অথ তাং রজনীমুষ্য
বিশ্বামিত্রো মহাযশাঃ ।
প্রহস্য রাঘবং বাক্যম্
উবাচ মধুরাক্ষরম্ ॥1
পরিতুষ্টোঽস্মি ভদ্রং তে
রাজপুত্র মহাযশঃ ।
প্রীত্যা পরমযা যুক্তো
দদাম্যস্ত্রাণি সর্বশঃ ॥2
দেবাসুরগণান্ বাপি
সগন্ধর্বোরগানপি ।
যৈরমিত্রান্ প্রসহ্যাজৌ
বশীকৃত্য জযিষ্যসি ।
তানি দিব্যানি ভদ্রং তে
দদাম্যস্ত্রাণি সর্বশঃ ॥3,4
দণ্ডচক্রং মহদ্দিব্যম্
তব দাস্যামি রাঘব ।
ধর্মচক্রং ততো বীর
কালচক্রং তথৈব চ ।
বিষ্ণুচক্রং তথাত্যুগ্রম্
চন্দ্রমস্ত্রং তথৈব চ ।
বজ্রমস্ত্রং নরশ্রেষ্ঠ
শৈবং শূলবরং তথা ।
অস্ত্রং ব্রহ্মশিরশ্চৈব
ঐষীকমপি রাঘব ।
দদামি তে মহাবাহো
ব্রাহ্মমস্ত্রমনুত্তমম্ ॥5,6,7
গদে দ্বে চৈব কাকুত্স্থ
মোদকী শিখরী উভে ।
প্রদীপ্তে নরশার্দূল
প্রযচ্ছামি নৃপাত্মজ ॥8
ধর্মপাশমহং রাম
কালপাশং তথৈব চ ।
পাশং বারুণমস্ত্রং চ
দদাম্যহমনুত্তমম্ ॥9
অশনী দ্বে প্রযচ্ছামি
শুষ্কার্দ্রে রঘুনন্দন ।
দদামি চাস্ত্রং পৈনাকম্
অস্ত্রং নারাযণং তথা ॥10
আগ্নেযমস্ত্রং দযিতম্
শিখরং নাম নামতঃ ।
বাযব্যং প্রথনং নাম
দদামি চ তবানঘ ॥11
অস্ত্রং হযশিরো নাম
ক্রৌঞ্চমস্ত্রং তথৈব চ ।
শক্তিদ্বযং চ কাকুত্স্থ
দদামি তব রাঘব ॥12
কঙ্কালং মুসলং ঘোরম্
কাপালমথ কঙ্কণম্ ।
ধারযন্ত্যসুরা যানি
দদাম্যেতানি সর্বশঃ ॥13
বৈদ্যাধরং মহাস্ত্রং চ
নন্দনং নাম নামতঃ ।
অসিরত্নং মহাবাহো
দদামি নৃবরাত্মজ ॥14
গান্ধর্বমস্ত্রং দযিতম্
মানবং নাম নামতঃ ।
প্রস্বাপনপ্রশমনে
দদ্মি সৌরং চ রাঘব ॥15
দর্পণং শোষণং চৈব
সন্তাপনবিলাপনে ।
মদনং চৈব দুর্দ্ধর্ষম্
কন্দর্পদযিতং তথা ।
পৈশাচমস্ত্রং দযিতম্
মোহনং নাম নামতঃ ।
প্রতীচ্ছ নরশার্দূল
রাজপুত্র মহাযশঃ ॥16,17
তামসং নরশার্দূল
সৌমনং চ মহাবল ।
সংবর্ধং চৈব দুর্ধর্ষম্
মৌসলং চ নৃপাত্মজ ।
সত্যমস্ত্রং মহাবাহো
তথা মাযাধরং পরম্ ।
ঘোরং তেজঃপ্রভং নাম
ত্বষ্টুরস্ত্রং সুদামনম্ ।
দারুণং চ ভগস্যাপি
শীতেষুমথ মানবম্ ॥18,19
এতান্ রাম মহাবাহো
কামরূপান্ মহাবলান্ ।
গৃহাণ পরমোদারান্
ক্ষিপ্রমেব নৃপাত্মজ ॥20
স্থিতস্তু প্রাঙ্মুখো ভূত্বা
শুচির্মুনিবরস্তদা ।
দদৌ রামায সুপ্রীতো
মন্ত্রগ্রামমনুত্তমম্ ॥21
সর্বসঙ্গ্রহণং যেষাম্
দৈবতৈরপি দুর্লভম্ ।
তান্যস্ত্রাণি তদা বিপ্রো
রাঘবায ন্যবেদযত্ ॥22
জপতস্তু মুনেস্তস্য
বিশ্বামিত্রস্য ধীমতঃ ।
উপতস্থুর্মহার্হাণি
সর্বাণ্যস্ত্রাণি রাঘবম্ ॥23
ঊচুশ্চ মুদিতাঃ সর্বে
রামং প্রাঞ্জলযস্তদা ।
ইমে স্ম পরমোদারাঃ
কিঙ্করাস্তব রাঘব ॥24
প্রতিগৃহ্য চ কাকুত্স্থঃ
সমালভ্য চ পাণিনা ।
মানসা মে ভবিষ্যধ্বম্
ইতি তানভ্যচোদযত্ ॥25
ততঃ প্রীতমনা রামো
বিশ্বামিত্রং মহামুনিম্ ।
অভিবাদ্য মহাতেজা
গমনাযোপচক্রমে ॥26
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে সপ্তবিংশস্সর্গঃ॥
