তদ্যথা বিধিপূর্বং মে
ক্রতুরেষ সমাপ্যতে ।
তথা বিধানং ক্রিযতাম্
সমর্থাঃ করণেষ্বিহ ॥

তথেতি চাব্রুবন্ সর্বে
মন্ত্রিণঃ প্রত্যপূজযন্ ।
পার্থিবেন্দ্রস্য তদ্বাক্যম্
যথাজ্ঞপ্তং নিশম্য তে ॥

তথা দ্বিজাস্তে ধর্মজ্ঞা
বর্দ্ধযন্তো নৃপোত্তমম্ ।
অনুজ্ঞাতাস্ততস্সর্বে
পুনর্জগ্মুর্যথাগতম্ ॥

বিসর্জযিত্বা তান্ বিপ্রান্
সচিবানিদমব্রবীত্ ।
ঋত্বিগ্ভিরুপদিষ্টোঽযম্
যথাবত্ ক্রতুরাপ্যতাম্ ॥

ইত্যুক্ত্বা নৃপশার্দূলঃ
সচিবান্ সমুপস্থিতান্ ।
বিসর্জযিত্বা স্বং বেশ্ম
প্রবিবেশ মহাদ্যুতিঃ ॥

ততস্স গত্বা তাঃ পত্নীঃ
নরেন্দ্রো হৃদযপ্রিযাঃ ।
উবাচ দীক্ষাং বিশত
যক্ষ্যেঽহং সুতকারণাত্ ॥

তাসাং তেনাতিকান্তেন
বচনেন সুবর্চসাম্ ।
মুখপদ্মান্যশোভন্ত
পদ্মানীব হিমাত্যযে ॥

ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে অষ্টমস্সর্গঃ॥

#ekadashi24