বালমীকি রামায়ণ বালা কাণ্ড সরগা ২০ (বাংলা)

 তচ্ছ্রুত্বা রাজশার্দূলো
বিশ্বামিত্রস্য ভাষিতম্ ।
মুহূর্তমিব নিঃসঞ্জ্ঞঃ
সঞ্জ্ঞাবানিদমব্রবীত্ ॥1
ঊনষোডশবর্ষো মে
রামো রাজীবলোচনঃ ।
ন যুদ্ধযোগ্যতামস্য
পশ্যামি সহ রাক্ষসৈঃ ॥2
ইযমক্ষৌহিণী পূর্ণা
যস্যাহং পতিরীশ্বরঃ ।
অনযা সংবৃতো গত্বা
যোদ্ধাঽহং তৈর্নিশাচরৈঃ ॥3
ইমে শূরাশ্চ বিক্রান্তা
ভৃত্যা মেঽস্ত্রবিশারদাঃ ।
যোগ্যা রক্ষোগণৈর্যোদ্ধুম্
ন রামং নেতুমর্হসি ॥4
অহমেব ধনুষ্পাণিঃ
গোপ্তা সমরমূর্দ্ধনি ।
যাবত্প্রাণান্ ধরিষ্যামি
তাবদ্যোত্স্যে নিশাচরৈঃ ॥5
নির্বিঘ্না ব্রতচর্যা সা
ভবিষ্যতি সুরক্ষিতা ।
অহং তত্র গমিষ্যামি
ন রামং নেতুমর্হসি ॥6
বালো হ্যকৃতবিদ্যশ্চ
ন চ বেত্তি বলাবলম্ ।
ন চাস্ত্রবলসংযুক্তো
ন চ যুদ্ধবিশারদঃ ।
ন চাসৌ রক্ষসাং যোগ্যঃ
কূটযুদ্ধা হি তে ভৃশম্ ॥7,8
বিপ্রযুক্তো হি রামেণ
মুহূর্তমপি নোত্সহে ।
জীবিতুং মুনিশার্দূল
ন রামং নেতুমর্হসি ॥9
যদি বা রাঘবং ব্রহ্মন্
নেতুমিচ্ছসি সুব্রত ।
চতুরঙ্গসমাযুক্তম্
মযা চ সহিতং নয ॥10
ষষ্টির্বর্ষসহস্রাণি
জাতস্য মম কৌশিক ।
দুঃখেনোত্পাদিতশ্চাযম্
ন রামং নেতুমর্হসি ॥11
চতুর্ণামাত্মজানাং হি
প্রীতিঃ পরমিকা মম ।
জ্যেষ্ঠং ধর্মপ্রধানং চ
ন রামং নেতুমর্হসি ॥12
কিংবীর্যা রাক্ষসাস্তে চ
কস্য পুত্রাশ্চ কে চ তে ।
কথম্প্রমাণাঃ কে চৈতান্
রক্ষন্তি মুনিপুঙ্গব ॥13
কথং চ প্রতিকর্তব্যম্
তেষাং রামেণ রক্ষসাম্ ।
মামকৈর্বা বলৈর্ব্রহ্মন্
মযা বা কূটযোধিনাম্ ॥14
সর্বং মে শংস ভগবন্
কথং তেষাং মযা রণে ।
স্থাতব্যং দুষ্টভাবানাম্
বীর্যোত্সিক্তা হি রাক্ষসাঃ ॥15
তস্য তদ্বচনং শ্রুত্বা
বিশ্বামিত্রোঽভ্যভাষত ।
পৌলস্ত্যবংশপ্রভবো
রাবণো নাম রাক্ষসঃ ।
স ব্রহ্মণা দত্তবরঃ
ত্রৈলোক্যং বাধতে ভৃশম্ ।
মহাবলো মহাবীর্যো
রাক্ষসৈর্বহুভির্বৃতঃ ॥16,17
শ্রূযতে হি মহাবীর্যো
রাবণো রাক্ষসাধিপঃ ।
সাক্ষাদ্বৈশ্রবণভ্রাতা
পুত্রো বিশ্রবসো মুনেঃ ॥18
যদা স্বযং ন যজ্ঞস্য
বিঘ্নকর্তা মহাবলঃ ।
তেন সঞ্চোদিতৌ দ্বৌ তু
রাক্ষসৌ বৈ মহাবলৌ ।
মারীচশ্চ সুবাহুশ্চ
যজ্ঞবিঘ্নং করিষ্যতঃ ॥19
ইত্যুক্তো মুনিনা তেন
রাজোবাচ মুনিং তদা ।
ন হি শক্তোঽস্মি সঙ্গ্রামে
স্থাতুং তস্য দুরাত্মনঃ ॥20
স ত্বং প্রসাদং ধর্মজ্ঞ
কুরুষ্ব মম পুত্রকে ।
মম চৈবাল্পভাগ্যস্য
দৈবতং হি ভবান্ গুরুঃ ॥21
দেবদানবগন্ধর্বা
যক্ষাঃ পতগপন্নগাঃ ।
ন শক্তা রাবণং সোঢুম্
কিং পুনর্মানবা যুধি ॥22
স হি বীর্যবতাং বীর্যম্
আদত্তে যুধি রাক্ষসঃ ।
তেন চাহং ন শক্নোমি
সংযোদ্ধুং তস্য বা বলৈঃ ।
সবলো বা মুনিশ্রেষ্ঠ
সহিতো বা মমাত্মজৈঃ ॥23
কথমপ্যমরপ্রখ্যম্
সঙ্গ্রামাণামকোবিদম্ ।
বালং মে তনযং ব্রহ্মন্
নৈব দাস্যামি পুত্রকম্ ॥24
অথ কালোপমৌ যুদ্ধে
সুতৌ সুন্দোপসুন্দযোঃ ।
যজ্ঞবিঘ্নকরৌ তৌ তে
নৈব দাস্যামি পুত্রকম্ ॥25
মারীচশ্চ সুবাহুশ্চ
বীর্যবন্তৌ সুশিক্ষিতৌ ।
তযোরন্যতরেণাহম্
যোদ্ধা স্যাং সসুহৃদ্গণঃ ॥26
ইতি নরপতিজল্পনাদ্দ্বিজেন্দ্রং
কুশিকসুতং সুমহান্ বিবেশ মন্যুঃ ।
সুহুত ইব সমিদ্ভিরাজ্যসিক্তঃ
সমভবদুজ্জ্বলিতো মহর্ষিবহ্নিঃ ॥27
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে বিংশস্সর্গঃ॥