বালমীকি রামায়ণ বালা কাণ্ড সরগা ১৮ (বাংলা)

  নির্বৃত্তে তু ক্রতৌ তস্মিন্
হযমেধে মহাত্মনঃ ।
প্রতিগৃহ্য সুরা ভাগান্
প্রতিজগ্মুর্যথাগতম্ ॥1
সমাপ্তদীক্ষানিযমঃ
পত্নীগণসমন্বিতঃ ।
প্রবিবেশ পুরীং রাজা
সভৃত্যবলবাহনঃ ॥2
যথার্হং পূজিতাস্তেন
রাজ্ঞা বৈ পৃথিবীশ্বরাঃ ।
মুদিতাঃ প্রযযুর্দেশান্
প্রণম্য মুনিপুঙ্গবম্ ॥3
শ্রীমতাং গচ্ছতাং তেষাম্
স্বপুরাণি পুরাত্ততঃ ।
বলানি রাজ্ঞাং শুভ্রাণি
প্রহৃষ্টানি চকাশিরে ॥4
গতেষু পৃথিবীশেষু
রাজা দশরথস্তদা ।
প্রবিবেশ পুরীং শ্রীমান্
পুরস্কৃত্য দ্বিজোত্তমান্ ॥5
শান্তযা প্রযযৌ সার্ধম্ 
ঋশ্যশৃঙ্গঃ সুপূজিতঃ ।
অন্বীযমানো রাজ্ঞাঽথ
সানুযাত্রেণ ধীমতা ॥6
এবং বিসৃজ্য তান্ সর্বান্
রাজা সম্পূর্ণমানসঃ ।
উবাস সুখিতস্তত্র
পুত্রোত্পত্তিং বিচিন্তযন্ ॥7

ততো যজ্ঞে সমাপ্তে তু
ঋতূনাং ষট্ সমত্যযুঃ ।
ততশ্চ দ্বাদশে মাসে
চৈত্রে নাবমিকে তিথৌ ।
নক্ষত্রেঽদিতিদৈবত্যে
স্বোচ্চসংস্থেষু পঞ্চসু ।
গ্রহেষু কর্কটে লগ্নে
বাক্পতাবিন্দুনা সহ ।
প্রোদ্যমানে জগন্নাথম্
সর্বলোকনমস্কৃতম্ ।
কৌসল্যাজনযদ্রামম্
সর্বলক্ষণসংযুতম্ ।
বিষ্ণোরর্ধং মহাভাগম্
পুত্রমৈক্ষ্বাকুবর্ধনম্ ॥8,9,10,11

কৌসল্যা শুশুভে তেন
পুত্রেণামিততেজসা ।
যথা বরেণ দেবানাং
অদিতির্বজ্রপাণিনা ॥12
ভরতো নাম কৈকেয্যাম্
জজ্ঞে সত্যপরাক্রমঃ ।
সাক্ষাদ্বিষ্ণোশ্চতুর্ভাগঃ
সর্বৈঃ সমুদিতো গুণৈঃ ॥13
অথ লক্ষ্মণশত্রুঘ্নৌ
সুমিত্রাজনযত্সুতৌ ।
সর্বাস্ত্রকুশলৌ বীরৌ
বিষ্ণোরর্ধসমন্বিতৌ ॥14
পুষ্যে জাতস্তু ভরতো
মীনলগ্নে প্রসন্নধীঃ ।
সার্পে জাতৌ চ সৌমিত্রী
কুলীরেঽভ্যুদিতে রবৌ ॥15
রাজ্ঞঃ পুত্রা মহাত্মানঃ
চত্বারো জজ্ঞিরে পৃথক্ ।
গুণবন্তোঽনুরূপাশ্চ
রুচ্যা প্রোষ্ঠপদোপমাঃ ॥16
জগুঃ কলং চ গন্ধর্বা
ননৃতুশ্চাপ্সরোগণাঃ ।
দেবদুন্দুভযো নেদুঃ
পুষ্পবৃষ্টিশ্চ খাচ্চ্যুতা ।
উত্সবশ্চ মহানাসীত্
অযোধ্যাযাং জনাকুলঃ ।
রথ্যাশ্চ জনসম্বাধা
নটনর্তকসঙ্কুলাঃ ।
গাযনৈশ্চ বিরাবিণ্যো
বাদনৈশ্চ তথাঽপরৈঃ ॥17,18
প্রদেযাংশ্চ দদৌ রাজা
সূতমাগধবন্দিনাম্ ।
ব্রাহ্মণেভ্যো দদৌ বিত্তম্
গোধনানি সহস্রশঃ ॥19
অতীত্যৈকাদশাহং তু
