অথ তাং রজনীং তত্র
কৃতার্থৌ রামলক্ষ্মণৌ ।
ঊষতুর্মুদিতৌ বীরৌ
প্রহৃষ্টেনান্তরাত্মনা ॥1
প্রভাতাযাং তু শর্বর্যাম্
কৃতপৌর্বাহ্ণিকক্রিযৌ ।
বিশ্বামিত্রং মুনীংশ্চান্যান্
সহিতাবভিজগ্মতুঃ ॥2
অভিবাদ্য মুনিশ্রেষ্ঠম্
জ্বলন্তমিব পাবকম্ ।
ঊচতুর্মধুরোদারম্
বাক্যং মধুরভাষিণৌ ॥3
ইমৌ স্ম মুনিশার্দূল
কিঙ্করৌ সমুপস্থিতৌ ।
আজ্ঞাপয যথেষ্টং বৈ
শাসনং করবাব কিম্ ॥4
এবমুক্তাস্ততস্তাভ্যাম্
সর্ব এব মহর্ষযঃ ।
বিশ্বামিত্রং পুরস্কৃত্য
রামং বচনমব্রুবন্ ॥5
মৈথিলস্য নরশ্রেষ্ঠ
জনকস্য ভবিষ্যতি ।
যজ্ঞঃ পরমধর্মিষ্ঠঃ
তস্য যাস্যামহে বযম্ ॥6
ত্বং চৈব নরশার্দূল
সহাস্মাভির্গমিষ্যসি ।
অদ্ভুতং ধনুরত্নং চ
তত্র তদ্দ্রষ্টুমর্হসি ॥7
তদ্ধি পূর্বং নরশ্রেষ্ঠ
দত্তং সদসি দৈবতৈঃ ।
অপ্রমেযবলং ঘোরম্
মখে পরমভাস্বরম্ ॥8
নাস্য দেবা ন গন্ধর্বা
নাসুরা ন চ রাক্ষসাঃ ।
কর্তুমারোপণং শক্তা
ন কথঞ্চন মানুষাঃ ॥9
ধনুষস্তস্য বীর্যং তু
জিজ্ঞাসন্তো মহীক্ষিতঃ ।
ন শেকুরারোপযিতুম্
রাজপুত্রা মহাবলাঃ ॥10
তদ্ধনুর্নরশার্দূল
মৈথিলস্য মহাত্মনঃ ।
তত্র দ্রক্ষ্যসি কাকুত্স্থ
যজ্ঞং চাদ্ভুতদর্শনম্ ॥11
তদ্ধি যজ্ঞফলং তেন
মৈথিলেনোত্তমং ধনুঃ ।
যাচিতং নরশার্দূল
সুনাভং সর্বদৈবতৈঃ ॥12
আযাগভূতং নৃপতেঃ
তস্য বেশ্মনি রাঘব ।
অর্চিতং বিবিধৈর্গন্ধৈঃ
মাল্যৈশ্চাগরুগন্ধিভিঃ ॥13
এবমুক্ত্বা মুনিবরঃ
প্রস্থানমকরোত্তদা ।
সর্ষিসঙ্ঘঃ সকাকুত্স্থ
আমন্ত্র্য বনদেবতাঃ ॥14
স্বস্তি বোঽস্তু গমিষ্যামি
সিদ্ধঃ সিদ্ধাশ্রমাদহম্ ।
উত্তরে জাহ্নবীতীরে
হিমবন্তং শিলোচ্চযম্ ॥15
প্রদক্ষিণং ততঃ কৃত্বা
সিদ্ধাশ্রমমনুত্তমম্ ।
উত্তরাং দিশমুদ্দিশ্য
প্রস্থাতুমুপচক্রমে ॥16
তং প্রযান্তং মুনিবরম্
অন্বযাদনুসারিণম্ ।
শকটীশতমাত্রং চ
প্রাযেণ ব্রহ্মবাদিনাম্ ॥17
মৃগপক্ষিগণাশ্চৈব
সিদ্ধাশ্রমনিবাসিনঃ ।
অনুজগ্মুর্মহাত্মানম্
বিশ্বামিত্রং মহামুনিম্ ।
নিবর্তযামাস ততঃ
পক্ষিসঙ্ঘান্ মৃগানপি ॥18
তে গত্বা দূরমধ্বানম্
লম্বমানে দিবাকরে ।
বাসং চক্রুর্মুনিবরাঃ
শোণাকূলে সমাগতাঃ ॥19
তেঽস্তঙ্গতে দিনকরে
স্নাত্বা হুতহুতাশনাঃ ।
বিশ্বামিত্রং পুরস্কৃত্য
নিষেদুরমিতৌজসঃ ॥20
রামোঽপি সহ সৌমিত্রিঃ
মুনীংস্তানভিপূজ্য চ ।
অগ্রতো নিষসাদাথ
বিশ্বামিত্রস্য ধীমতঃ ॥21
অথ রামো মহাতেজা
বিশ্বামিত্রং মহামুনিম্ ।
পপ্রচ্ছ নরশার্দূলঃ
কৌতূহলসমন্বিতঃ ॥22
ভগবন্ কস্য দেশোঽযম্
সমৃদ্ধবনশোভিতঃ ।
শ্রোতুমিচ্ছামি ভদ্রং তে
বক্তুমর্হসি তত্ত্বতঃ ॥23
চোদিতো রামবাক্যেন
কথযামাস সুব্রতঃ ।
তস্য দেশস্য নিখিলং
ঋষিমধ্যে মহাতপাঃ ॥24
ইত্যার্ষে বাল্মীকীযে
শ্রীমদ্রামাযণে আদিকাব্যে
বালকাণ্ডে একত্রিংশস্সর্গঃ॥
