অথ তৌ দেশকালজ্ঞৌ
রাজপুত্রাবরিন্দমৌ ।
দেশে কালে চ বাক্যজ্ঞৌ
অব্রূতাং কৌশিকং বচঃ ॥1
ভগবন্ শ্রোতুমিচ্ছাবো
যস্মিন্ কালে নিশাচরৌ ।
সংরক্ষণীযৌ তৌ ব্রহ্মন্
নাতিবর্তেত তত্ক্ষণম্ ॥2
এবং ব্রুবাণৌ কাকুত্স্থৌ
ত্বরমাণৌ যুযুত্সযা ।
সর্বে তে মুনযঃ প্রীতাঃ
প্রশশংসুর্নৃপাত্মজৌ ॥3
অদ্যপ্রভৃতি ষড্রাত্রম্
রক্ষতং রাঘবৌ যুবাম্ ।
দীক্ষাং গতো হ্যেষ মুনিঃ
মৌনিত্বং চ গমিষ্যতি ॥4
তৌ চ তদ্বচনং শ্রুত্বা
রাজপুত্রৌ যশস্বিনৌ ।
অনিদ্রৌ ষডহোরাত্রম্
তপোবনমরক্ষতাম্ ॥5
উপাসাঞ্চক্রতুর্বীরৌ
যত্তৌ পরমধন্বিনৌ ।
ররক্ষতুর্মুনিবরম্
বিশ্বামিত্রমরিন্দমৌ ॥6
অথ কালে গতে তস্মিন্
ষষ্ঠেঽহনি সমাগতে ।
সৌমিত্রিমব্রবীদ্রামো
যত্তো ভব সমাহিতঃ ॥7
রামস্যৈবং ব্রুবাণস্য
ত্বরিতস্য যুযুত্সযা ।
প্রজজ্বাল ততো বেদিঃ
সোপাধ্যাযপুরোহিতা ॥8
সদর্ভচমসস্রুক্কা
সসমিত্কুসুমোচ্চযা ।
বিশ্বামিত্রেণ সহিতা
বেদির্জজ্বাল সর্ত্বিজা ॥9
মন্ত্রবচ্চ যথান্যাযম্
যজ্ঞোঽসৌ সম্প্রবর্ততে ।
আকাশে চ মহান্ শব্দঃ
প্রাদুরাসীদ্ভযানকঃ ॥10
আবার্য গগনং মেঘো
যথা প্রাবৃষি নির্গতঃ ।
তথা মাযাং বিকুর্বাণৌ
রাক্ষসাবভ্যধাবতাম্ ॥11
মারীচশ্চ সুবাহুশ্চ
তযোরনুচরাশ্চ যে ।
আগম্য ভীমসঙ্কাশা
রুধিরৌঘমবাসৃজন্ ॥12
সা তেন রুধিরৌঘেণ
বেদির্জজ্বাল মণ্ডিতা ।
সহসাঽভিদ্রুতো রামঃ
তানপশ্যত্ততো দিবি ॥13
তাবাপতন্তৌ সহসা
দৃষ্ট্বা রাজীবলোচনঃ ।
লক্ষ্মণং ত্বভিসম্প্রেক্ষ্য
রামো বচনমব্রবীত্ ॥14
পশ্য লক্ষ্মণ দুর্বৃত্তান্
রাক্ষসান্ পিশিতাশনান্ ।
মানবাস্ত্রসমাধূতান্
অনিলেন যথা ঘনান্ ॥15
মানবং পরমোদারং
অস্ত্রং পরমভাস্বরম্ ।
চিক্ষেপ পরমক্রুদ্ধো
মারীচোরসি রাঘবঃ ॥16
স তেন পরমাস্ত্রেণ
মানবেন সমাহতঃ ।
সম্পূর্ণং যোজনশতম্
ক্ষিপ্তঃ সাগরসম্প্লবে ॥17
বিচেতনং বিঘূর্ণন্তম্
শীতেষু বলতাডিতম্ ।
নিরস্তং দৃশ্য মারীচম্
রামো লক্ষ্মণমব্রবীত্ ॥18
পশ্য লক্ষ্মণ শীতেষুম্
মানবং ধর্মসংহিতম্ ।
মোহযিত্বা নযত্যেনম্
ন চ প্রাণৈর্ব্যযুজ্যত ॥19
ইমানপি বধিষ্যামি
নির্ঘৃণান্ দুষ্টচারিণঃ ।
রাক্ষসান্ পাপকর্মস্থান্
যজ্ঞঘ্নান্ রুধিরাশনান্ ॥20
সঙ্গৃহ্যাস্ত্রং ততো রামো
দিব্যমাগ্নেযমদ্ভুতম্ ।
সুবাহূরসি চিক্ষেপ
স বিদ্ধঃ প্রাপতদ্ভুবি ॥21
শেষান্ বাযব্যমাদায
নিজঘান মহাযশাঃ ।
রাঘবঃ পরমোদারো
মুনীনাং মুদমাবহন্ ॥22
স হত্বা রাক্ষসান্ সর্বান্
যজ্ঞঘ্নান্ রঘুনন্দনঃ ।
ঋষিভিঃ পূজিতস্তত্র
যথেন্দ্রো বিজযে পুরা ॥23
অথ যজ্ঞে সমাপ্তে তু
বিশ্বামিত্রো মহামুনিঃ ।
নিরীতিকা দিশো দৃষ্ট্বা
কাকুত্স্থমিদমব্রবীত্ ॥24
কৃতার্থোঽস্মি মহাবাহো
কৃতং গুরুবচস্ত্বযা ।
সিদ্ধাশ্রমমিদং সত্যম্
কৃতং রাম মহাযশঃ ॥25
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে ত্রিংশস্সর্গঃ॥