নামকর্ম তথাঽকরোত্ ।
জ্যেষ্ঠং রামং মহাত্মানম্
ভরতং কৈকযীসুতম্ ।
সৌমিত্রিং লক্ষ্মণ ইতি
শত্রুঘ্নমপরং তথা ।
বসিষ্ঠঃ পরমপ্রীতো
নামানি কৃতবাংস্তদা ॥20,21
ব্রাহ্মণান্ ভোজযামাস
পৌরাংজানপদানপি ।
অদদদ্ব্রাহ্মণানাং চ
রত্নৌঘমমিতং বহু ।
তেষাং জন্মক্রিযাদীনি
সর্বকর্মাণ্যকারযত্ ॥22,23
তেষাং কেতুরিব জ্যেষ্ঠো
রামো রতিকরঃ পিতুঃ ।
বভূব ভূযো ভূতানাম্
স্বযম্ভূরিব সম্মতঃ ॥24
সর্বে বেদবিদঃ শূরাঃ
সর্বে লোকহিতে রতাঃ ।
সর্বে জ্ঞানোপপন্নাশ্চ
সর্বে সমুদিতা গুণৈঃ ॥25
তেষামপি মহাতেজা
রামঃ সত্যপরাক্রমঃ ।
ইষ্টঃ সর্বস্য লোকস্য
শশাঙ্ক ইব নির্মলঃ ॥26
গজস্কন্ধেঽশ্বপৃষ্ঠে চ
রথচর্যাসু সম্মতঃ ।
ধনুর্বেদে চ নিরতঃ
পিতুঃ শুশ্রূষণে রতঃ ॥27
বাল্যাত্ প্রভৃতি সুস্নিগ্ধো
লক্ষ্মণো লক্ষ্মিবর্দ্ধনঃ ।
রামস্য লোকরামস্য
ভ্রাতুর্জ্যেষ্ঠস্য নিত্যশঃ ॥28
সর্বপ্রিযকরস্তস্য
রামস্যাপি শরীরতঃ ।
লক্ষ্মণো লক্ষ্মিসম্পন্নো
বহিঃ প্রাণ ইবাপরঃ ॥29
ন চ তেন বিনা নিদ্রাম্
লভতে পুরুষোত্তমঃ ।
মৃষ্টমন্নমুপানীতম্
অশ্নাতি ন হি তং বিনা ॥30
যদা হি হযমারূঢো
মৃগযাং যাতি রাঘবঃ ।
তদৈনং পৃষ্ঠতোঽভ্যেতি
সধনুঃ পরিপালযন্ ॥31
ভরতস্যাপি শত্রুঘ্নো
লক্ষ্মণাবরজো হি সঃ ।
প্রাণৈঃ প্রিযতরো নিত্যম্
তস্য চাসীত্তথা প্রিযঃ ॥32
স চতুর্ভির্মহাভাগৈঃ
পুত্রৈর্দশরথঃ প্রিযৈঃ ।
বভূব পরমপ্রীতো
দেবৈরিব পিতামহঃ ॥33
তে যদা জ্ঞানসম্পন্নাঃ
সর্বে সমুদিতা গুণৈঃ ।
হ্রীমন্তঃ কীর্তিমন্তশ্চ
সর্বজ্ঞা দীর্ঘদর্শিনঃ ।
তেষামেবম্প্রভাবানাম্
সর্বেষাং দীপ্ততেজসাম্ ।
পিতা দশরথো হৃষ্টো
ব্রহ্মা লোকাধিপো যথা ॥34,35
তে চাপি মনুজব্যাঘ্রা
বৈদিকাধ্যযনে রতাঃ ।
পিতৃশুশ্রূষণরতা
ধনুর্বেদে চ নিষ্ঠিতাঃ ॥36
অথ রাজা দশরথঃ
তেষাং দারক্রিযাং প্রতি ।
চিন্তযামাস ধর্মাত্মা
সোপাধ্যাযঃ সবান্ধবঃ ॥37
তস্য চিন্তযমানস্য
মন্ত্রিমধ্যে মহাত্মনঃ ।
অভ্যাগচ্ছন্মহাতেজা
বিশ্বামিত্রো মহামুনিঃ ॥38

স রাজ্ঞো দর্শনাকাঙ্ক্ষী
দ্বারাধ্যক্ষানুবাচ হ ।
শীঘ্রমাখ্যাত মাং প্রাপ্তম্
কৌশিকং গাধিনন্দনম্ ॥39
তচ্ছ্রুত্বা বচনং তস্য
রাজ্ঞো বেশ্ম প্রদুদ্রুবুঃ ।
সম্ভ্রান্তমনসঃ সর্বে
