অথ তস্যাপ্রমেযস্য
তদ্বনং পরিপৃচ্ছতঃ ।
বিশ্বামিত্রো মহাতেজা
ব্যাখ্যাতুমুপচক্রমে ॥1
ইহ রাম মহাবাহো
বিষ্ণুর্দেববরঃ প্রভুঃ ।
বর্ষাণি সুবহূন্যেব
তথা যুগশতানি চ ।
তপশ্চরণযোগার্থম্
উবাস সুমহাতপাঃ ॥2,3
এষ পূর্বাশ্রমো রাম
বামনস্য মহাত্মনঃ ।
সিদ্ধাশ্রম ইতি খ্যাতঃ
সিদ্ধো হ্যত্র মহাতপাঃ ॥4
এতস্মিন্নেব কালে তু
রাজা বৈরোচনির্বলিঃ ।
নির্জিত্য দৈবতগণান্
সেন্দ্রাংশ্চ সমরুদ্গণান্ ।
কারযামাস তদ্রাজ্যম্
ত্রিষু লোকেষু বিশ্রুতঃ ॥5
বলেস্তু যজমানস্য
দেবাঃ সাগ্নিপুরোগমাঃ ।
সমাগম্য স্বযং চৈব
বিষ্ণুমূচুরিহাশ্রমে ॥6
বলির্বৈরোচনির্বিষ্ণো
যজতে যজ্ঞমুত্তমম্ ।
অসমাপ্তে ক্রতৌ তস্মিন্
স্বকার্যমভিপদ্যতাম্ ॥7
যে চৈনমভিবাঞ্ছন্তি
যাচিতার ইতস্ততঃ ।
যচ্চ যত্র যথাবচ্চ
সর্বং তেভ্যঃ প্রযচ্ছতি ॥8
স ত্বং সুরহিতার্থায
মাযাযোগমুপাগতঃ ।
বামনত্বং গতো বিষ্ণো
কুরু কল্যাণমুত্তমম্ ॥9
এতস্মিন্নন্তরে রাম
কশ্যপোঽগ্নিসমপ্রভঃ ।
অদিত্যা সহিতো রাম
দীপ্যমান ইবৌজসা ।
দেবীসহাযো ভগবান্
দিব্যং বর্ষসহস্রকম্ ।
ব্রতং সমাপ্য বরদম্
তুষ্টাব মধুসূদনম্ ॥10,11
তপোমযং তপোরাশিম্
তপোমূর্তিং তপাত্মকম্ ।
তপসা ত্বাং সুতপ্তেন
পশ্যামি পুরুষোত্তমম্ ॥12
শরীরে তব পশ্যামি
জগত্সর্বমিদং প্রভো ।
ত্বমনাদিরনির্দেশ্যঃ
ত্বমহং শরণং গতঃ ॥13
তমুবাচ হরিঃ প্রীতঃ
কশ্যপং ধূতকল্মষম্ ।
বরং বরয ভদ্রং তে
বরার্হোঽসি মতো মম ॥14
তচ্ছ্রুত্বা বচনং তস্য
মারীচঃ কশ্যপোঽব্রবীত্ ॥15
অদিত্যা দেবতানাং চ
মম চৈবানুযাচতঃ ।
বরং বরদ সুপ্রীতো
দাতুমর্হসি সুব্রত ।
পুত্রত্বং গচ্ছ ভগবন্
অদিত্যা মম চানঘ ।
ভ্রাতা ভব যবীযাংস্ত্বম্
শক্রস্যাসুরসূদন ।
শোকার্তানাং তু দেবানাম্
সাহায্যং কর্তুমর্হসি ॥16,17
অযং সিদ্ধাশ্রমো নাম
প্রসাদাত্তে ভবিষ্যতি ।
সিদ্ধে কর্ম্মণি দেবেশ
উত্তিষ্ঠ ভগবন্নিতঃ ॥18
অথ বিষ্ণুর্মহাতেজা
অদিত্যাং সমজাযত ।
বামনং রূপমাস্থায
বৈরোচনিমুপাগমত্ ॥19
ত্রীন্ ক্রমানথ ভিক্ষিত্বা
প্রতিগৃহ্য চ মানদঃ ।
আক্রম্য লোকাঁল্লোকাত্মা
সর্বলোকহিতে রতঃ ।
মহেন্দ্রায পুনঃ প্রাদান্
নিযম্য বলিমোজসা ।
ত্রৈলোক্যং স মহাতেজাঃ
চক্রে শক্রবশং পুনঃ ॥20,21
তেনৈব পূর্বমাক্রান্ত
আশ্রমঃ শ্রমনাশনঃ ।
মযা তু ভক্ত্যা তস্যৈষ
বামনস্যোপভুজ্যতে ॥22
এতমাশ্রমমাযান্তি
রাক্ষসা বিঘ্নকারিণঃ ।
অত্রৈব পুরুষব্যাঘ্র
হন্তব্যা দুষ্টচারিণঃ ॥23
এতমাশ্রমমাযান্তি
রাক্ষসা বিঘ্নকারিণঃ ।
অত্রৈব পুরুষব্যাঘ্র
হন্তব্যা দুষ্টচারিণঃ ॥24
প্রবিশন্নাশ্রমপদম্
ব্যরোচত মহামুনিঃ ।
শশীব গতনীহারঃ
পুনর্বসুসমন্বিতঃ ॥25
তং দৃষ্ট্বা মুনযঃ সর্বে
সিদ্ধাশ্রমনিবাসিনঃ ।
উত্পত্যোত্পত্য সহসা
বিশ্বামিত্রমপূজযন্ ॥26
যথার্হং চক্রিরে পূজাম্
বিশ্বামিত্রায ধীমতে ।
তথৈব রাজপুত্রাভ্যাং
অকুর্বন্নতিথিক্রিযাম্ ॥27
মুহূর্তমিব বিশ্রান্তৌ
রাজপুত্রাবরিন্দমৌ ।
প্রাঞ্জলী মুনিশার্দূলম্
ঊচতূ রঘুনন্দনৌ ॥28
অদ্যৈব দীক্ষাং প্রবিশ
ভদ্রং তে মুনিপুঙ্গব ।
সিদ্ধাশ্রমোঽযং সিদ্ধঃ স্যাত্
সত্যমস্তু বচস্তব ॥29
এবমুক্তো মহাতেজা
বিশ্বামিত্রো মহামুনিঃ ।
প্রবিবেশ ততো দীক্ষাম্
নিযতো নিযতেন্দ্রিযঃ ॥30
কুমারাবপি তাং রাত্রিম্
উষিত্বা সুসমাহিতৌ ।
প্রভাতকালে চোত্থায
পূর্বাং সন্ধ্যামুপাস্য চ ।
স্পৃষ্টোদকৌ শুচী জপ্যম্
সমাপ্য নিযমেন চ ।
হুতাগ্নিহোত্রমাসীনম্
বিশ্বামিত্রমবন্দতাম্ ॥31,32
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে একোনত্রিংশস্সর্গঃ॥
