প্রতিগৃহ্য ততোঽস্ত্রাণি
প্রহৃষ্টবদনঃ শুচিঃ ।
গচ্ছন্নেব চ কাকুত্স্থো
বিশ্বামিত্রমথাব্রবীত্ ॥1
গৃহীতাস্ত্রোঽস্মি ভগবন্
দুরাধর্ষঃ সুরাসুরৈঃ ।
অস্ত্রাণাং ত্বহমিচ্ছামি
সংহারং মুনিপুঙ্গব ॥2
এবং ব্রুবতি কাকুত্স্থে
বিশ্বামিত্রো মহাযশাঃ ।
সংহারং ব্যাজহারাথ
ধৃতিমান্ সুব্রতঃ শুচিঃ ॥3
সত্যবন্তং সত্যকীর্তিম্
ধৃষ্টং রভসমেব চ ।
প্রতিহারতরং নাম
পরাঙ্মুখমবাঙ্মুখম্ ।
লক্ষাক্ষবিষমৌ চৈব
দৃঢনাভসুনাভকৌ ।
দশাক্ষশতবক্ত্রৌ চ
দশশীর্ষশতোদরৌ ।
পদ্মনাভমহানাভৌ
দুন্দুনাভসুনাভকৌ ।
জ্যোতিষং কৃশনং চৈব
নৈরাশ্যবিমলাবুভৌ ।
যোগন্ধরহরিদ্রৌ চ
দৈত্যপ্রশমনৌ তথা ।
সার্চির্মালী ধৃতির্মালী
বৃত্তিমান্ রুচিরস্তথা ।
পিতৃসৌমনসং চৈব
বিধূতমকরাবুভৌ ।
করবীরকরং চৈব
ধনধান্যৌ চ রাঘব ।
কামরূপং কামরুচিম্
মোহমাবরণং তথা ।
জৃম্ভকং সর্বনাভং চ
সন্তানবরণৌ তথা ।
ভৃশাশ্বতনযান্ রাম
ভাস্বরান্কামরূপিণঃ ।
প্রতীচ্ছ মম ভদ্রং তে
পাত্রভূতোঽসি রাঘব ॥4,5,6,7,8,9,10
বাঢমিত্যেব কাকুত্স্থঃ
প্রহৃষ্টেনান্তরাত্মনা ।
দিব্যভাস্বরদেহাশ্চ
মূর্তিমন্তস্সুখপ্রদাঃ ।
কেচিদঙ্গারসদৃশাঃ
কেচিদ্ধূমোপমাস্তথা ।
চন্দ্রার্কসদৃশাঃ কেচিত্
প্রহ্বাঞ্জলিপুটাস্তথা ।
রামং প্রাঞ্জলযো ভূত্বাঽ -
ব্রুবন্ মধুরভাষিণঃ ।
ইমে স্ম নরশার্দূল
শাধি কিং করবাম তে ॥11,12,13
মানসাঃ কার্যকালেষু
সাহায্যং মে করিষ্যথ ।
গম্যতামিতি তানাহ
যথেষ্টং রঘুনন্দনঃ ॥14
অথ তে রামমামন্ত্র্য
কৃত্বা চাপি প্রদক্ষিণম্ ।
এবমস্ত্বিতি কাকুত্স্থম্
উক্ত্বা জগ্মুর্যথাগতম্ ॥15
স চ তান্ রাঘবো জ্ঞাত্বা
বিশ্বামিত্রং মহামুনিম্ ।
গচ্ছন্নেবাথ মধুরম্
শ্লক্ষ্ণং বচনমব্রবীত্ ॥16
কিং ন্বেতন্মেঘসঙ্কাশম্
পর্বতস্যাবিদূরতঃ ।
বৃক্ষষণ্ডমিতো ভাতি
পরং কৌতূহলং হি মে ।
দর্শনীযং মৃগাকীর্ণম্
মনোহরমতীব চ ।
নানা প্রকারৈঃ শকুনৈঃ
বল্গুনাদৈরলঙ্কৃতম্ ॥17,18
নিস্সৃতাঃ স্ম মুনিশ্রেষ্ঠ
কান্তারাদ্রোমহর্ষণাত্ ।
অনযা ত্ববগচ্ছামি
দেশস্য সুখবত্তযা ।
সর্বং মে শংস ভগবন্
কস্যাশ্রমপদং ত্বিদম্ ॥19,20
সম্প্রাপ্তা যত্র তে পাপা
ব্রহ্মঘ্না দুষ্টচারিণঃ ।
তব যজ্ঞস্য বিঘ্নায
দুরাত্মানো মহামতে ।
ভগবংস্তস্য কো দেশঃ
সা যত্র তব যাজ্ঞিকী ।
রক্ষিতব্যা ক্রিযা ব্রহ্মন্
মম বধ্যাশ্চ রাক্ষসাঃ ।
এতত্সর্বং মুনিশ্রেষ্ঠ
শ্রোতুমিচ্ছাম্যহং প্রভো ॥21,22
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে অষ্টাবিংশস্সর্গঃ॥