তেন বাক্যেন চোদিতাঃ ॥40
তে গত্বা রাজভবনম্
বিশ্বামিত্রমৃষিং তদা ।
প্রাপ্তমাবেদযামাসুঃ
নৃপাযৈক্ষ্বাকবে তদা ॥41
তেষাং তদ্বচনং শ্রুত্বা
সপুরোধাঃ সমাহিতঃ ।
প্রত্যুজ্জগাম তং হৃষ্টো
ব্রহ্মাণমিব বাসবঃ ॥42
তং দৃষ্ট্বা জ্বলিতং দীপ্ত্যা
তাপসং সংশিতব্রতম্ ।
প্রহৃষ্টবদনো রাজা
ততোঽর্ঘ্যমুপহারযত্ ॥43
স রাজ্ঞঃ প্রতিগৃহ্যার্ঘ্যম্
শাস্ত্রদৃষ্টেন কর্মণা ।
কুশলং চাব্যযং চৈব
পর্যপৃচ্ছন্নরাধিপম্ ॥44
পুরে কোশে জনপদে
বান্ধবেষু সুহৃত্সু চ ।
কুশলং কৌশিকো রাজ্ঞঃ
পর্যপৃচ্ছত্সুধার্মিকঃ ॥45
অপি তে সন্নতাঃ সর্বে
সামন্তা রিপবো জিতাঃ ।
দৈবং চ মানুষং চাপি
কর্ম তে সাধ্বনুষ্ঠিতম্ ॥46
বসিষ্ঠং চ সমাগম্য
কুশলং মুনিপুঙ্গবঃ ।
ঋষীংশ্চান্যান্ যথান্যাযম্
মহাভাগানুবাচ হ ॥47
তে সর্বে হৃষ্টমনসঃ
তস্য রাজ্ঞো নিবেশনম্ ।
বিবিশুঃ পূজিতাস্তত্র
নিষেদুশ্চ যথার্হতঃ ॥48
অথ হৃষ্টমনা রাজা
বিশ্বামিত্রং মহামুনিম্ ।
উবাচ পরমোদারো
হৃষ্টস্তমভিপূজযন্ ॥49
যথাঽমৃতস্য সম্প্রাপ্তিঃ
যথা বর্ষমনূদকে ।
যথা সদৃশদারেষু
পুত্রজন্মাপ্রজস্য চ ।
প্রণষ্টস্য যথা লাভো
যথা হর্ষো মহোদযে ।
তথৈবাগমনং মন্যে
স্বাগতং তে মহামুনে ॥50,51
কং চ তে পরমং কামম্
করোমি কিমু হর্ষিতঃ ।
পাত্রভূতোঽসি মে ব্রহ্মন্
দিষ্ট্যা প্রাপ্তোঽসি ধার্মিক ।
অদ্য মে সফলং জন্ম
জীবিতং চ সুজীবিতম্ ॥52
পূর্বং রাজর্ষিশব্দেন
তপসা দ্যোতিতপ্রভঃ ।
ব্রহ্মর্ষিত্বমনুপ্রাপ্তঃ
পূজ্যোঽসি বহুধা মযা ॥53
তদদ্ভুতমিদং ব্রহ্মন্
পবিত্রং পরমং মম ।
শুভক্ষেত্রগতশ্চাহম্
তব সন্দর্শনাত্প্রভো ॥54
ব্রূহি যত্প্রার্থিতং তুভ্যম্
কার্যমাগমনং প্রতি ।
ইচ্ছাম্যনুগৃহীতোঽহম্
ত্বদর্থপরিবৃদ্ধযে ॥55
কার্যস্য ন বিমর্শং চ
গন্তুমর্হসি কৌশিক ।
কর্তা চাহমশেষেণ
দৈবতং হি ভবান্ মম ॥56
মম চাযমনুপ্রাপ্তো
মহানভ্যুদযো দ্বিজ ।
তবাগমনজঃ কৃত্স্নো
ধর্মশ্চানুত্তমো মম ॥57
ইতি হৃদযসুখং নিশম্য বাক্যং
শ্রুতিসুখমাত্মবতা বিনীতমুক্তম্ ।
প্রথিতগুণযশা গুণৈর্বিশিষ্টঃ
পরমঋষিঃ পরমং জগাম হর্ষম্ ॥58
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে অষ্টাদশস্সর্গঃ॥