বালমীকি রামায়ণ বালা কাণ্ড সরগা ১৯ (বাংলা)

তচ্ছ্রুত্বা রাজসিংহস্য
বাক্যমদ্ভুতবিস্তরম্ ।
হৃষ্টরোমা মহাতেজা
বিশ্বামিত্রোঽভ্যভাষত ॥1
সদৃশং রাজশার্দূল
তবৈতদ্ভুবি নান্যথা ।
মহাকুলপ্রসূতস্য
বসিষ্ঠব্যপদেশিনঃ ॥2
যত্তু মে হৃদ্গতং বাক্যম্
তস্য কার্যস্য নিশ্চযম্ ।
কুরুষ্ব রাজশার্দূল
ভব সত্যপ্রতিশ্রবঃ ॥3
অহং নিযমমাতিষ্ঠে
সিদ্ধ্যর্থং পুরুষর্ষভ ।
তস্য বিঘ্নকরৌ দ্বৌ তু
রাক্ষসৌ কামরূপিণৌ ॥4
ব্রতে মে বহুশশ্চীর্ণে
সমাপ্ত্যাং রাক্ষসাবিমৌ ।
মারীচশ্চ সুবাহুশ্চ
বীর্যবন্তৌ সুশিক্ষিতৌ ।
সমাংসরুধিরৌঘেণ
বেদিং তামভ্যবর্ষতাম্ ॥5
অবধূতে তথাভূতে
তস্মিন্নিযমনিশ্চযে ।
কৃতশ্রমো নিরুত্সাহঃ
তস্মাদ্দেশাদপাক্রমে ॥6
ন চ মে ক্রোধমুত্স্রষ্টুম্
বুদ্ধির্ভবতি পার্থিব ।
তথাভূতা হি সা চর্যা
ন শাপস্তত্র মুচ্যতে ॥7
স্বপুত্রং রাজশার্দূল
রামং সত্যপরাক্রমম্ ।
কাকপক্ষধরং শূরম্
জ্যেষ্ঠং মে দাতুমর্হসি ॥8
শক্তো হ্যেষ মযা গুপ্তো
দিব্যেন স্বেন তেজসা ।
রাক্ষসা যে বিকর্তারঃ
তেষামপি বিনাশনে ॥9
শ্রেযশ্চাস্মৈ প্রদাস্যামি
বহুরূপং ন সংশযঃ ।
ত্রযাণামপি লোকানাম্
যেন খ্যাতিং গমিষ্যতি ॥10
ন চ তৌ রামমাসাদ্য
শক্তৌ স্থাতুং কথঞ্চন ।
ন চ তৌ রাঘবাদন্যো
হন্তুমুত্সহতে পুমান্ ॥11
বীর্যোত্সিক্তৌ হি তৌ পাপৌ
কালপাশবশং গতৌ ।
রামস্য রাজশার্দূল
ন পর্যাপ্তৌ মহাত্মনঃ ॥12
ন চ পুত্রকৃতস্নেহম্
কর্তুমর্হতি পার্থিব ।
অহং তে প্রতিজানামি
হতৌ তৌ বিদ্ধি রাক্ষসৌ ॥13
অহং বেদ্মি মহাত্মানম্
রামং সত্যপরাক্রমম্ ।
বসিষ্ঠোঽপি মহাতেজা
যে চেমে তপসি স্থিতাঃ ॥14
যদি তে ধর্মলাভং চ
যশশ্চ পরমং ভুবি ।
স্থিতমিচ্ছসি রাজেন্দ্র
রামং মে দাতুমর্হসি ॥15
যদি হ্যনুজ্ঞাং কাকুত্স্থ
দদতে তব মন্ত্রিণঃ ।
বসিষ্ঠপ্রমুখাঃ সর্বে
রাঘবং মে বিসর্জয ॥16
অভিপ্রেতমসংসক্তম্
আত্মজং দাতুমর্হসি ।
দশরাত্রং হি যজ্ঞস্য
রামং রাজীবলোচনম্ ॥17
নাত্যেতি কালো যজ্ঞস্য
যথাঽযং মম রাঘব ।
তথা কুরুষ্ব ভদ্রং তে
মা চ শোকে মনঃ কৃথাঃ ॥18
ইত্যেবমুক্ত্বা ধর্মাত্মা
ধর্মার্থসহিতং বচঃ ।
বিররাম মহাতেজা
বিশ্বামিত্রো মহামুনিঃ ॥19
স তন্নিশম্য রাজেন্দ্রো
বিশ্বামিত্রবচঃ শুভম্ ।
শোকমভ্যগমত্তীব্রম্
ব্যষীদত ভযান্বিতঃ ॥20
ইতি হৃদযমনোবিদারণং
মুনিবচনং তদতীব শুশ্রুবান্ ।
নরপতিরভবন্মহাংস্তদা
ব্যথিতমনাঃ প্রচচাল চাসনাত্ ॥21
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে একোনবিংশস্সর্গঃ॥



x